ދެކުނު ކޮރެޔާގެ ސަރަޙައްދުތަކަށް ކުރަމުންދާ ބޯ ވިއްސާރައިގައި އެއްގަމު އުޅަނދުފަހަރު ދަތުރުކުރާ ޓަނަލެއްގައި ފެންބޮޑުވެ، ގިނަ ޢަދަދެއްގެ އުޅަނދުފަހަރު އެ ތަނުގެ ތެރޭގައި ތާށިވެ އަށް މީހުން މަރުވެއްޖެއެވެ. ޓަނަލުގެ ތެރޭގައި ތާށިވި އުޅަނދުފަހަރުގެ ތެރޭގައި އިތުރު ބަޔަކު ތާށިވެފައިވާ ކަމަށް ބެލެވޭ ކަމުގައި އެ ޤައުމުގެ އޮފިޝަލުން ވިދާޅުވިއެވެ. އެ މީހުން ދިރިތިއްބާ ސަލާމަތް ކުރެވޭތޯ ދަނީ މަސައްކަތް ކުރަމުންނެވެ.
މި ހާދިސާ ހިނގާފައި ވަނީ އުތުރު ޗުންގްޗޮންގް ޕުރޮވިންސުގެ ރަށެއް ކަމުގައިވާ ޗޮންގްޖޫގައި އޮންނަ އޫސޮންގް ކިޔާ ޓަނަލެއްގައެވެ. 685 މީޓަރު ދިގު އެ ޓަނަލު އޮންނަނީ މީހޯ ކޯރު ކައިރީގައެވެ. ކުއްލިއަކަށް ފެންގަނޑު ބޮޑުވުމާ ގުޅިގެން އެ ޓަނަލުގެ ތެރޭގައި 15 އުޅަނދު ތާށިވި ކަމަށް ބެލެވޭ ކަމުގައި އޮފިޝަލުން ވިދާޅުވެއެވެ. އޭގެ ތެރޭގައި ފަސިންޖަރުން އުފުލާ ބަހެއް ވެސް ހިމެނެއެވެ.
ޓަނަލުގައި ކުއްލިއަކަށް ފެންބޮޑުވެފައި ވަނީ ބޯކޮށް ވާރޭވެހި، މީހޯ ކޯރުގެ ފެންގަނޑު ކުއްލިއަކަށް ބަންޑުންވުމާ ގުޅިގެން ކަމުގައި ޗޮންގްޖޫގެ އޮފިޝަލުން ވިދާޅުވެއެވެ. ދެކުނު ކޮރެޔާއަށް މިހާރު ކުރަމުންދާ ބޯ ވިއްސާރައިގެ ސަބަބުން ޗުންގްޗޮންގުގެ ބޮޑު ސަރަޙައްދެއްގައި ފެންބޮޑުވެފައިވާއިރު، ބައެއް ސަރަޙައްދުތަކުގައި ބިންގަނޑު ވެސް ވަނީ ކެނޑިފައެވެ. އަދި، ބައެއް ހިސާބުތަކަށް ކިސަޑު ފައިބާ، ގިނަ ޢަދަދެއްގެ ޢިމާރާތްތަކާއި، މަގުތަކާއި ޢުމްރާނީ ވަސީލަތްތަކަށް ގެއްލުންވިއެވެ.
މި ހާދިސާގައި ޓަނަލުގެ ތެރޭގައި ތާށިވި އުޅަނދުފަހަރުގެ ތެރެއިން ނުވަ ވަރަކަށް މީހުން ސަލާމަތް ކުރެވުނު ކަމުގައި އޮފިޝަލުން ވިދާޅުވެއެވެ. ޓަނަލުގެ ތެރޭގައި ތާށިވެފައި ވަނީ ފަސިންޖަރުން އުފުލާ ބަހަކާއި 12 ވަރަކަށް ކާރު ކަމަށް ބެލެވެއެވެ. މި ހާދިސާއާ އެކު، ދެކުނު ކޮރެޔާއަށް ކުރަމުންދާ ވިއްސާރައިގައި މަރުވި މީހުންގެ ޢަދަދު މިހާރު ވަނީ 35އަށްވުރެ މައްޗަށް އަރާފައެވެ. އަދި، ގެއްލިފައިވާ ކަމަށް ބެލެވޭ 10 މީހަކު ހޯދަން އޮފިޝަލުން ދަނީ މަސައްކަތް ކުރަމުންނެވެ.
މޫސުން ގޯސްވުމުގެ ސަބަބުން އެންމެ ބޮޑަށް އަސަރުކޮށްފައިވާ ސަރަޙައްދުތަކުގެ ތެރޭގައި އުތުރު ޗޮންގްސަންދޯ ޕުރޮވިންސް ވެސް ހިމެނެއެވެ. އެ ޕުރޮވިންސުން މަރުވެފައިވާ މީހުންގެ ޢަދަދު 17 އަށް އަރާފައިވާއިރު، ގެއްލިފައިވާ ކަމަށް ބެލެވޭ އިތުރު ނުވަ މީހުން ހޯދަން އޮފިޝަލުން ދަނީ މަސައްކަތް ކުރަމުންނެވެ. އެ ޕުރޮވިންސުގައި ގިނަ ޢަދަދެއްގެ ބަޔަކު މަރުވީ ބިންގަނޑު ކެނޑި، ކިސަޑު ފޭބުމުގެ ސަބަބުންނެވެ.
ބޯކޮށް ވާރޭވެހުމާ ގުޅިގެން އަސަރުކޮށްފައިވާ ސަރަޙައްދުތަކުގައި ދިރިއުޅޭ 5,570 އަށްވުރެ ގިނަ މީހުން މިހާރު ވަނީ ރައްކާތެރި ހިސާބުތަކަށް ބަދަލުކޮށްފައެވެ. އޭގެ ތެރެއިން 4,200އަށްވުރެ ގިނަ މީހުން ބަދަލުކޮށްފައި ވަނީ ވަގުތީ ހިޔާތަކަށެވެ. އަދި، ޗުންގްޗޮންގުގައި ދިރިއުޅޭ އެތަކެއް ހާސް ބަޔަކު ރައްކާތެރި ކަމުގެ ހިސާބުތަކަށް ބަދަލުވާން އެ ޤައުމުގެ މޫސުމާ ބެހޭ އިދާރާއިން ވަނީ އިރުޝާދުދީފައެވެ. ބޯކޮށް ވާރޭވެހުމާ އެކު ފެންބޮޑުވެގެން އެކި ސަރަޙައްދުތަކުގައި ގިނަ ޢަދަދެއްގެ މަގުތައް ބަންދުވެފައިވާއިރު، މޫސުން ގޯސްވެ ވައިގެ ދަތުރުފަތުރަށް ވެސް ވަނީ ހުރަސް އެޅިފައެވެ. މި ގޮތުން، 20 ވަރަކަށް ފްލައިޓް ކެންސަލް ކުރަން ޖެހިފައިވާ ކަމަށް އޮފިޝަލުން ވިދާޅުވެއެވެ.
ދެކުނު ކޮރެޔާގެ މޫސުމާ ބެހޭ އިދާރާއިން ބުނީ ކުރިއަށް އޮތް ދުވަސްތަކުގައި ވެސް އެ ޤައުމުގެ އެކި ކަންކޮޅުތަކަށް މޫސުން ގޯސްވެ، ބޯކޮށް ވާރޭވެހޭނެ ކަމަށް ބެލެވޭ ކަމުގައެވެ. ހޫނު މޫސުގައި ކުރާ ވިއްސާރައަށް ދެކުނު ކޮރެޔާއިން ޢާންމު ގޮތެއްގައި އޮންނަނީ ތައްޔާރަށެވެ. އަދި، މޫސުން ގޯސްވުމާ ގުޅިގެން މީހުންގެ ފުރާނައަށް ނުރައްކާވާ މިންވަރު ކުޑަކުރަން ފިޔަވަޅުތަކެއް އަޅައެވެ. ނަމަވެސް، ހުސްވި 2022 ވަނަ އަހަރުގެ ހޫނު މޫސުގައި އެ ޤައުމަށް ކުރި ވިއްސާރައާ ގުޅިގެން ވެސް 11 ވަރަކަށް މީހުން މަރުވިއެވެ.