ޔޫކްރެއިނަށް އަރައި ރަޝިޔާ ސިފައިން ކުރަމުންދާ ހަނގުރާމައާ ގުޅިގެން ހާލުގައި ޖެހިފައިވާ ޔޫކްރެއިން ރައްޔިތުންނަށް އެހީތެރިކަން ފޯރުކޮށްދޭން 150 މިލިޔަން އެމެރިކާ ޑޮލަރުގެ އެހީ ފޯރުކޮށްދޭނެ ކަން ދެކުނު ކޮރެޔާގެ ރައީސް ޔުން ސޮންގްޔޮއި ހާމަކުރައްވައިފިއެވެ. އޭނާ މި ކަން ހާމަކުރައްވާފައި ވަނީ ޔޫކްރެއިންގެ ވެރިރަށް ކީވަށް ކުރެއްވި ދަތުރުފުޅެއްގައި އެ ޤައުމުގެ ރައީސް ވޮލޮޑޮމީރް ޒެލެންސްކީއާ ބައްދަލުކުރައްވައި ވާހަކަފުޅު ދައްކަވަމުންނެވެ.
ރަޝިޔާ-ޔޫކްރެއިން ހަނގުރާމައަށް 17 މަސް ފުރިފައިވާއިރު، މިއީ ހަނގުރާމަ ފެށި ފަހުން ސޮންގްޔޮއި ޔޫކްރެއިނަށް ދަތުރުފުޅެއް ކުރެއްވި ފުރަތަމަ ފަހަރެވެ. އޭނާއާ އެކު އޭނާގެ އަނބިކަނބަލުން ވެސް ޔޫކްރެއިނަށް ވަޑައިގެންނެވި ކަމުގައި ދެކުނު ކޮރެޔާއިން ބުނެއެވެ. ސޮންގްޔޮއި ޔޫކްރެއިނަށް ވަޑައިގަންނަވާފައި ވަނީ ލިތުއޭނިޔާގެ ވެރިރަށް ވިލްނިޔަސްގައި ބޭއްވި ނޭޓޯގެ މެންބަރު ޤައުމުތަކުގެ އިސްވެރިންގެ ބައްދަލުވުމަށް ފަހުގައެވެ.
ސޮންގްޔޮއިއާ އެކު ބޭއްވެވި ބައްދަލުވުމުގައި ޒެލެންސްކީ ވަނީ ޔޫކްރެއިންގެ ރައްޔިތުންނާ މެދު އޭނާ ބަހައްޓަވާ ގާތްކަމާއި، ފޯރުކޮށްދެއްވަމުން ގެންދަވާ އެހީތެރިކަމަށް ޝުކުރު އަދާކުރައްވާފައެވެ. އަދި، ޔޫކްރެއިންގެ މިނިވަންކަމާއި ސިޔާދަތު ހިމާޔަތް ކުރަން ޔޫކްރެއިންގެ ފައުޖުތަކުން ކުރަމުންދާ ހަނގުރާމައިގައި އެ ޤައުމަށް ދެއްވަމުން ގެންދަވާ އެއްބާރުލެއްވުމާއި، ތާޢީދަށް ވެސް އޭނާ ސޮންގްޔޮއިއަށް ޝުކުރު އަދާކުރެއްވިއެވެ.
ދެ ބޭފުޅުންގެ މަޝްވަރާތަކުގައި ހަނގުރާމަ ނިމުމަކަށް ގެނެސް ޔޫކްރެއިންގެ ރައްޔިތުންނަށް ޢާންމު ދިރިއުޅުމަކަށް ރުޖޫއަވުމުގެ ފުރުޞަތު ހޯދައިދިނުމާ ގުޅޭ ގޮތުން ވާހަކަފުޅު ދައްކަވާފައިވާ ކަމުގައި ޒެލެންސްކީ ވިދާޅުވިއެވެ. ހުސްވި އަހަރުގެ ތެރޭގައި ދެކުނު ކޮރެޔާއިން ވަނީ 100 މިލިޔަން ޑޮލަރުގެ އެހީ ޔޫކްރެއިނަށް ފޯރުކޮށްދީފައެވެ. އަދި، މި އަހަރު އިތުރު 150 މިލިޔަން ޑޮލަރުގެ އެހީ ފޯރުކޮށްދޭނެ ކަމުގައި ސޮންގްޔޮއި ވިދާޅުވިއެވެ.
ނަމަވެސް، ދެކުނު ކޮރެޔާއިން ޔޫކްރެއިނަށް ފޯރުކޮށްދެމުން ދަނީ އިންސާނީ އެހީތެރިކަން ކަން ފާހަގަކޮށްލަން ޖެހެއެވެ. އަދި، ޔޫކްރެއިނަށް ހަތިޔާރާއި އަސްކަރީ އެހީތެރިކަން ފޯރުކޮށްދޭން ދެކުނު ކޮރެޔާއިން ދަނީ ދެކޮޅު ހަދަމުންނެވެ. ޔޫކްރެއިނަށް ހަތިޔާރާއި އަސްކަރީ އެހީތެރިކަން ފޯރުކޮށްދޭން އެމެރިކާއާއި ހުޅަނގުގެ ބާރުތަކުން ދަނީ ދެކުނު ކޮރެޔާއަށް ބާރު އަޅަމުންނެވެ. ނަމަވެސް، ސޮންގްޔޮއި އެ ކަމަށް އެއްބަސްވެ ވަޑައިގަންނަވާފައެއް ނުވެއެވެ.
އެޓްލާންޓިކް އަދި އިންޑޯ-ޕެސިފިކް ސަރަޙައްދުގެ ސުލްޙަމަސަލަސް ކަން ގުޅިފައިވާ ކަމަށާއި، ސުލްޙައާއި ހަމަޖެހުން ދަމަހައްޓަން ގިނަގުނަ މަސައްކަތްތަކެއް ކުރަންޖެހޭ ކަމުގައި ޔޮންގްސޮއި ވިދާޅުވިއެވެ. އަދި، ރަޝިޔާ-ޔޫކްރެއިން ހަނގުރާމައިގެ ސަބަބުން ސަރަޙައްދީ ހަމަޖެހުމަށް ނުރައްކާވެފައިވާ ކަން ފާހަގަކުރައްވައި، އެ ކަމުގެ ނޭދެވޭ އަސަރު މުޅި ދުނިޔެއަށް ކުރަމުންދާ ކަމުގައި ވެސް ސޮންގްޔޮއި ވިދާޅުވިއެވެ.
ޔޫކްރެއިނަށް ސޮންގްޔޮއި ކުރެއްވި ދަތުރުފުޅުގައި ވެރިރަށް ކީވް ކައިރީގައި އޮންނަ ދެ ރަށް ކަމުގައިވާ ބޫޗާއާއި އިރްޕިޔެނަށް ވެސް އޭނާ ޒިޔާރަތް ކުރެއްވިއެވެ. އަދި، ހަނގުރާމައިގައި މަރައިލާފައިވާ ގިނަ ޢަދަދެއްގެ ބަޔަކު ވަޅުލާފައިވާ ސަރަޙައްދުތަކަށް ވަޑައިގެންނެވިއެވެ. ހަނގުރާމައަށް ފަހު ސުންނާފަތިވެފައިވާ ޔޫކްރެއިންގެ ރަށްތައް އަލުން އާރާސްތުކުރަން އެހީތެރިކަން ފޯރުކޮށްދޭނެ ކަމުގައި ދެކުނު ކޮރެޔާއިން ވަނީ ބުނެފައެވެ. އަދި، އެ ކަމާ ގުޅޭ އެއްބަސްވުންތައް މިހާރު ވެސް އެކުލަވައިލާފައިވާ ކަމުގައި ދެކުނު ކޮރެޔާގެ ބިމާ ބެހޭ ވުޒާރާއިން ބުނެއެވެ.