300 ރެފިއުޖީންނާ އެކު ސެނެގޯލުން ފުރައިގެން ސްޕެއިނަށް ދަތުރުކުރަމުންދިޔަ ތިން ބޯޓެއް ކަނޑުވެ، އެ އުޅަނދުތަކުގައި ދަތުރު މީހުން ގެއްލިފައިވާ ކަމަށް ރެފިއުޖީންނަށް އެހީތެރިކަން ފޯރުކޮށްދޭ ޖަމުޢިއްޔާއަކުން ހާމަކޮށްފިއެވެ. ވޯކިންގ ބޯޑަރސް ޖަމުޢިއްޔާއިން ބުނީ ތިން ބޯޓު ވެސް ގެއްލިފައި ވަނީ ސެނެގޯލުން ފުރައިގެން ސްޕެއިންގެ ކެނެރީ އައިލެންޑްސްއަށް ދަތުރުކުރަމުން ދަނިކޮށް ކަމުގައެވެ.
ގެއްލިފައިވާ ތިން ބޯޓުގެ ތެރެއިން އެއް ބޯޓުގައި 65 މީހުން ތިބި ކަމަށާއި، ދެވަނަ ބޯޓުގައި 50އާއި 60އާ ދެމެދުގެ ޢަދަދަކަށް ރެފިއުޖީން ތިބި ކަމުގައި ވޯކިންގ ބޯޑަރސްއިން ބުނެއެވެ. އެ ދެ ބޯޓުގެ ޚަބަރެއް ނުވާތާ މިހާރު 15 ދުވަސް ފާއިތުވެއްޖެއެވެ. ތިންވަނަ ބޯޓުގައި 200އެއްހާ ރެފިއުޖީން ތިބި ކަމަށް ބެލެވޭ ކަމުގައި އެ ޖަމުޢިއްޔާގެ އިސް އޮފިޝަލެއް ކަމުގައިވާ އެލޭނާ މަލޭނޯ ވިދާޅުވިއެވެ. އެއީ ޖޫން 27 ވަނަ ދުވަހު ސެނެގޯލުން ފުރި ބޯޓެކެވެ.
މަލޭނޯ ވިދާޅުވީ އެ ބޯޓުތަކުގައި ދަތުރުކުރި މީހުންގެ ޢާއިލާތަކުން އެ މީހުންނާ ގުޅޭތޯ މަސައްކަތް ކުރަމުންދާ ކަމުގައެވެ. ނަމަވެސް، ތިން ބޯޓު ވެސް ފުރިފަހުން އެއްވެސް ޚަބަރެއްވެފައި ނުވާ ކަމުގައި އޭނާ ވިދާޅުވިއެވެ. އެ ތިން ބޯޓު ވެސް ފުރާފައި ވަނީ ސެނެގޯލްގެ ދެކުނުގައިވާ ކެފުންޓީނުންނެވެ. އެއީ، ކެނެރީ އައިލެންޑްސްގެ ތެނެރީފާ 1,700 ކިލޯމީޓަރު ދުރުގައި އޮންނަ ރަށެކެވެ.
"އެ މީހުން ސެނެގޯލް ދޫކޮށް ހިޖުރަކުރަން މަސައްކަތްކޮށްފައި ވަނީ އެ ޤައުމުގައި ހިނގަމުންދާ ދާޚިލީ ހަމަނުޖެހުންތަކުން ސަލާމަތްވާން. އެ 300އެއްހާ މީހުންގެ ޢާއިލާތަކުން ތިބީ ވަރަށް ބޮޑަށް ކަންބޮޑުވެފައި. އެއީ، ސެނެގޯލްގެ އެއް ރަށަކަށް ނިސްބަތްވާ ބައެއް،" މަލޭނޯ ވިދާޅުވިއެވެ.
އެފްރިކާ ބައްރުގެ ހުޅަނގުގައިވާ ޤައުމުތަކުގެ ރައްޔިތުންގެ ތެރެއިން ވިލާތުގެ ޤައުމުތަކަށް ހިޖުރަކުރާ ގިނަ ޢަދަދެއްގެ ރެފިއުޖީން ދަނީ މެޑިޓެރޭނިޔަން ކަނޑު ހުރަސްކޮށް ސްޕެއިނަށް ދަތުރު ކުރަމުންނެވެ. އޭގެ ތެރެއިން ގިނަ މީހުން ދަތުރު ކުރަނީ ކެނެރީ އައިލެންޑްސްއަށެވެ. ހޫނު މޫސުމަކީ މި ފަދަ ދަތުރުތަކުގެ ޢަދަދު އެންމެ ގިނަ މޫސުމެވެ.
ހުސްވި 2022 ވަނަ އަހަރު މެޑިޓެރޭނިޔަން ކަނޑު ހުރަސްކޮށް ކެނެރީ އައިލެންޑްސްއަށް ދަތުރުކުރަން މަސައްކަތްކުރި މީހުންގެ ތެރެއިން 559 މީހުން ކަނޑުވެގެން މަރުވެފައިވާ ކަމަށް ހިޖުރަކުރާ މީހުންނާ ބެހޭ އ.ދގެ އިދާރާ – އިންޓަރނޭޝަނަލް އޮގަނައިޒޭޝަން ފޯ މައިގްރޭޝަން (އައި.އެމް.އޯ)އިން ބުނެއެވެ. އޭގެ ތެރޭގައި 22 ކުޑަކުދިން ވެސް ހިމެނެއެވެ.