ސޫރިޔާގެ އިރުމަތީގައިވާ ސަރަޙައްދުތަކުގައި ހަރަކާތްތެރިވާ އިސްލާމިކް ސްޓޭޓް (އައި.އެސް) ޖަމާޢަތުގެ އިސްވެރިޔާ މަރައިލާފައިވާ ކަން އެމެރިކާއިން ހާމަކޮށްފިއެވެ. އިރުމަތީ ސޫރިޔާގައި ހުންނަ އައި.އެސްގެ އެންމެ އިސްވެރިޔަކީ އުސާމާ އަލް-މުހާޖިރެވެ. އެމެރިކާގެ ސެންޓްރަލް ކޮމާންޑުން ބުނީ ޑްރޯން ހަމަލައެއްދީ އޭނާ މަރައިލާފައިވާނެ ކަމުގައެވެ.
އަލް-މުހާޖިރާ ގުޅޭ އިތުރު މަޢުލޫމާތު ޔޫ.އެސް ސެންޓްރަލް ކޮމާންޑުން ހާމަކޮށްފައި ނެތް ނަމަވެސް، އޭނާއަށް ހަމަލަދޭން ބޭނުންކޮށްފައި ވަނީ "އެމް-ކިޔު-9" މަރުކާގެ އަސްކަރީ ޑްރޯނެއް ކަމުގައި އެ ކޮމާންޑުން ބުންޏެވެ. އޭނާއަށް ހަމަލަދޭން ޑްރޯން އޮޕަރޭޝަން ހިންގަމުންދިޔަ ވަގުތު ރަޝިޔާގެ އަސްކަރީ މަތިންދާބޯޓަކުން އެ ޑްރޯނަށް ފުރައްސާރަ ކޮށްފައިވާ ކަމުގައި ވެސް އެ ކޮމާންޑުން ބުންޏެވެ.
ސޫރިޔާގައި ހަރަކާތްތެރިވާ އައި.އެސް ޖަމާޢަތުގެ އިސްވެރިންނާއި ޓެރެރިސްޓުންނަށް އަމާޒުކޮށްދޭ ހަމަލާތައް ހުސްވި އަހަރުން ފެށިގެން އެމެރިކާއިން ވަނީ އިތުރުކޮށް ވަރުގަދަކޮށްފައެވެ. އޮޕަރޭޝަންތައް ފުޅާކޮށް އެ ޖަމާޢަތުގެ އިސްވެރިންގެ ތެރެއިން ބައެއް މީހުން ޑްރޯން ހަމަލަތަކުގައި މަރައިލާފައިވާއިރު، އިތުރު ބަޔަކު ވަނީ ހައްޔަރުކޮށްފައެވެ.
ސޫރިޔާގެ ބޮޑު ސަރަޙައްދަކަށް އަތްގަދަކޮށްފައިވާ އައި.އެސް ޖަމާޢަތް އެ ސަރަޙައްދުތަކުން ފައްސައިލި ފަހުން އޭގެ ތެރެއިން ބައެއް ހަނގުރާމަވެރިން އެ ޤައުމުގެ އުތުރުގައިވާ ސަރަޙައްދުތަކަށް ވަނީ ފިލާފައެވެ. އެމެރިކާއިން އިސްވެ އުފެއްދި އަސްކަރީ ކޯލިޝަން ލަޝްކަރަކުން އައި.އެސްގެ ޓެރެރިސްޓުންނާ ދެކޮޅަށް ހަނގުރާމަ ފަށާފައި ވަނީ 2014 ވަނަ އަހަރުގެ ފަހުކޮޅުގައެވެ. އަދި އެ މީހުން އަތްގަދަކޮށްފައިވާ ބިންތަކުން ފައްސައިލާފައި ވަނީ 2019 ވަނަ އަހަރުއެވެ. އެ ޖަމާޢަތުގެ ޓެރެރިސްޓުން ފިލައިގެން އުޅޭ ސަރަޙައްދުތަކަކީ ތުރުކީވިލާތުން ވާގިވެރިވާ ހަތިޔާރު އެޅި ޖަމާޢަތްތަކުގެ ބާރުގެ ދަށުގައި އޮތް ހިސާބުތަކެކެވެ.
އައި.އެސް ޖަމާޢަތަކީ އަދިވެސް އެ ސަރަޙައްދުގެ ސަލާމަތާއި ހަމަޖެހުމަށް އޮތް ނުރައްކަލެއްގެ ގޮތުގައި އެމެރިކާއިން ސިފަކުރެއެވެ. ނަމަވެސް، އެ ޖަމާޢަތުގެ ބާރު ކަނޑުވައިލެވިފައިވާ ކަމަށް އެމެރިކާގެ އަސްކަރިއްޔާއިން ގަބޫލުކުރެއެވެ. އަދި، ޓެރެރިސްޓު ހަރަކާތްތައް އަލުން ފުޅާކުރަން އެ ޖަމާޢަތުން ކުރަމުންދާ މަސައްކަތްތަކަށް އެމެރިކާގެ އަސްކަރިއްޔާއިން ދަނީ ހުރަސް އަޅަމުންނެވެ. އެ ޖަމާޢަތުގެ އިސްވެރިން މަރަމުން ދަނީ އެ އޮޕަރޭޝަންގެ ދަށުންނެވެ.
އައި.އެސް ޖަމާޢަތުގެ އެންމެ ބާރުވެރި ދުވަސްވަރު އެ ޖަމާޢަތުން ދިޔައީ އިރާޤާއި ސޫރިޔާގެ ތިންބައިކުޅަ އެއްބައި ބިމަށް އަތްގަދަ ކުރަމުންނެވެ. އެ ސަރަޙައްދުތައް މިނިވަންކޮށް އެ ޖަމާޢަތުގެ ހަނގުރާމަވެރިން ފައްސައިލާފައިވީ ނަމަވެސް، އެ މީހުން އަދިވެސް ދަނީ ދޭތެރެދޭތެރެއިން ޓެރެރިސްޓު އަމަލުތައް ހިންގަމުންނެވެ.