ޔަހޫދީ އިސްރާޢީލުގެ އަސްކަރިއްޔާއިން ފަލަސްޠީނުގެ ރައްޔިތުންނާ ދެކޮޅަށް ނަހަމަ ގޮތުގައި ހާލަތާ ނުބައްދަލު ބާރުގެ ބޭނުން ކުރަމުންދާ ކަމުގައި އ.ދގެ ސެކްރެޓަރީ ޖެނެރަލް އެންޓޯނިޔޯ ގުތެރޭޝް ވިދާޅުވެއްޖެއެވެ. އޭނާ ޔަހޫދީ އިސްރާޢީލުގެ އަމަލުތަކަށް ފާޑުވިދާޅުވެފައި މި ވަނީ، ޔަހޫދީ އަސްކަރިއްޔާގެ ޖައްބާރު ސިފައިން ހުޅަނގު އައްސޭރީގެ ޖިނީނަށް ދާދިފަހުން އަރައި ހިންގި ލާއިންސާނީ އުދުވާންތަކެއްގައި ފަލަސްޠީނުގެ 12 މީހުން ޝަހީދުކޮށްލުމާ ގުޅިގެންނެވެ.
އަސްކަރީ ޑްރޯންތަކާއި ހެލިކޮޕްޓަރުތައް ބޭނުންކޮށްގެން ޔަހޫދީ އަސްކަރިއްޔާގެ ޓެރެރިސްޓު ސިފައިން ހިންގި ޖަރީމާތަކުގައި ފަލަސްޠީނުގެ 100 އަށްވުރެ ގިނަ މީހުން ޒަޚަމުކޮށްލިއެވެ. މި ކަމަށް ފާޑުވިދާޅުވެ ވާހަކަފުޅު ދައްކަވަމުން ގުތެރޭޝް ވިދާޅުވީ އެއީ ނަހަމަ ގޮތުގައި ހާލަތާ ނުބައްދަލު ބާރުގެ ބޭނުންކުރުން ކަމުގައި ދެކެވަޑައިގަންނަވާ ކަމުގައެވެ.
"އިސްރާޢީލުގެ ސަލާމަތާ މެދު ކަންބޮޑުވުންތަކެއް އޮތް ކަން ގަބޫލުކުރަން. ނަމަވެސް، ބާރުގެ ބޭނުންކޮށް ފަލަސްޠީނުގެ ރައްޔިތުންނަށް ހަމަލަދިނުމަކީ ހައްލެއް ނޫން. އެއީ އެއްވެސް ކަމެއްގެ ޖަވާބެއް ނޫން. އެ ފަދަ އަމަލުތަކުގެ ސަބަބުން އިސްރާޢީލާ މެދު އޮތް ނަފުރަތު އިތުރުވެ، އިސްރާޢީލާ ދެކޮޅަށް ހަތިޔާރު ނަގާ މީހުންގެ ޢަދަދުތައް އިތުރުވާނެ. އަދި، އިތުރު ހަމަނުޖެހުންތަކަށް ދޮރު ހުޅުވޭނެ،" ގުތެރޭޝް ވިދާޅުވިއެވެ.
އަސްކަރީ މަތިންދާބޯޓުތަކާއި ޑްރޯންތަކާއި ބުލްޑޯޒަރުތައް ބޭނުންކޮށްގެން އެތަކެއް ސަތޭކަ ޔަހޫދީ ސިފައިން ޖިނީން ރެފިއުޖީ ކޭމްޕަށް އަރައި ހިންގާފައިވާ އުދުވާންތަކަކީ މިހާތަނަށް ޔަހޫދީ އިސްރާޢީލުން ހިންގާފައިވާ އެންމެ ނުރައްކާތެރި ޖަރީމާތައް ކަމުގައި ވެސް ގުތެރޭޝް ވިދާޅުވިއެވެ. އަދި، އެ އުދުވާނުގެ ސަބަބުން ފަލަސްޠީނުގެ ޢާންމު ރައްޔިތުންނަށް ބޮޑެތި ނުރައްކާތަކެއް ކުރިމަތިވި ކަމުގައި ވެސް އޭނާ ވިދާޅުވިއެވެ.
މީގެ ދެ ހަފުތާއެއްހާ ދުވަސް ކުރިން ވެސް ޔަހޫދީ ޓެރެރިސްޓު އަސްކަރިއްޔާގެ ސިފައިން ވަނީ ޖިނީނަށް އަރައި އުދުވާންތަކެއް ހިންގާފައެވެ. އަސްކަރީ ހެލިކޮޕްޓަރުތައް ބޭނުންކޮށްގެން ހިންގި އެ އުދުވާންތަކުގައި ވެސް ފަލަސްޠީނުގެ ހަތް މީހުން ޝަހީދުކޮށްލިއެވެ. ފަލަސްޠީނުގެ ޚާރިޖީ ވުޒާރާއިން ބުނީ ޔަހޫދީ އިސްރާޢީލުން ފަލަސްޠީނުގެ ނިކަމެތި ރައްޔިތުންނާ ދެކޮޅަށް ހަނގުރާމަ ކުރަމުންދާ ކަމުގައެވެ.
ޖިނީން ރެފިއުޖީ ކޭމްޕަކީ 14,000 އަށްވުރެ ގިނަ ރެފިއުޖީން ދިރިއުޅޭ ކޭމްޕެކެއެވެ. އެ ތަނަށް ހަމަލަދޭން ޔަހޫދީ އިސްރާޢީލުން ހަ ޑްރޯނެއް ބޭނުން ކޮށްފައިވާ ކަމުގައި ރިޕޯޓުތައް ބުނެއެވެ. 2006 ވަނަ އަހަރަށް ފަހު ޔަހޫދީ އިސްރާޢީލުން އަނެއްކާ ވެސް މި ވަނީ ފަލަސްޠީނުގެ މުސްލިމުން ޝަހީދުކުރަން އަސްކަރީ ޑްރޯންތައް ބޭނުންކުރަން ފަށާފައެވެ.
ޔަހޫދީ އިސްރާޢީލުން ފަލަސްޠީނުގެ ބިންތަކަށް އަރައި ހުޅަނގު އައްސޭރީގައި ދިރިއުޅޭ ރައްޔިތުން އަޅުވެތިކޮށްފައި ވަނީ 1967 ވަނަ އަހަރުގެ ހަނގުރާމައަށް ފަހުއެވެ. އެއަށްފަހު ފަލަސްޠީނުގެ ބިންތަކުގައި 490,000 އަށްވުރެ ގިނަ ޔަހޫދީން ވަނީ ވަޒަންވެރި ކުރުވާފައެވެ. ޔަހޫދީ އިސްރާޢީލުގެ ޖައްބާރު އަސްކަރިއްޔާއިން މި އަހަރުގެ މިހާތަނަށް ހިންގާފައިވާ ލާއިންސާނީ ޖަރީމާތަކުގައި ޝަހީދުކޮށްލާފައިވާ ފަލަސްޠީނުގެ ރައްޔިތުންގެ ޢަދަދު މިހާރު ވަނީ 187 އަށްވުރެ މައްޗަށް އަރާފައެވެ. އޭގެ ތެރޭގައި ގިނައީ ކުށެއް ނެތް ޢާންމުންނާއި ކުޑަކުދިންނެވެ.