ނިއު ޒީލެންޑާއި އޮސްޓްރޭލިއާގައި މިހާރު ކުރިއަށްދާ ފީފާ ވިމެންސް ވޯލްޑް ކަޕް 2023 ގެ ދެވަނަ ބުރުން ސްޕެއިނާއި ޖަޕާން ޖާގަ ހޯދައިފިއެވެ.
މުބާރާތުގެ ދެވަނަ ބުރުން ސްޕެއިން ޖާގަ ހޯދީ ޒެމްބިއާ 5-0 ގެ ނަތީޖާއަކުން ބަލިކޮށްގެންނެވެ. އަދި ޖަޕާން ދެވަނަ ބުރަށް ދިޔައީ ކޮސްޓަ ރީކާގެ މައްޗަށް 2-0 ގެ ނަތީޖާއަކުން ކުރި ހޯދައިގެންނެވެ.
ސްޕެއިނުން ވަނީ ޒެމްބިއާ ކޮޅަށް މެޗުގެ ފުރަތަމަ 13 މިނެޓުގައި ދެ ލަނޑު ޖަހާފައެވެ. މި ދެ ލަނޑު އެ ޓީމަށް ކާމިޔާބުކޮށްދިނީ އަބެޔެއިރާ އާއި ހާމޯސޯއެވެ. މީގެ އިތުރުން މި މެޗުގައި ސްޕެއިނުގެ ހާމޯސޯ އާއި ރޮޑޮންޑޯ ވަނީ، ކޮންމެ ކުޅުންތެރިއަކު ދެ ލަނޑު ޖަހާފައެވެ. ރޮޑޮންޑޯ ކުޅެން ނުކުތީ ދެވަނަ ހާފުގައި ދުނިޔޭގެ މޮޅު ކުޅުންތެރިޔާ އެލެކްޒިއާ ޕުޓެޔާސްގެ ބަދަލުގައެވެ.
ޖާޕަނުން ކުޅުނު މެޗުގައި ކޯސްޓް ރީކާ ކޮޅަށް އެ ޓީމުން ޖެހި ދެ ލަނޑުވެސް ފެނިގެންދިޔައީ މެޗުގެ ފުރަތަމަ ހާފުގައެވެ. މި ލަނޑުތަށް އެ ޓީމަށް ކާމިޔާބުކޮށްދިނީ ހިކަރޯ ނައުމޯޓޯ އާއި އައުބާ ފުޖީނިއޯއެވެ.
ގްރޫޕް ސީގައި ސްޕެއިނުން ވަނީ އެ ޓީމުން ކުޅުނު ފުރަތަމަ މެޗުގައި ކޮސްޓަ ރީކާ ބަލިކޮށްފައެވެ. އަދި ޖަޕާން ވަނީ އެ ޓީމުގެ ފުރަތަމަ މެޗުގައި ޒެމްބިއާ ބަލިކޮށްފައެވެ. އެހެންކަމުން ގްރޫޕް ސީގެ އެއްވަނަ ޓީމު ކަނޑައެޅޭނީ ސްޕެއިނާއި ޖަޕާން ބައްދަލުކުރާ މެޗުންނެވެ. މި ދެ ޤައުމަކީ މި ފަހަރުގެ ވޯލްޑް ކަޕުގެ ދެވަނަ ބުރުން ޖާގަ ހޯދި ފުރަތަމަ ދެ ޤައުމެވެ.
މި ވަގުތު މި ގްރޫޕުގެ އެއްވަނައިގައި ލަނޑުގެ ތަފާތުން އޮތީ ސްޕެއިނެވެ. މި ގުރޫޕްގައި ފަހު މެޗުގައި ކޮސްޓަ ރީކާ ނުކުންނާނީ ޒެމްބިއާއާ ދެކޮޅަށެވެ. އެ މެޗަށް ދެ ޓީމުސް ނުކުންނާނީ މުބާރާތުގެ ތާރީޚުގެ ފުރަތަމަ މޮޅު ހޯދުމުގެ އަޒުމުގައެވެ.