ސޫރިޔާގެ މިނިވަންކަމާއި ސިޔާދަތަށް ބެލުމެއް ނެތި ޔަހޫދީ އިސްރާޢީލުގެ އަސްކަރިއްޔާއިން ސޫރިޔާގެ ހުޅަނގުގައި އޮންނަ ޙުމްސަށް ވަރުގަދަ މިސައިލް ޙަމަލާތަކެއް ދީފިއެވެ. ޙުމްސަކީ ސޫރިޔާގެ ސަރުކާރުގެ ބާރުގެ ދަށުގައި އޮތް ރަށެކެވެ. އެ ރަށަށް ޔަހޫދީ އަސްކަރިއްޔާއިން ދިން ގިނަ މިސައިލް ޙަމަލާތައް ދިފާޢުކޮށްފައިވާ ކަމަށް ސޫރިޔާގެ ދަޢުލަތުގެ މީޑިޔާއިން ރިޕޯޓުކުރެއެވެ.
ސޫރިޔާގެ އަސްކަރިއްޔާއާ ހަވާލާދީ އެ ޤައުމުގެ ދަޢުލަތުގެ މީޑިޔާ ސަނާއިން ބުނީ ޔަހޫދީ އިސްރާޢީލުން ފޮނުވައިލި މިސައިލްތައް ޙުމްސާ ހަމައަށް ދަތުރުކޮށްފައި ވަނީ ލުބުނާނުގެ ވެރިރަށް ބެއިރޫތުގެ މަތިން ކަމުގައެވެ. މި ޙަމަލާތަކުގައި މުދަލަށް ކޮންމެ ވެސް ވަރެއްގެ ގެއްލުންތަކެއް ލިބުނު ނަމަވެސް، އެއްވެސް މީހެއްގެ ފުރާނައަށް ނުރައްކާވެފައި ނުވާ ކަމުގައި ސަނާއިން ރިޕޯޓުކުރެއެވެ.
ޔަހޫދީ އިސްރާޢީލުގެ އަސްކަރިއްޔާއިން ވަނީ ޙުމްސްގައި ހުންނަ ސޫރިޔާގެ އަސްކަރިއްޔާގެ ހަތިޔާރުތަކަށް އަމާޒުކޮށް ޙަމަލާތަކެއް ދީފައިވާ ކަން ކަށަވަރުކޮށްދީފައެވެ. އެ ޙަމަލާތައް އަމާޒުކޮށްފައި ވަނީ ވައިގެ ދިފާޢީ ނިޒާމަށް ބޭނުންކުރާ ބެޓެރީ ނުވަތަ ބަޑިތަކަށް ކަމުގައި ޔަހޫދީ އަސްކަރިއްޔާއިން ބުނެއެވެ.
ސޫރިޔާއަށް ޙަމަލާދޭން ޖެހުނު ސަބަބެއް ކަމަށް ޔަހޫދީ އިސްރާޢީލުން ބުނީ، އިސްރާޢީލުގެ އަސްކަރީ މަތިންދާބޯޓަކަށް އަމާޒުކޮށް ސޫރިޔާގެ އަސްކަރިއްޔާއިން މިސައިލް ޙަމަލާއެއް ދިނުމެވެ. ސޫރިޔާއިން ފޮނުވައިލި މިސައިލް ވައިގެ ތެރޭގައި ގޮވާފައިވާ ކަމަށާއި، އެއްވެސް މީހެއްގެ ފުރާނައަށް ނުރައްކާވެފައި ނުވާ ކަމުގައި ވެސް ޔަހޫދީ އިސްރާޢީލުގެ އަސްކަރިއްޔާއިން ބުންޏެވެ.
ސޫރިޔާގެ މިނިވަންކަމާއި ސިޔާދަތަށް ބެލުމެއް ނެތި ސަރަޙައްދީ އިން ހުރަސްކޮށް ޔަހޫދީ އިސްރާޢީލުން ދެމުންދާ މި ފަދަ ޙަމަލާތަކުގެ ޢަދަދު ފަހަކަށް އައިސް އިތުރުކޮށްފައިވާ ކަން ފާހަގަކުރެވެއެވެ. ޙަމަލާތައް އަމާޒުކޮށްފައިވާ ބައެއް ތަންތަނުގެ ތެރޭގައި ވައިގެ ބަނދަރުތަކާއި އަސްކަރީ މަރުކަޒުތައް ހިމެނެއެވެ. ބޭނުމަކީ، ސޫރިޔާއާއި ލުބުނާނުގައި ހަރަކާތްތެރިވާ ކަމަށް ބުނާ ހަތިޔާރުއެޅި ޖަމާޢަތްތަކަށް ހަތިޔާރު ފޯރުކޮށްދޭން އީރާނުން ކުރާ މަސައްކަތްތަކަށް ހުރަސް އެޅުން ކަމުގައި އިސްރާޢީލުން ބުނެއެވެ.
އީރާނުން ސޫރިޔާގައި ހަންފަތުރަން މަސައްކަތް ކުރަމުންދާ ކަމުގައި ޔަހޫދީ ޓެރެރިސްޓު އިސްރާޢީލުން ދަނީ ތުހުމަތު ކުރަމުންނެވެ. އަދި، 2011 ވަނަ އަހަރު ސޫރިޔާގައި ފެށި ދާޚިލީ ހަނގުރާމައަށް ފަހު އީރާނުން ސޫރިޔާއަށް ބާރާއި ނުފޫޒު ފޯރުވަން މަސައްކަތް ކުރަމުންދާ ކަމުގައި ވެސް އިސްރާޢީލުން ތުހުމަތު ކުރެއެވެ. އެ ހަނގުރާމައިގައި އީރާނުން ދަނީ ސޫރިޔާގެ ރައީސް ބައްޝާރް ހާފިޛް އަލް-އަސަދުގެ ސަރުކާރަށް ވާގިވެރިވެދެމުންނެވެ. އީރާނުން ވާގިވެރިވާ ހަތިޔާރުއެޅި ޖަމާޢަތެއް ކަމުގައިވާ ހިޒްބުﷲއިން ސޫރިޔާގެ އިރުމައްޗާއި ދެކުނާއި ހުޅަނގުއުތުރުގެ ސަރަޙައްދުތަކުގައި ހަރަކާތްތެރިވަމުންދާ ކަމުގައި މަސްރަޙު ދިރާސާކުރާ ފަރާތްތަކުން ބުނެއެވެ.