ނިއު ޒީލެންޑާއި އޮސްޓްރޭލިއާގައި މިހާރު ކުރިއަށްދާ ފީފާ ވިމެންސް ވޯލްޑް ކަޕް 2023 ގައި ނެދަލަންޑްސްއިން އެންމެ ފަހުގެ ޗެމްޕިއަން އެމެރިކާ މޮޅުވިޔަނުދީ ހިފަހައްޓައިފިއެވެ.
ނިއު ޒީލަންޑުގެ ވެލިންޓަން ރީޖަނަލް ސްޓޭޑިއަމުގައި ކުޅުނު މެޗު ނިމުނީ 1-1 ގެ ނަތީޖާއަކުން ދެ ޓީމު އެއްވަރުވެގެންނެވެ. އެންމެ ފަހުން 2019 ވަނަ އަހަރުގައި ފައިނަލުގައި މި ދެޓީމު ވާދަކުރިއިރު، ލިޔޯންގައި ކުޅުނު އެ މެޗު ކާމިޔާބުކޮށް މުބާރާތުގެ ތަށި އުފުލާލީ އެމެރިކާއެވެ.
ގުރޫޕް އީގައި މިއަދު ހެނދުނު މި ދެ ޓީމު ކުޅުނު މެޗުގައި ނެދަލަންޑްސްއިން ގިނައިރު ބޯޅަ ގެންގުޅުނުއިރު، ގިނަ ހަމަލާ އުފައްދާފައިވަނީ އެމެރިކާއިންނެވެ. މި މެޗުގެ ފުރަތަމަ ހާފުގެ 17 ވަނަ މިނެޓުގައި މި ސީޒަނަށް މެންޗެސްޓާ ސިޓީއާ ގުޅުނު ޖިލް ރޫޑް ކާމިޔާބުކުރި ލަނޑާއެކު ނެދަލަންޑްސްއިން ވަނީ ލީޑު ނަގާފައެވެ.
މި މެޗުގައި އެމެރިކާއިން ފޮނުވާލި ގިނަ ހަމާލާތައް ކާމިޔާބުނުވުމުން، އެ ޓީމުގެ ކުޅުންތެރިންނަށް ކޮންމެވެސް ވަރެއްގެ މާޔޫސް ކަމެއް ލިބިގެންދިޔައެވެ. އެކަމަކު މެޗުގެ ނަތީޖާ އެމެރިކާއިން ހަމަހަމަކުރީ ދެވަނަ ހާފުގައި ލިބުނު ކޯނަރަކުންނެވެ. މި ލަނޑު މެޗުގެ 62 ވަނަ މިނިޓުގައި ކާމިޔާބުކޮށްދިނީ ކެޕްޓަން ލިންޑްސޭ ހޯރަންއެވެ.
މިމެޗާ ކުރިމަތިލުމުގެ ކުރިން އެމެރިކާއިން ވަނީ އެންމެ ފަހުން ކުޅުނު 13 މެޗު ކާމިޔާބުކޮށްފައެވެ. މި ނަތީޖާއެކު ދެ ޓީމަށްވެސް މި ގުރޫޕުން ލިބެނީ ހަތަރު ޕޮއިންޓެވެ. ލަނޑުގެ ތަފާތުން އެމިރެކާއަށް ކުރިލިބޭއިރު، ގުރޫޕުގެ ފަހު މެޗުގައި އެ ޓީމު ނުކުންނާނީ އަންގާރަ ދުވަހު ޕޯޗުގަލާ ދެކޮޅަށެވެ.