ދެކުނު ކޮރެޔާއަށް މިހާރު ކުރަމުންދާ ވިއްސާރައިގައި ހިނގި އެކި ހާދިސާތަކުގައި ހަތް މީހުން މަރުވެ، އިތުރު ބަޔަކު ގެއްލިއްޖެއެވެ. ބޯކޮށް ވާރޭވެހުމާ ގުޅިގެން ދެކުނު ކޮރެޔާގެ ބައެއް ސަރަޙައްދުތަކުގައި ވަނީ ފެންބޮޑުވެފައެވެ. އަދި، ބައެއް ހިސާބުތަކުގެ ބިންގަނޑު ކެނޑި، ކިސަޑު ފޭބުމުގެ ހާދިސާތައް ހިނގާފައިވެއެވެ.
މި ހާދިސާތަކުގައި މަރުވެފައިވާ މީހުންގެ ޢަދަދު ހަތަކަށް އަރާފައިވާއިރު، ގެއްލިފައިވާ ކަމަށް ބެލެވޭ ތިން މީހަކު ހޯދުމަށް އޮފިޝަލުން ދަނީ މަސައްކަތް ކުރަމުންނެވެ. މި ހާދިސާތަކުގައި އިތުރު ހަތް މީހަކަށް އަނިޔާވެގެން ހޮސްޕިޓަލުގައި ފަރުވާދޭން ޖެހުނު ކަމުގައި އެ ޤައުމުގެ ދާޚިލީ ވުޒާރާއިން ބުނެއެވެ.
ވިއްސާރައިގެ އަސަރު އެންމެ ބޮޑަށް ކުރަނީ އުތުރު ޗުންގްޗޮންގް ޕުރޮވިންސަށެވެ. މެދުކެނޑުމެއް ނެތި ތިން ދުވަސް ވަންދެން ބޯކޮށް ވާރޭވެހުމާ ގުޅިގެން އެ ޕުރޮވިންސުގެ ކޯރަކާއި ޑޭމެއް ފުރިގެން ބަންޑުންވެ، ބޮޑު ސަރަޙައްދެއްގައި ފެންބޮޑުވެފައިވާ ކަމުގައި އޮފިޝަލުން ވިދާޅުވިއެވެ.
ފެންބޮޑުވުމުގެ އަސަރުކޮށްފައިވާ ސަރަޙައްދުތަކުގައި ދިރިއުޅޭ 1,567 މީހުން މިހާރު ވެސް ރައްކާތެރި ހިސާބުތަކަށް ބަދަލުކޮށްފައިވާއިރު، ރައްކާތެރި ހިސާބުތަކަށް ބަދަލުވުމަށް އިތުރު 7,000 މީހުންނަށް ވަނީ އިރުޝާދުދީފައެވެ. ފެންބޮޑުވުމާ ގުޅިގެން ގިނަ ޢަދަދެއްގެ ބަޔަކު ގެދޮރުގައި ތާށިވެފައިވާއިރު، ބޮޑުވަޒީރު ހަން ޑޮކް-ސޫގެ އެންގެވުމަށް އެ ޤައުމުގެ އަސްކަރިއްޔާއިން ވެސް މިހާރު ދަނީ އެ މީހުން ސަލާމަތްކުރަން މަސައްކަތް ކުރަމުންނެވެ.
ފެންބޮޑުވުމާއި ބައެއް ސަރަޙައްދުތަކުގެ ބިންގަނޑު ކެނޑި، ކިސަޑު ފޭބުމާ ގުޅިގެން ބައެއް ހިސާބުތަކުގައި ރޭލު ދަތުރުފަތުރަށް ވަނީ ހުރަސްއެޅިފައެވެ. ބިންގަނޑު ކެނޑުމާ ގުޅިގެން އެއް ރޭލު، ދަގަނޑު މަތިން ބޭރަށް ވެއްޓިފައިވާ ކަމުގައި އެ ޤައުމުގެ ދަތުރުފަތުރާ ބެހޭ ވުޒާރާއިން ބުންޏެވެ. މި ހާދިސާގައި ރޭލުގައި އިން އިންޖިނޭރަށް އަނިޔާވި ނަމަވެސް، އެއްވެސް ފަސިންޖަރެއްގެ ފުރާނައަށް ނުރައްކާވެފައި ނުވާ ކަމުގައި އެ ވުޒާރާއިން ބުނެއެވެ.