މިޞްރުގެ ވެރިރަށް ޤާހިރާގައި ހުންނަ ޢާންމުން ދިރިއުޅޭ އެޕާޓްމަންޓް ޢިމާރާތެއް ވެއްޓި އަށް މީހުން މަރުވެއްޖެއެވެ. ޤާހިރާގެ ހަދާއިކް އަލް-ޤައްބާ އަވަށުގައި ހިނގި މި ހާދިސާގައި މަރުވި އަށް މީހުންގެ ތެރެއިން ހަތް މީހުންނަކީ އެއް ޢާއިލާއެއްގެ މެންބަރުންނެވެ.
މިޞްރުގެ ޕަބްލިކް ޕްރޮސިކިޔުޝަން އޮފީހުން ބުނީ ވެއްޓިފައިވާ ޢިމާރާތުގެ ދަށުން ނުވަ މީހެއްގެ ހަށިގަނޑު ނަގާފައިވާ ކަމުގައެވެ. އަދި، އޭގެ ތެރެއިން އެކަކަށް ބޮޑެތި ޒަޚަމުތަކެއް ލިބިފައިވީ ނަމަވެސް، އޭނާގެ ފުރާނަ ސަލާމަތް ކުރެވިފައިވާ ކަމުގައި އެ އިދާރާއިން ބުންޏެވެ. ޢިމާރާތް ވެއްޓުމުގެ ކުރިން އިތުރު ފަސް މީހަކު ޢިމާރާތުން ބޭރަށް ނިކުމެފައިވާ ކަމުގައި ވެސް އެ އިދާރާއިން ބުންޏެވެ.
އެ އިދާރާއިން މި ހާދިސާގެ ފުރިހަމަ ތަހުޤީޤެއް ހިންގަން ފަށާފައިވާއިރު، ޢިމާރާތް ވެއްޓިފައި ވަނީ އެ ތަނުގެ ފުރަތަމަ ފަންގިފިލާގައި ހުންނަ އެޕާޓްމަންޓެއްގައި ދިރިއުޅޭ ބަޔަކު، އެ ތަނުގެ ފާރެއް ތަޅައިލުމާ ގުޅިގެން ކަމަށް ބެލެވޭ ކަމުގައި އެ އޮފީހުން ބުނެއެވެ. އަދި، އެ އެޕާޓްމަންޓުގައި ދިރިއުޅޭ މީހުންގެ އަވަށްޓެރިން އެ ކަން ހުއްޓުވަން މަސައްކަތް ކޮށްފައިވާ ކަމަށް އެ ތަނުގައި ދިރިއުޅޭ މީހުން މަޢުލޫމާތު ދީފައިވާ ކަމުގައި ވެސް އެ އިދާރާއިން ހާމަކުރިއެވެ.
މި ހާދިސާއާ ގުޅިގެން ޢިމާރާތުގެ ވެރިފަރާތުގެ އިތުރުން، އެ ތަނުގައި މަރާމާތުގެ މަސައްކަތްތަކެއް ކުރަމުންދިޔަ ކުންފުނީގެ އިސްވެރިޔާއާއި އެ ކުންފުނީގެ މުވައްޒަފެއް ހައްޔަރު ކުރުމަށް މިހާރު ވަނީ އަމުރު ނެރެފައެވެ. ވެއްޓިފައިވާ ޢިމާރާތަކީ 19 ވަނަ ޤަރުނުގެ ފަހުކޮޅު، ނުވަތަ 20 ވަނަ ޤަރުނުގެ ކުރީކޮޅު ބިނާކޮށްފައިވާ ދުވަސްވީ ޢިމާރާތެއް ކަމުގައި މިޞްރުގެ މީޑިޔާތަކުން ރިޕޯޓު ކުރެއެވެ. މީގެ ކުރިން ވެސް މިޞްރުގައި މި ފަދަ ހާދިސާތައް ހިނގައި، ގިނަ ޢަދަދެއްގެ މީހުންގެ ފުރާނައަށް ނުރައްކާވެފައިވާ ކަން ފާހަގަކުރެވެއެވެ.