ޕޮލެންޑުގެ ވެރިރަށް ވޯސޯ ކައިރީގައި އޮންނަ ވައިގެ ބަނދަރެއްގެ ހޭންގަރެއްގައި ކުޑަ މަތިންދާބޯޓަކުން ޖެހި ހިނގި އެކްސިޑެންޓުގައި ފަސް މީހުން މަރުވެއްޖެއެވެ. މޫސުން ގޯސްވެ، ބޯކޮށް ވާރޭވެހެމުން ދިޔަ ވަގުތެއްގައި ހިނގި މި ހާދިސާގައި އިތުރު އަށް މީހަކަށް އަނިޔާވިއެވެ. އޭގެ ތެރެއިން ދެ މީހެއްގެ ހާލު ސީރިޔަސް ކަމުގައި ވޯސޯގެ އޮފިޝަލުން ވިދާޅުވެއެވެ.
މި ހާދިސާ ހިނގާފައި ވަނީ ތޫފާނެއް އަރައި މޫސުން ގޯސްވުމާ ގުޅިގެން ހޭންގަރުގެ ތެރޭގައި 13 މީހަކު ތޫފާނުން ރައްކާތެރިކަން ހޯދަން ވަދެ ތިބި ވަގުތެއްގައެވެ. އެ ތަނުގައި ޖެހުނު މަތިންދާބޯޓުގައި ތިން މީހުން ތިބި ކަމަށާއި، މި ހާދިސާގައި އެ ތިން މީހުން ވެސް މަރުވެފައިވާ ކަމުގައި އޮފިޝަލުން ވިދާޅުވެއެވެ. އޭގެ ތެރޭގައި ބޯޓު ދުއްވަން އިން ޕައިލެޓު ވެސް ހިމެނޭ ކަމުގައި ވޯސޯގެ ފުލުހުންގެ ތަރުޖަމާނު ސިލްވެސްޓްރަ މަރްޗާކާ ވިދާޅުވިއެވެ.
މި ހާދިސާ ހިނގާފައި ވަނީ ވޯސޯއާ 47 ކިލޯމީޓަރު ދުރުގައި އޮންނަ ޚްރިޗިންނޯ ވިޔާ އަވަށެއްގެ ވައިގެ ބަނދަރުގައެވެ. ހޭންގަރުގައި މަތިންދާބޯޓު ޖެހިފައި ވަނީ ވައިގެ ބަނދަރުގައި ޖައްސަން އުޅުމުގެ ތެރޭގައި ކަމަށް ވެސް މަރްޗާކާ ވިދާޅުވިއެވެ. މަތިންދާބޯޓު ޖެހިފައި ވަނީ ޓިނުން ހަދާފައިވާ ހޭންގަރެއްގައެވެ.
މި ހާދިސާގައި އެކްސިޑެންޓުވެފައި ވަނީ "ސެސްނާ" މަރުކާގެ ކުޑަ މަތިންދާބޯޓެކެވެ. މި ހާދިސާ ހިނގާފައިވާ ވައިގެ ބަނދަރަކީ ވައިކުޑަ އަޅައިގެން ފުންމާ މީހުންނަށް ތަމްރީނު ދިނުމުގެ ޚިދުމަތްދޭ ވައިގެ ބަނދަރެއް ކަމުގައި ވެސް ވޯސޯގެ އޮފިޝަލުން ވިދާޅުވިއެވެ.