މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން، އެމްއެމްޕީއާރުސީން ތައިލެންޑް މާކެޓުގައި ދިވެހިރާއްޖެ އިތުރަށް އިޝްތިހާރުކުރުމަށް ބެންކޮކް ޕޯސްޓާއެކު ކެމްޕޭނެއް ފަށައިފިއެވެ.
މިމަހުން ފެށިގެން އަންނަ އޮގަސްޓްމަހުގެ ނިޔަލަށް ކުރިއަށްގެންދާ މި ކެންޕޭނުގެ މައިގަނޑު މަގުސަދަކީ ތައިލެންޑުގައި ދިވެހިރާއްޖޭގެ ބްރޭންޑް ހަރުދަނާކޮށް، ދިވެހިރާއްޖޭގެ ހާއްސަކަން ދައްކާލައި، ދެކުނު އިރުމަތީ އޭޝިއާގެ މާކެޓުން ދިވެހިރާއްޖެއަށް ޒިޔާރަތްކުރާ ފަތުރުވެރިންގެ އަދަދު އިތުރުކުރުންކަމަށް އެމްއެމްޕީއާރުސީން ބުނެއެވެ.
ބެންކޮކް ޕޯސްޓަކީ ތައިލެންޑްގައި އެންމެ ކުރިއަރާފައިވާ އިނގިރޭސި މީޑިއަމްގެ މާސް ޕަބްލިކޭޝަނަށްވާއިރު، ދެ މިލިއަނަށްވުރެ ގިނަ ކިޔުންތެރިން ކޮންމެ މަހަކު ބެންކޮކް ޕޯސްޓްކިޔައެވެ.
ބެންކޮކް ޕޯސްޓާއެކު ކުރިއަށްގެންދާ މި ކެމްޕޭންގެ ސަބަބުން ތައިލެންޑްގައި ފުޅާ ދާއިރާއެއްގައި ދިވެހިރާއްޖެ އިޝްތިހާރުވާނެކަމަށް ލަފާކުރެވެއެވެ. މި ކެމްޕޭނަކީ ތައިލެންޑްގެ މާކެޓުގައި ދިވެހިރާއްޖެ ބްރޭންޑް ހަރުދަނާ ކުރުމަށް އެމްއެމްޕީއާރުސީގެ ތައިލެންޑްއަކީ ސީ ރީޖަންގެ މުހިންމު މާކެޓެކެވެ.
2023 ވަނަ އަހަރު އެމްއެމްޕީއާރުސީއިން ތައިލެންޑް މާކެޓަށް އަމާޒުކޮށްގެން ގިނަ ހަރަކާތްތަކެއް ހިންގާފައިވެއެވެ.
މި އަހަރު ކުރިއަށް ރާވާފައިވާ ހަރަކާތްތަކުގެ ތެރޭގައި މީޑިއާ ކެމްޕޭނެއް ހިންގުމާއި، ދެކުނު އިރުމަތީ އޭޝިއާގައި މޯލްޑިވްސް ރޯޑްޝޯއެއް ބޭއްވުމާއި، ނާޓާސް ހޮލިޑޭސް 2023 އަދި އައިޓީބީ އޭޝިއާ 2023ގައި ބައިވެރިވުން ހިމެނެއެވެ.