މެކްސިކޯ، ކެނަޑާ އަދި އެމެރިކާގައި 2026 ވަނަ އަހަރު ބާއްވާ ފީފާ ވޯލްޑް ކަޕާއި، ސައުދީ އަރަބިއްޔާގައި 2027 ވަނަ އަހަރު ބާއްވާ އޭއެފްސީ އޭޝިއަން ކަޕުގެ ޖޮއިންޓް ކޮލިފައިންގެ ޕްރިލިމިނަރީ ފުރަތަމަ ބުރުގައި ރާއްޖެ އާއި ބަންގްލަދޭޝް ބައްދަލުކުރަން ޖެހިއްޖެއެވެ.
ޕްރިލިމިނަރީ ފުރަތަމަ ބުރުގައި ވާދަކުރާ 20 ޤައުމު ހޯމް އެންޑް އަވޭ އުސޫލުން ދެ މެޗު ކުޅުމަށްފަހު، ދެ ލެގުން މޮޅުވާ ޓީމެއް ކޮލިފައިވާނީ ޕްރިލިމިނަރީ ދެވަނަ ބުރަށެވެ. ދެވަނަ ބުރުގައި ޖުމްލަ 36 ޤައުމު ވާދަކުރާނެއެވެ.
ޕްރިލިމިނަރީ ކޮލިފައިންގެ ގުރު މިއަދު ނެގިއިރު، ފުރަތަމަ ބުރުގެ މެޗުތައް ކުޅޭނީ އަންނަ އޮކްޓޯބަރު މަހުގެ ތެރޭގައެވެ. އެ ގޮތުން މާލޭގައި ކުޅޭ ފުރަތަމަ ލެގު އޮންނާނީ އެ މަހުގެ 12 ވަނަ ދުވަހެވެ. އަދި ދެވަނަ ލެގު އެ މަހުގެ 17 ވަނަ ދުވަހު ކުޅޭނީ ބަންގްލަދޭޝްގައެވެ. މި ދެ ލެގުން ކުރި ލިބިއްޖެނަމަ ރާއްޖެ ވާދަކުރަން ޖެހޭނީ ޕްރިލިމިނަރީ ގްރޫޕް އައިގައި އޮސްޓްރޭލިއާ, ފަލަސްތީން އަދި ލުބުނާނާ ދެކޮޅަށެވެ.
ރާއްޖެ އާއި ބަންގްލަދޭޝް އެންމެ ފަހުން ކުޅުނު ހަތަރު މެޗުގެ ތެރެއިން ކޮންމެ ޓީމެއްވެސް ވަނީ ދެ މެޗުން މޮޅުވެފައެވެ. އެކަމަކު ދާދި ފަހުން އިންޑިއާގެ ބެންގަލޫރުގައި ބޭއްވި ސާފް ޗެމްޕިއަންޝިޕް ފުޓްބޯޅަ މުބާރާތުގައި ބަންގްލަދޭޝްއިން ވަނީ ރާއްޖެ ބަލިކޮށް، 20 އަހަރުގެ ތެރޭގައި ފުރަތަމަ ފަހަރަށް ސާފް ޗެމްޕިއަންޝިޕެއްގެ ތާރީޚުގައި ރާއްޖޭގެ މައްޗަށް ކުރި ހޯދާފައެވެ.
މި ފަހަރުގެ ވޯލްޑް ކަޕާއި އޭޝިއަން ކަޕުގެ ކޮލިފިކޭޝަނަށް ރާއްޖެ ނުކުންނާނީ މި ފަހުން ޤައުމީ ޓީމުގެ އެސިސްޓަންޓް ކޯޗުގެ މަޤާމުގައި ހުރި އަލީ ސުޒެއިނުގެ އިރުޝާދުގެ ދަށުންނެވެ.
ޤައުމީ ފުޓްބޯޅަ ޓީމުގެ ކޯޗު އިޓަލީގެ ފްރެންޗެސްކޯ މޮރިއޭރޯގެ އެއްބަސްވުން އަންނަ މަހު ހަމަވުމުން، ޓީމުގެ ކޯޗުކަން ސުޒެއިނާ ހަވާލުކުރާއިރު، މީގެ ކުރިން ސުޒެއިން ވަނީ 2021 ވަނަ އަހަރު ރާއްޖޭގައި ބޭއްވި ސާފް ޗެމްޕިއަންޝިޕް ފުޓްބޯޅަ މުބާރާތުގައި ޤައުމީ ޓީމަށް އިރުޝާދުދީފައެވެ. އެ ފަހަރު ރާއްޖެއިން ވަނީ ބަންގްލަދޭޝް ބަލިކޮށްފައެވެ.