އެމެރިކާގައި މިހާރު ކުރިއަށްދާ ޕްރީ-ސިޒަން މުބާރާތެއް ކަމަށްވާ ޕްރިމިއަރ ލީގު ސަމަރ ސީރީސްގައި ޗެލްސީ އާއި ނިއުކާސަލް ޔުނައިޓެޑް ބައްދަލުކުރި މެޗު އެއްވަރުވެއްޖެއެވެ.
މި މެޗު ނިމުނީ 1-1 ގެ ނަތީޖާއަކުން ދެ ޓީމު އެއްވަރުވެގެންނެވެ.
އެމެރިކާގެ އެޓްލާންޓާގެ 70 ހާހަށްވުރެ ގިނަ ސަޕޯޓަރުން ކުޅިބަލަން ވަން މި މެޗުގައިނިއުކާސަލުން ގިނައިރު ބޯޅަ ގެންގުޅުނު ނަމަވެސް, ގިނަ ހަމަލާ އުފައްދާފަވަނީ ޗެލްސީންނެވެ. މި މެޗުގައި ދެ ޓީމުން ކާމިޔާބުކުރި ދެ ލަނޑުވެސް ފެނިގެންދިޔައީ ފުރަތަމަ ހާފުގައެވެ.
މި މެޗުގައި އެންމެ ފުރަތަމަ ލަނޑު ޖަހައި ލީޑު ނެގީ ޗެލްސީންނެވެ. މެޗުގެ 12 ވަނަ މިނެޓުގައި މި ލަނޑު ކާމިޔާބުކޮށްދިނީ މި ސީޒަނަށް އެ ޓީމާ އަލަށް ގުޅުނު ނިކޮލަ ޖެކްސަންއެވެ. މި މެޗުގައި ނިއުކާސަލުން ނަތިޖާ ހަމަހަމަކުރީ ފުރަތަމަ ހާފުގެ އިތުރު ވަގުތު ތެރޭގައި މިގުއެލް އަލްމިރޯން ކާމިޔާބުކޮށްދިން ލަނޑުންނެވެ.
އެމެރިކާގެ ޓުއާއަށް ޗެލްސީން ވަނީ 29 ކުޅުންތެރިންގެ ސްކޮޑެއް އެކުލަވާލާފައެވެ. މެޗަށް ފަހު ވާހަކަދައްކަމުން ޗެލްސީގެ ކޯޗު މައުރީސިއޯ ޕޮޗެޓީނިއޯ ބުނީ ސީޒަން ފެށެން ވާއިރަށް އުނދަގޫވިނަމަވެސް، ޗެލްސީގެ ސްކޮޑުން ބައެއް ކުޅުންތެރިން އުނިކުރަންޖެހޭ ކަމަށެވެ.
ޕްރިމިއަރ ލީގުގެ ފުރަތަމަ މެޗުގައި އަންނަ މަހު 13 ވަނަ ދުވަހު ޗެލްސީ ނުކުންނާނީ ވާދަވެރި ލިވަޕޫލާ ދެކޮޅަށެވެ.