އެމެރިކާގައި ކުރިއަށްގެންދާ ޕްރީ-ސީޒަން ޓުއާގައި ކުޅުނު އެކުވެރިކަމުގެ މެޗުގައި މެންޗެސްޓާ ޔުނައިޓެޑުގެ މައްޗަށް ރެއާލް މެޑްރިޑް ކުރި ހޯދައިފިއެވެ.
ރޭ ފަތިހު ކުޅުނު މެޗުން ރެއާލް މޮޅުވީ 2-0 ގެ ނަތީޖާއިންނެވެ.
ވާދަވެރި ކުޅުމެއް ފެނިގެންދިޔަ މި މެޗުގައި ރެއާލުގެ ފުރަތަމަ ލަނޑު ކާމިޔާބުކޮށްއްދިނީ މި ސީޒަނުގައި އެ ޓީމާ އަލަށް ގުޅުނު އިންގްލަންޑުގެ ޒުވާން މިޑްފީލްޑަރު ޖޫޑް ބެލިންހަމެވެ. އޭނާ މި ލަނޑު ކާމިޔާބުކުރީ މެޗު ފަށައިގެން ހަވަނަ މިނެޓުގައެވެ. މިއީ އޭނާ ރެއާލުގެ ޖާޒީގައި ކާމިޔާބުކުރި ފުރަތަމަ ލަނޑެވެ. އަދި މި މެޗުގައި ރެއާލުގެ ފަހު ލަނޑު މެޗު ނިމެން މިނެޓަކަށް ވެފައި ކާމިޔާބުކޮށްދިނީ ޖޮސެލޫއެވެ.
މިއީ އައު ސީޒަނަށް ތައްޔާރުވުމުގެ ގޮތުން ރެއާލުން ކުޅުނު އެކުވެރިކަމުގެ ދެވަނަ މެޗެވެ. އެގޮތުން ފުރަތަމަ މެޗުގައި އޭސީ މިލާން އަތުން އެ ޓީމު މޮޅުވީ ފަހަތުން އަރައި ތިން ލަނޑު ޖަހައިގެންނެވެ. ސީޒަން ފެށުމުގެ ކުރިން ރެއާލުން އެކުވެރިކަމުގެ އިތުރު ދެ މެޗު ކުޅޭނެއެވެ. އެއީ ވާދަވެރި ބާސެލޯނާއާ ދެކޮޅަށް ކުޅޭ މެޗާއި، އިޓަލީގެ ޔުވެންޓަސްއާ ދެކޮޅަށް ކުޅޭ މެޗެވެ.