ސޫދާންގެ އަސްކަރިއްޔާއާއި ރެޕިޑް ސަޕޯޓް ފޯސަސް (އާރް.އެސް.އެފް)ގެ ފައުޖުތަކާ ދެމެދު ވެރިރަށް ޚަރްތޫމްގައި އަނެއްކާ ވެސް ހަމަލަ ބަދަލުކުރަން ފަށައިފިއެވެ. ސޫދާންގެ ދާޚިލީ ހަމަނުޖެހުންތަކާ ގުޅިގެން އެ ޤައުމުގެ ރައްޔިތުން ދިރިއުޅެމުންދާ ހާލަތު ވަނީ އިތުރަށް ގޯސްވެފައެވެ. އަމިއްލަ ވަޒަނާއި ގެދޮރު ދޫކޮށް ރައްކާތެރި ހިސާބުތަކަށް ބަދަލުވެފައިވާ މީހުންނަށް ވަނީ ބަލިމަޑުކަމާއި ކާބާތަކެތީގެ ދަތިކަމާ ކުރިމަތިވެފައެވެ.
ވެރިރަށް ޚަރްތޫމްގެ އިތުރުން އަސްކަރިއްޔާއާއި އާރް.އެސް.އެފުން ވަނީ ދެވަނައަށް އެންމެ ބޮޑު ރަށް އުންމުދުރްމާނުގައި ވެސް ހަމަލަ ބަދަލުކުރަމުންނެވެ. އެ ރަށުގައި ހުރި އަސްކަރިއްޔާގެ މަރުކަޒުތަކަށް އާރް.އެސް.އެފްގެ ފައުޖުތަކުން ވަރުގަދަ ހަމަލަތަކެއް އަމާޒު ކުރަމުންދާ ކަމުގައި ރިޕޯޓުތައް ބުނެއެވެ. އޭގެ ތެރެއިން އެއް މަރުކަޒަކީ އަސްކަރީ ވައިގެ ބަނދަރެކެވެ. އާރް.އެސް.އެފްގެ ފައުޖުތަކާ ދެކޮޅަށް ވައިގެ ހަމަލަތައް ދިނުމަށް ބޭނުންކުރާ އަސްކަރީ މަތިންދާބޯޓުތައް ގާއިމުކޮށްފައި ވަނީ އެ ބަނދަރުގައެވެ.
މި ހަމަނުޖެހުންތަކުގައި މަރުވެފައިވާ މީހުންގެ ޢަދަދު 3,000 އަށްވުރެ މައްޗަށް އަރާފައިވާ ކަމަށް ތަފާސްހިސާބުތަކުން ދައްކައެވެ. ނަމަވެސް، އެ ޢަދަދު 3,000 އަށްވުރެ އިތުރުވާނެ ކަމަށް ބެލެވޭ ކަމުގައި ދުނިޔޭގެ ޞިއްޙަތު ޖަމުޢިއްޔާ – ވޯލްޑް ހެލްތް އޮގަނައިޒޭޝަން (ޑަބްލިޔު.އެޗް.އޯ)އިން ބުނެއެވެ. ހަމަލަ ބަދަލުކުރަމުންދާ ސަރަޙައްދުތަކުގައި ހުރި ގިނަ ޞިއްޙީ ޚިދުމަތްދޭ ތަންތަން ބަންދުކޮށްފައިވާއިރު ހަމަނުޖެހުންތަކުގައި ޒަޚަމުވެފައިވާ މީހުންނަށް ފަރުވާދިނުމަށް ވަނީ ހުރަސް އެޅިފައެވެ.
2.2 މިލިޔަން މީހުން އަމިއްލަ ވަޒަނާއި ގެދޮރު ދޫކޮށް ރައްކާތެރި ހިސާބުތަކަށް ބަދަލުވެފައިވާ ކަމުގައި ރިޕޯޓުތައް ބުނެއެވެ. އޭގެ ތެރެއިން 645,000 ރެފިއުޖީން އަވައްޓެރި ޤައުމުތަކަށް ހިޖުރަކޮށްފައިވާ ކަމުގައި ހިޖުރަކުރާ މީހުންނާ ބެހޭ ބައިނަލްއަޤުވާމީ ޖަމުޢިއްޔާ – އިންޓަރނޭޝަނަލް އޮގަނައިޒޭޝަން ފޯ މައިގްރޭޝަން (އައި.އޯ.އެމު)ން ބުނެއެވެ. ސޫދާނުގައި އިންސާނީ އެހީއަށް ޖެހި، ރައްކާތެރިކަމަށް ބޭނުން ޖެހިފައިވާ މީހުންގެ ޢަދަދު 25 މިލިޔަނަށް އަރާފައިވާ ކަމުގައި އ.ދއިން ބުނެއެވެ.
ސޫދާންގެ ދާޚިލީ ހަނގުރާމައިގެ ދެ ކޮޅުގައި ތިބީ އަސްކަރިއްޔާގެ އިސްވެރިޔާ ޖެނެރަލް ޢަބްދުލް ފައްތާޙް އަލް-ބުރުހާނާއި އާރް.އެސް.އެފްގެ އިސްވެރިޔާ ޖެނެރަލް މުޙައްމަދު ހަމްދާން ދަގަލޯއެވެ. ވެރިކަން ހިންގުމާ ގުޅޭ ގޮތުން އުފެދުނު ޚިޔާލު ތަފާތުވުންތަކެއްގައި އާރް.އެސް.އެފްގެ ފައުޖުތަކުން ވަނީ އޭޕްރިލް މަހުގެ 15 ވަނަ ދުވަހު ވެރިރަށް ޚަރްތޫމަށް އަރައި އެ ރަށް ހިފަން މަސައްކަތް ކޮށްފައެވެ.
ޚަރްތޫމްގެ ބައެއް ސަރަޙައްދުތައް މި ވަގުތު އޮތީ އާރް.އެސް.އެފްގެ އަތްދަށުގައެވެ. އަދި، އަސްކަރިއްޔާއިން ދަނީ ޚަރްތޫމްގެ އުތުރާއި އިރުމަތީގައި އާރް.އެސް.އެފްގެ ފައުޖުތަކުން ހަރަކާތްތެރިވަމުންދާ އަމާޒުތަކަށް ވަރުގަދަ ހަމަލަތަކެއް ދެމުންނެވެ. މި ހަމަލަތަކުގައި އަސްކަރީ މަތިންދާބޯޓާއި އާޓިލަރީ ބަޑި ބޭނުން ކުރަމުންދާ ކަމުގައި މަސްރަޙު ދިރާސާކުރާ ފަރާތްތަކުން ބުނެއެވެ. ބަޙްރީ ކިޔާ ރަށެއްގެ މަތިން ދަތުރުކުރަމުންދިޔަ އަސްކަރިއްޔާގެ މަތިންދާބޯޓެއް ވައްޓައިލާފައިވާ ކަމުގައި ވެސް ރިޕޯޓުތައް ބުނެއެވެ.
ޚަރްތޫމާއި އުންމުދުރުމާނުގެ އިތުރުން ސޫދާނުގެ ހުޅަނގުގައިވާ ދާރްފޫރުގައި ވެސް އަސްކަރިއްޔާއާއި އާރް.އެސް.އެފާ ދެމެދު ވަރުގަދަ ހަމަލަތަކެއް ބަދަލުކުރަމުންދާ ކަމުގައި އ.ދއާއި އެމެރިކާއިން ބުނެއެވެ. ދާރްފޫރުގައި އަސްކަރިއްޔާއާއި އާރް.އެސް.އެފްގެ ފައުޖުތަކުން ޢާންމު ރައްޔިތުންނަށް އަމާޒުކޮށް ހަމަލަ ދެމުންދާ ކަމުގައި ވެސް މަސްރަޙު ދިރާސާކުރާ ފަރާތްތަކުން ދަނީ ބުނަމުންނެވެ.