ރަޝިޔާއިން ކާބޯތަކެއްޗަކީ ބްލެކްމެއިލް ކުރަން ބޭނުންކުރާ ހަތިޔާރަކަށް ހަދާފައިވާ ކަމަށާއި، ރަޝިޔާގެ އަމަލުތަކާ އެކު ދުނިޔޭގެ އެކި ކަންކޮޅުތަކުގައި އެތަކެއް މިލިޔަން މީހުންނަށް ކާބޯތަކެތީގެ ރައްކާތެރިކަން ކަށަވަރު ކޮށްދޭން ހުރަސްތަކެއް ކުރިމަތިވާނެ ކަމުގައި ޔޫކްރެއިންގެ ރައީސް ވޮލޮޑޮމީރް ޒެލެންސްކީ ވިދާޅުވެއްޖެއެވެ. އޭނާ މިހެން ވިދާޅުވެފައި ވަނީ، ޔޫކްރެއިނުގައި އުފައްދާ ގޮވާމުގެ ބާވަތްތައް އެކްސްޕޯޓުކުރުމަށް ރަޝިޔާއާ އެކު ހަދާފައިވާ އެއްބަސްވުމުގެ މުއްދަތު އިތުރުކުރަން ރަޝިޔާއިން ދެކޮޅު ހެދުމާ ގުޅިގެންނެވެ.
2022 ވަނަ އަހަރުގެ ފެބުރުވަރީ މަހުގެ 24 ވަނަ ދުވަހު ރަޝިޔާ ސިފައިން ޔޫކްރެއިނަށް އަރައި ހަނގުރާމަ ފެށުމުގެ ކުރިން ޔޫކްރެއިނަކީ ދުނިޔޭގެ ބާޒާރަށް އެންމެ ގިނައިން ގޮވާމުގެ ބާވަތްތައް ފޯރުކޮށްދޭ ޤައުމެވެ. ނަމަވެސް، ހަނގުރާމައާ އެކު އެ ކަމަށް ހުރަސްއެޅި، ދުނިޔޭގެ ބާޒާރުތަކުގައި ކާބޯތަކެތީގެ އަގުތައް އިންތިހާއަށް އުފުލި، އެތަކެއް މިލިޔަން މީހުންނަށް ކާބޯތަކެތީގެ ރައްކާތެރިކަން ކަށަވަރުކޮށްދޭން ހުރަސްތައް ކުރިމަތިވިއެވެ.
ޔޫކްރެއިނުގައި އުފައްދާ ގޮވާމުގެ ބާވަތްތައް އެކްސްޕޯޓު ކުރުން އަލުން ފެށުމަށް ރަޝިޔާއިން ހުއްދަ ދީފައި ވަނީ 2022 ވަނަ އަހަރުގެ ޖުލައި މަހުއެވެ. އެ ކަމާ ގުޅޭ ގޮތުން އެއްބަސްވުމެއް އެކުލަވައިލާފައި ވަނީ ތުރުކީވިލާތުގެ ބައިވެރިވުމާ އެކު އ.ދއިންނެވެ. އެ އެއްބަސްވުމުގެ މުއްދަތު މި ޖުލައި މަހު ހަމަވެފައިވާއިރު، ރަޝިޔާއިން ވަނީ އެއްބަސްވުމުގެ މުއްދަތު އިތުރުކުރަން ދެކޮޅު ހަދާފައެވެ.
މި ކަމާ ގުޅޭ ގޮތުން ވާހަކަފުޅު ދައްކަވަމުން ޒެލެންސްކީ ވިދާޅުވީ، ކާބޯތަކެތީގެ ރައްކާތެރިކަން ކަށަވަރުކޮށްދިނުމަށް ހުރަސް އެޅުމަކީ އެއްވެސް ޤައުމަކަށް ލިބިގެންވާ ހައްޤެއް ނޫން ކަމުގައެވެ. އަދި، އެ ފަދަ އަމަލެއް ހިންގުމަކީ ބްލެކްމެއިލް ކުރުމުގެ ކުށެއް ކަމަށާއި، ރަޝިޔާގެ ބައިވެރިވުމާ ނުލައި ވެސް ޔޫކްރެއިނުން އެ ޤައުމުގައި އުފައްދާ ގޮވާމުގެ ބާވަތްތައް އެކްސްޕޯޓު ކުރުމުގެ މަސައްކަތް ހުއްޓައިނުލައި ކުރިއަށް ގެންދަން ޖެހޭ ކަމުގައެވެ.
ޔޫކްރެއިނުން ފޯރުކޮށްދޭ ގޮވާމުގެ ބާވަތްތަކަށް ދުނިޔޭގެ އެކި ކަންކޮޅުތަކުން 400 މިލިޔަނަށް ވުރެ ގިނަ މީހުން ބަރޯސާވެފައިވާ ކަމަށާއި، ކާބޯތަކެތި ފަދަ ޒަރޫރީ ހައްޤެއް ނިގުޅައިގަތުމުގެ ފުރުޞަތު ރަޝިޔާއަށް ދީގެން ނުވާނެ ކަމުގައި ވެސް އޭނާ ވިދާޅުވިއެވެ. "އެންމެންނަށް ވެސް ހަމަޖެހިގެން ދިރިއުޅުމުގެ ހައްޤު އޮންނާނެ. އެއީ އެފްރިކާ ރައްޔިތުން ވިޔަސް، އޭޝިޔާ ރައްޔިތުން ވިޔަސް، ވިލާތުގެ ރައްޔިތުން ވިޔަސް ވާނީ ހަމަހަމަ. އެހެންވީމަ، ރަޝިޔާގެ މޮޔަކަމުން މުޅި ދުނިޔެ ރައްކާތެރިކުރަން ޖެހޭ،" ޒެލެންސްކީ ވިދާޅުވިއެވެ.
އަދި، ރަޝިޔާގެ އެހީތެރިކަމާ ނުލައި ވެސް ޔޫކްރެއިނާއި ތުރުކީވިލާތުގެ އިތުރުން އ.ދއަށް ގޮވާން އެކްސްޕޯޓު ކުރުމާ ގުޅޭ އެއްބަސްވުން ދެމެހެއްޓޭނެ ކަމުގައި ވެސް ޒެލެންސްކީ ވިދާޅުވިއެވެ. އަދި، އެ ކަން ކުރެވޭނީ "ޓެރެރިޒަމަށް ހިތްވަރުދޭ" ރަޝިޔާއަށް ފިއްތުންތައް ކުރިމަތިކޮށްގެން ކަމުގައި ވެސް އޭނާ ވިދާޅުވިއެވެ.
އެއްބަސްވުމުގެ މުއްދަތު އިތުރުކުރަން ރަޝިޔާއިން ދެކޮޅު ހެދުމުން ދުނިޔޭގެ އެކި ކަންކޮޅުތަކުން ދަނީ އެ ޤައުމަށް ފާޑުކިޔުންތައް އަމާޒު ކުރަމުންނެވެ. މި ކަމާ ގުޅޭ ގޮތުން އ.ދގެ ސެކްރެޓަރީ ޖެނެރަލް އެންޓޯނިޔޯ ގުތެރޭޝް ވިދާޅުވީ، ރަޝިޔާއިން ހުރަސް އަޅާފައި އެ ވަނީ އެތަކެއް ސަތޭކަ މިލިޔަން ބަޔެއްގެ ދިރިހުރުމަށް ކަމުގައެވެ. އަދި، ރަޝިޔާގެ އަމަލުތަކާ މެދު ކަންބޮޑުވުން ފާޅުކުރައްވައި އޭނާ ވަނީ ރައީސް ވްލަޑިޔަރ ޕުޓިންއަށް ސިޓީފުޅެއް ވެސް ފޮނުއްވާފައެވެ.
މި ކަމާ ގުޅޭ ގޮތުން ކްރެމްލިންގެ ތަރުޖަމާނު ދްމީތްރީ ޕިސްކޯފް ވިދާޅުވީ އެއްބަސްވުމަށް އަލުން ރުޖޫއަ ވާނީ ރަޝިޔާގެ ބޭނުންތައް ވެސް ހާސިލުވުމުން ކަމުގައެވެ. އަދި، ރަޝިޔާގެ ޝަރުޠުތަކަށް އިހުތިރާމު ކުރުމުން ކަމުގައެވެ. އެ ޝަރުޠުތަކުގެ ތެރޭގައި ރަޝިޔާގައި އުފައްދާ ކާބޯތަކެއްޗާއި، ގަސްކާނާއާއި އެހެނިހެން މުދާ ބޭރުކުރުމަށް ހުރި ހުރަސްތައް ނައްތައިލުން ހިމެނެއެވެ.