ކެންޔާގެ ހުޅަނގުގައި އޮންނަ ލޮންޑިޔާނީގައި ހިނގި ނުރައްކާތެރި މަގުމަތީގެ އެކްސިޑެންޓެގައި 48 މީހުން މަރުވެއްޖެއެވެ. މި ހާދިސާ ހިނގާފައި ވަނީ ކޮންޓެއިނަރ އުފުލާ ލޮރީއެއްގެ ކޮންޓްރޯލް ގެއްލި، މަގުގެ އަނެއް ފަޅިން ދުއްވަމުން ދިޔަ އެހެން އުޅަނދުތަކެއްގެ އިތުރުން ހިނގާފައި ދިޔަ ބަޔެއްގެ ގައިގައި ޖެހުމުގެ ސަބަބުންނެވެ. މި ހާދިސާގައި ގިނަ ޢަދަދެއްގެ އުޅަނދަށް ގެއްލުންވިއެވެ. އޭގެ ތެރޭގައި ގިނަ ޢަދަދެއްގެ މިނީބަހާއި ޓްރަކާއި ސައިކަލު ވެސް ހިމެނެއެވެ.
ލޮންޑިޔާނީގެ ފުލުހުންގެ ކޮމާންޑަރު ޓޮމް އޮޑޭރާ ވިދާޅުވީ ގިނަ ޢަދަދެއްގެ ބަޔަކު މަރުވެފައި ވަނީ ކޮންޓެއިނަރު އުފުލާ ލޮރީގެ ދަށުވެގެން ކަމުގައެވެ. ކެންޔާގެ ރެޑް ކްރޮސްއިން ބުނީ ކޮންޓެއިނަރ އުފުލާ ލޮރީ އިތުރު ހަ އުޅަނދުގައި ޖެހުމަށް ފަހު، ދުވާރުމަތިން ހިނގާފައި ދިޔަ ގިނަ ޢަދަދެއްގެ މީހުންގެ ގައިގައި ވެސް ޖެހިފައިވާ ކަމުގައެވެ.
މި ހާދިސާގައި ޒަޚަމުވި 20 ވަރަކަށް މީހުންނަށް ހޮސްޕިޓަލުގައި އެޑްމިޓުކޮށްގެން ފަރުވާދެމުންދާ ކަމުގައި ވެސް އޮފިޝަލުން ވިދާޅުވެއެވެ. ކެންޔާގެ ރައީސް ވިލިޔަމް ރޫޓޯ ވަނީ މި ހާދިސާއާ ގުޅިގެން ހިތާމަ ފާޅުކުރައްވާ ކަމުގައި ވިދާޅުވެ، މަރުވި މީހުންގެ ޢާއިލާތަކަށް ތަޢުޒިޔާ ދަންނަވާފައެވެ.
"މި ހިތާމަވެރި ހާދިސާގައި މަރުވި މީހުންގެ ތެރޭގައި ޒުވާން އުމުރުފުރައިގެ ގިނަ ޢަދަދެއްގެ ކުދިން ވެސް ހިމެނޭ. އަޅުގަނޑުމެންނާ ވަކިވެގެން އެ ދިޔައީ ޤައުމުގެ ކުރިމަގު ބައްޓަން ކުރަން ތިބި ގިނަ ދަރިންތަކެއް،" ރޫޓޯ ވިދާޅުވިއެވެ.
މިއީ، ފަހުގެ ތާރީޚެއްގައި ކެންޔާގައި ހިނގާފައިވާ މި ފަދަ އެންމެ ހިތާމަވެރި ހާދިސާއެވެ. ހުސްވި އަހަރު ހިނގި މި ފަދަ އެހެން ހާދިސާއެއްގައި މަގެއްގެ މަތިން ބަހެއް ފުރޮޅައިލާ ވާދީއެއްގެ ތެރެއަށް ވެއްޓި ބަހުގައި ދަތުރުކުރި 34 މީހުން މަރުވިއެވެ.