ރަޝިޔާ-ޔޫކްރެއިން ހަނގުރާމައަށް 500 ދުވަސް: ޒެލެންސްކީ ތުރުކީގެ އުރުދުޣާނާ ބައްދަލުކުރެއްވުން

ޔޫކްރެއިންގެ ރައީސް ވޮލޮޑޮމީރް ޒެލެންސްކީ ތުރުކީވިލާތުގެ އިސްތަންބޫލަށް ވަޑައިގަންނަވައި އެ ޤައުމުގެ ރައީސް ރަޖަބް ޠައްޔިބް އުރުދުޣާނާ ބައްދަލުކުރައްވައިފިއެވެ. ރަޝިޔާއިން ޔޫކްރެއިނަށް އަރައި ހަނގުރާމަ ފެށި ފަހުން 500 ދުވަސް ފާއިތުވެފައިވާއިރު ޒެލެންސްކީ ތުރުކީވިލާތަށް ކުރައްވަމުން ގެންދަވާ ދަތުރުފުޅުގެ މައިގަނޑު ބޭނުމަކީ ޔޫކްރެއިނުން ނޭޓޯގެ މެންބަރަކަށްވުމަށް ކުރަމުންދާ މަސައްކަތަށް ތުރުކީވިލާތުގެ އާނބަސް ހޯދުމެވެ.

ދެ ބޭފުޅުންގެ ބައްދަލުވުމުގައި ވާހަކަފުޅު ދައްކަވަމުން އުރުދުޣާން ވިދާޅުވީ، ޔޫކްރެއިނަކީ ނޭޓޯގެ މެންބަރަކަށް ހެދުމަށް އޭނާ ތާޢީދުކުރައްވާ ކަމުގައެވެ. އަދި، އަބަދުވެސް ސުލްޙަ އިސްކުރަން ޖެހޭ ކަމަށް ވިދާޅުވެ، އޭނާ ވަނީ ސުލްޙައިގެ މަޝްވަރާތައް ފެށުމަށް ދެ ޤައުމަށް ގޮވައިލައްވާފައެވެ.

"ޔޫކްރެއިނަށް ނޭޓޯގެ މެންބަރުކަން ދޭންޖެހޭ ކަމާ މެދު އެއްވެސް ޝައްކެއް ނެތް. ނަމަވެސް، ސުލްޙަވުމަކީ ދެ ފަރާތަށް ވެސް އޮތް އެންމެ ރަނގަޅު ހައްލު. ސުލްޙަވެގެން ގެއްލުންވާނެ އެއްވެސް ފަރާތެއް ނެތް،" އުރުދުޣާން ވިދާޅުވިއެވެ.

ޒެލެންސްކީ ވަނީ ނޭޓޯގެ މެންބަރަކަށްވުމަށް ޔޫކްރެއިނުން ކުރަމުންދާ މަސައްކަތަށް ތުރުކީވިލާތުން ތާޢީދުކުރާތީ އެ ކަމަށް ޝުކުރު އަދާކުރައްވާފައެވެ. ޔޫކްރެއިނަށް ނޭޓޯގެ މެންބަރުކަން ދިނުމަށް ތާޢީދުކުރައްވައި އުރުދުޣާން ވާހަކަފުޅު ދައްކަވާފައި މި ވަނީ، ލިތުއޭނިޔާގެ ވިލްނިއަސްގައި ނޭޓޯގެ ސަމިޓެއް ބޭއްވުމަށް ތައްޔާރީތައް ކުރަމުންދާ ދަނޑިވަޅެއްގައެވެ. އެ ސަމިޓު ފަށާނީ ޖުލައި 11 ވަނަ ދުވަހުއެވެ.

"ޔޫކްރެއިންގެ މިނިވަންކަމާއި ސިޔާދަތު ހިމާޔަތްކުރަން ކުރަމުންދާ މަސައްކަތްތަކަށް ތުރުކީވިލާތުން ދެމުންދާ އެއްބާރުލުމާއި ތާޢީދަށް ޝުކުރު ދަންނަވަން. އަދި، ސުލްޙަ އިސްކޮށް، ޔޫކްރެއިނާއި، ޔޫކްރެއިންގެ ރައްޔިތުންނާއި، ޔޫކްރެއިންގެ މަސްލަޙަތު ހިމާޔަތް ކުރުމަށް ތުރުކީވިލާތުން ދެމުންދާ ތާޢީދަށް ވެސް ޝުކުރު ދަންނަވަން،" ޒެލެންސްކީ ވިދާޅުވިއެވެ.

ތުރުކީވިލާތަށް ވަޑައިގެންނެވުމުގެ ކުރިން ޒެލެންސްކީ ވަނީ ނޭޓޯގެ ބައެއް މެންބަރު ޤައުމުތަކަށް ވެސް ޒިޔާރަތް ކުރައްވާފައެވެ. އަދި، ދުރުރާސްތާ ހަތިޔާރު ފޯރުކޮށްދިނުމަށް ނޭޓޯގެ މެންބަރު ޤައުމުތަކުގެ ކިބައިން އެދިވަޑައިގަންނަވާފައެވެ. ދުރުރާސްތާ ހަތިޔާރާ ނުލައި ރަޝިޔާގެ ފައުޖުތަކާ ދެކޮޅަށް ފަށާފައިވާ ކައުންޓަރއޮފެންސިވް ނުވަތަ ރައްދު ހަމަލާގެ އަސްކަރީ ކެމްޕޭން ކާމިޔާބު ކުރަން ދަތިވާނެ ކަމުގައި އޭނާ ދެކެވަޑައިގަންނަވައެވެ.

އޭނާ ތުރުކީވިލާތަށް ވަޑައިގަންނަވާފައި މި ވަނީ، ހަނގުރާމައިގެ މައިދާނުގެ ބޭނުންކުރުން ގިނަ ޤައުމުތަކުން މަނާކޮށްފައިވާ ނުރައްކާތެރި ކްލަސްޓަރ މިޔުނިޝަންސް ޔޫކްރެއިނަށް ފޮނުވަން އެމެރިކާއިން ނިންމައި، އެ ކަން އިޢުލާނު ކޮށްފައިވާ ދަނޑިވަޅެއްގައެވެ. ކްލަސްޓަރ ބޮން ބޭނުންކުރުން މަނާކުރުމުގެ މުޢާހަދާގައި މިހާތަނަށް ބައިވެރިވެފައި ނުވާ ޤައުމުތަކުގެ ތެރޭގައި ޔޫކްރެއިނާއި އެމެރިކާގެ އިތުރުން ރަޝިޔާ ވެސް ހިމެނެއެވެ. އެ މުޢާހަދާގައި 100 އަށްވުރެ ގިނަ ޤައުމުން ވަނީ ސޮއިކޮށްފައެވެ.

ކްލަސްޓަރ މިޔުނިޝަންސް ނުވަތަ ބޮމަކީ އެއް ފަހަރާ ބޮޑު ސަރަޙައްދަކަށް ހަމަލަދޭން ބޭނުންކުރެވޭ ނުރައްކާތެރި ހަތިޔާރެކެވެ. އޭގެ އެންމެ ބޮމެއް ބޭނުންކޮށްގެން ދޭ ހަމަލައެއްގެ އަސަރު ދޭއް ނުވަތަ ތިން ފުޓުބޯޅަ ދަނޑުގެ ސަރަޙައްދަކަށް ކުރާނެއެވެ. އެއީ، ގެއްލުންދެނިވި އަދި ފަނާކުރަނިވި ހަތިޔާރެއްގެ ގޮތުގައި ދުނިޔޭގެ ގިނަ ޤައުމުތަކާއި އިންސާނީ ހައްޤުތަކަށް ވަކާލާތުކުރާ ޖަމުޢިއްޔާތަކުން ގަބޫލުކުރެއެވެ.

އެމެރިކާގެ ރައީސް ޖޯ ބައިޑަން ވިދާޅުވީ ކްލަސްޓަރ މިޔުނިޝަންސް ޔޫކްރެއިނަށް ފޮނުވަން ނިންމި ނިންމުމަކީ ވަރަށް އުނދަގޫ ނިންމުމެއް ކަމުގައެވެ. ރަޝިޔާ-ޔޫކްރެއިން ހަނގުރާމައިގައި ދެ ފަރާތުން ވެސް ކްލަސްޓަރ މިޔުނިޝަންސް އަދި ހަނގުރާމައިގެ މައިދާނުގައި ބޭނުންކުރުން މަނާ އެހެން ހަތިޔާރު ބޭނުންކުރާ ކަމަށް އިންސާނީ ހައްޤުތަކަށް ވަކާލާތުކުރާ ޖަމުޢިއްޔާ ހިޔުމަން ރައިޓްސް ވޮޗް (އެޗް.އާރް.ޑަބްލިޔު)ން ވަނީ ބުނެފައެވެ.

ރަޝިޔާގެ ސިފައިން "ޚާއްޞަ އަސްކަރީ އޮޕަރޭޝަނެއްގެ" ނަމުގައި ޔޫކްރެއިނަށް އަރައި ހަނގުރާމަ ފަށާފައި ވަނީ 2022 ވަނަ އަހަރުގެ ފެބުރުވަރީ މަހުގެ 24 ވަނަ ދުވަހުއެވެ. ރަޝިޔާއިން ޔޫކްރެއިންގެ ބައެއް ސަރަޙައްދުތަކަށް އަތްގަދަކޮށްފައިވާއިރު، ޔޫކްރެއިންގެ މިނިވަން ކަމަށް ކުރަމުންދާ ހަނގުރާމައިގައި އެ ޤައުމަށް އެންމެ ބޮޑަށް އެހީތެރިކަން ފޯރުކޮށްދެމުން ދަނީ އެމެރިކާއިންނެވެ. އެމެރިކާއިން ޔޫކްރެއިނަށް މިހާތަނަށް ފޮނުވާފައިވާ ހަތިޔާރާއި އަސްކަރީ އެހީގެ އަގު 40 ބިލިޔަން ޑޮލަރަށް އަރައެވެ.