މީމު އެއަރޕޯޓް މަޝްރޫއުގެ ބޮޑުބައި ނިމިއްޖެ

މީމު އެއަރޕޯޓް ތަރައްޤީކުރުމުގެ މަޝްރޫޢުގެ ބޮޑު ބައި ނިންމާލައިފިއެވެ.

މި ޕްރޮޖެކްޓް ކުރިއަށްގެންދާ އެމްޓީސީސީން ބުނީ، މީމު އެއަރޕޯޓް މަސައްކަތުގެ %60 މިހާރު މުޅިން ނިިމިފައިވާކަމަށެވެ.

މުލަކަތޮޅުގައި ތަރައްޤީކުރާ ފުރަތަމަ އެއަރޕޯޓަކީ، ރާއްޖޭގެ ރަށްރަށް ފަސޭހަ ވައިގެ ނިޒާމަކުން ގުޅާލުމަށް ކުރިއަށްގެންދާ މަޝްރޫޢުގެ ތެރެއިން ކުރިއަށްގެންދާ ވަރަށް މުހިންމު މަޝްރޫޢުއެކެވެ.

މި އެއަރޕޯޓްގެ މަސައްކަތް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ އެމްޓީސީސީއާއި ސަރުކާރުން ހަވާލުކުރެއްވީ، 2021ވަނަ އަހަރު އޮކްޓޯބަރު މަހުއެވެ.

މ.އަތޮޅު ވެރިކަންކުރާ ރަށް މުލީގައި އެއަރޕޯޓް ތަރައްޤީކުރަނީ ރަށު ފަޅުން އިތުރަށް 14 ހެކްޓަރުގެ ބިން ހިއްކައިގެނެވެ. އެގޮތުން ހިއްކާ ސަރަޙައްދުގެ ބައުންޑް ވޯލްގެ މަސައްކަތް ނިމި، މިހާރު ވަނީ ރަންވޭ ޙިމާޔަތްކުރުމަށް ޖަހާ ރިވެޓްމަންޓްވެސް ނިންމާފައެވެ. އެއީ 1812 މީޓަރުގެ ބޮޑުހިލައިގެ ތޮއްޓެކެވެ.

މިމަސައްކަތުގެ އިތުރުން އެއަރޕޯޓް ފަޔަރ ރޯޑް އަދި، ފަޔަރ ބިލްޑިން އިމާރާތުގެ ސަބްގްރޭޑް މަސައްކަތްތައްވެސް ނިމިފައިވާކަމަށް އެމްޓިސީސީން ބުނެއެވެ.

އެއަރޕޯޓްގެ ރަންވޭގައި ތާރު އެޅުމާއި ގުޅޭ މަސައްކަތްތައްވެސް މިހާރު ފަނީބފަށައިގެން ކުރިއަށެވެ. މިއީ 1200މީޓާރު ދިގު، 30 މީޓަރު ފުޅާ ރަންވޭއެކެވެ.

ރަންވޭގެ ޢަމަލީ މަސައްކަތްތައް ފެށީ އޭޕްރިލް މަހުގެ ފަހުކޮޅުއެވެ. އެގޮތުން ރަންވޭގެ ތާރު ފަށަލަ އެޅުމުގެ ކުރިން އަޅާ، އޭބީސީ ލޭޔަރގެ މަސައްކަތް މިހާރު ވަނީ ނިންމާފައެވެ. އަދި ވަނީ ތާރު އަޅަން ތައްޔާރުވެފައެވެ. މީމު އެއަރޕޯޓްގެ ރަންވޭގެ މަސައްކަތް އޮގަސްޓްމަހަށް ނިންމުމަށް މަސައްކަތް ކުރަމުންދާކަމަށް، އެމްޓީސީސީން މީގެ ކުރިން ވިދާޅުވެފައިވެއެވެ. އެގޮތުން އެއަރޕޯޓްގެ ޓަރމިނަލް ބިލްޑިންގެ މަސައްކަތްވެސް ވަނީ ފަށާފައެވެ.

މި މަޝްރޫޢުއަކީ 221 މިލިއަން ރުފިޔާގެ މަޝްރޫޢުއެކެވެ.

މީމު އެއަރޕޯރޓް ތަރައްޤީ ކުރުމުގެ މަޝްރޫޢުގެ މަސައްކަތުގެ 60 ޕަސެންޓް ނިމިއްޖެ. އަދި އެއަރޕޯރޓް ގޮނޑުދޮށުގައި ރިވެޓްމެންޓް ޖެހުމުގެ މަސައްކަތް ވަނީ ނިމިފައި. މީގެ އިތުރުން، ފަޔަރ ރޯޑާއި ފަޔަރ ޕެޑްގެ ސަބްގްރޭޑް މަސައްކަތްތައްވެސް ވަނީ ނިމިފައި.#MTCCProjects #RayyithungeKunfuni pic.twitter.com/MkecBt42Vb

— MTCC Plc (@MTCCPlc) July 10, 2023

މީމު އަތޮޅުގައި މީހުން ދިރިއުޅޭ 8 ރަށް އޮވެއެވެ. އެއީ ގާތްގަނޑަކުން 7000މީހުންގެ އާބާދީއެކެވެ. އާއްމުންނަށް ދަތުރުފަތުރުގައި ލިބޭ ފަސޭހައިގެ އިތުރުން، މި ޕްރޮޖެކްޓް ވެގެންދަނީ މުޅި އަތޮޅުގެ އިޤްތިޞާދާވެސް ވަރަށް ބޮޑަށް ގުޅިގައިވާ ޕްރޮޖެކްޓަކަށެވެ.

ރާއްޖޭގެ މީހުން ދިރިއުޅޭ ކޮންމެ ރަށަކުން 30 މިނެޓުގެ ތެރޭގައި ދަތުރުކޮށްފައި ދެވޭހާ ކައިރީގައި އެއަރޕޯޓެއް އޮތުމަތީ ސަރުކާރުގެ ވަޢުދެކެވެ.

މީމު އެއަރޕޯޓްގެ އިތުރުން އިތުރު ދެ އެއަރޕޯޓެއްގެ މަސައްކަތް އެމްޓީސީސީއިން އަންނަނީ ކުރަމުންނެވެ. އެއީ ފ.މަގޫދޫ އަދި ރ.އަލިފުށި އެއަރޕޯޓް މަޝްރޫޢުއެވެ.