ޔޫކްރެއިންގައި އުފައްދާ ގޮވާމުގެ ބާވަތްތައް އެކްސްޕޯޓު ކުރުމާ ގުޅޭ ގޮތުން ރަޝިޔާއާ އެކު ހަދާފައިވާ އެއްބަސްވުން ދަމަހައްޓައި، މުއްދަތު އިތުރުކުރުމަށް ދެ ފަރާތާ މަޝްވަރާ ކުރަމުންދާ ކަމުގައި ތުރުކީވިލާތުގެ ރައީސް ރަޖަބް ޠައްޔިބް އުރުދުޣާން ވިދާޅުވެއްޖެއެވެ. އޭނާ މި ކަން ހާމަކުރައްވާފައި ވަނީ ލިތުއޭނިޔާގެ ވިލްނިޔަސްގައި ބޭއްވި ނޭޓޯގެ މެންބަރު ޤައުމުތަކުގެ އިސްވެރިންގެ ސަމިޓުގެ ހަވާސާގައި ވާހަކަފުޅު ދައްކަވަމުންނެވެ.
2022 ވަނަ އަހަރުގެ ފެބުރުވަރީ މަހުގެ 24 ވަނަ ދުވަހު ރަޝިޔާ ސިފައިން ޔޫކްރެއިނަށް އަރައި ފެށި ހަނގުރާމައާ އެކު ޔޫކްރެއިންގައި އުފައްދާ ގޮވާމުގެ ބާވަތްތައް އެ ޤައުމުން ބޭރު ކުރުމަށް ވެސް ރަޝިޔާއިން ވަނީ ހުރަސް އަޅާފައެވެ. ޔޫކްރެއިން ގޮވާން އެކްސްޕޯޓް ކުރުމުގެ ފުރުޞަތު ރަޝިޔާއިން ދީފައި ވަނީ ތުރުކީވިލާތާއި އ.ދއިން މެދުވެރިއެއްގެ ދައުރު އަދާކޮށްގެން އެކުލަވައިލި އެއްބަސްވުމެއްގެ ދަށުންނެވެ. އެއީ 2022 ވަނަ އަހަރުގެ ޖުލައި މަހުއެވެ.
އެއްބަސްވުމުގެ މުއްދަތު ޖުލައި 17 ވަނަ ދުވަހު ހަމަވުމުގެ ކުރިން އެއްބަސްވުން ދަމަހައްޓައި، އޭގެ މުއްދަތު އިތުރު ކުރަން އުރުދުޣާން ގެންދަވަނީ މަސައްކަތް ކުރައްވަމުންނެވެ. އޭނާ ވިދާޅުވީ، ރަޝިޔާގެ ރައީސް ވްލަޑިމިޔަރ ޕުޓިންއާއި ޔޫކްރެއިންގެ ރައީސް ވޮލޮޑޮމީރް ޒެލެންސްކީއާ މި ކަމާ ގުޅޭ ގޮތުން މަޝްވަރާ ކުރައްވަމުން ގެންދަވާ ކަމުގައެވެ.
ޔޫކްރެއިނަކީ ދުނިޔޭގެ ބާޒާރަށް އެންމެ ގިނައިން ގޮވާމުގެ ބާވަތްތައް ފޯރުކޮށްދޭ ޤައުމެވެ. ނަމަވެސް، ހަނގުރާމަ ފެށުމާ ގުޅިގެން އެ ކަމަށް ހުރަސްއެޅި، ދުނިޔޭގެ ބާޒާރުގައި ތަކެތީގެ އަގުތައް އުފުލިގެން ދިޔައެވެ. ޚާއްޞަ ގޮތެއްގައި ގޮވާމާއި އެހެނިހެން ކާބޯތަކެތީގެ ބާވަތްތަކުގެ އަގުތައް އިންތިހާއަށް އުފުލި، ދުނިޔޭގެ އެކި ކަންކޮޅުތަކުގައި އެތަކެއް މިލިޔަން މީހުންނަށް ކާބޯތަކެތީގެ ރައްކާތެރިކަން ކަށަވަރުކޮށްދޭން ގޮންޖެހުންތަކާ ކުރިމަތިވިއެވެ.
"އެއްބަސްވުން އިތުރަށް ދަންމައިލަން، ނުވަތަ މުއްދަތު އިތުރުކުރަން ޒެލެންސްކީ ބޭނުންފުޅުވެ ވަޑައިގަންނަވާ. ނަމަވެސް، އެއްބަސްވުމަށް ބައެއް ބަދަލުތައް ގެންނަވަން ޕުޓިން ބޭނުންފުޅުވެ ވަޑައިގަންނަވާ. އެ ބަދަލުތަކާ މެދު މި ދަނީ ދެ ބޭފުޅުންނާ ވެސް މަޝްވަރާ ކުރަމުން،" އުރުދުޣާން ވިދާޅުވިއެވެ.
ރަޝިޔާއިން ހިތްހަމަނުޖެހިގެން އުޅޭ އެއް ސަބަބަކީ، ޔޫކްރެއިނުން ގޮވާން އެކްސްޕޯޓު ކުރުމުގެ ފުރުޞަތު ފަހިވެފައި އޮތް ނަމަވެސް، ރަޝިޔާގައި އުފައްދާ ކާބޯތަކެއްޗާއި ގަސްކާނާ ބޭރުކުރަން އަދިވެސް ހުރަސްތަކެއް ކުރިމަތިވުން ކަމުގައި މަސްރަޙު ދިރާސާ ކުރާ ފަރާތްތަކުން ބުނެއެވެ.
މި އެއްބަސްވުމުގެ ދަށުން ޔޫކްރެއިނުން ބޭރުކޮށްފައިވާ ގޮވާމާއި އެހެނިހެން ކާބޯތަކެތީގެ ބަރުދަން 32 މިލިޔަން ޓަނަށް އަރާ ކަމުގައި އޮފިޝަލުން ވިދާޅުވެއެވެ. އެއްބަސްވުމުގެ މުއްދަތު ހަމަވާން ގާތްވެފައިވާ މި ދަނޑިވަޅުގައި ޔޫކްރެއިންގެ ގޮވާން އުފައްދާ ދަނޑުތަކުގައި ބޭނުންކުރާ ވަސީލަތްތަކަށް ރަޝިޔާއިން ޑްރޯން ހަމަލަތަކެއް ދީފައިވާ ކަމުގައި ޔޫކްރެއިނުން ތުހުމަތު ކުރެއެވެ. ހުސްވި ހަފުތާގައި ވެސް މި ފަދަ ހަމަލަތަކެއް ދީފައިވާ ކަމަށް ޔޫކްރެއިނުން ބުނަމުންދާއިރު ރަޝިޔާއިން މި ތުހުމަތުތަކަށް ރައްދުދީފައެއް ނުވެއެވެ.