އިންޑިޔާގެ ހުޅަނގުގައިވާ މަހަރާސްތްރާ ސްޓޭޓްގައި ހިނގި ނުރައްކާތެރި ބަސް އެކްސިޑެންޓެއްގައި ބަހުގައި ރޯވެ 25 މީހުން މަރުވެއްޖެއެވެ. ނާގްޕޫރުން ފުރައިގެން ޕޫނޭއަށް ދަތުރުކުރަމުންދިޔަ ބަސް އެކްސިޑެންޓުވެ އޭގައި ހިނގި އަލިފާނުގެ ހާދިސާގައި އިތުރު އަށް މީހަކު ޒަޚަމުވިއެވެ. މި ހާދިސާ ހިނގާފައި ވަނީ އިންޑިޔާ ގަޑިން މެންދަމުންއަލިވެ 1:35 ހާއިރެވެ.
މަހަރާސްތްރާގެ ފުލުހުން ވިދާޅުވީ ބަހުގެ ޑީސަލް ޓޭންކުގައި އަލިފާން ރޯވެފައި ވަނީ ބަސް އެކްސިޑެންޓުވި ވަގުތުކަމުގައެވެ. މި ހާދިސާ ހިނގާފައި ވަނީ ސަމްރުއްދީ މަރާމަރްގު އެކްޕްރެސްވޭގައެވެ. މި ހާދިސާގައި މަރުވި މީހުންގެ ތެރެއިން ގިނަ މީހުންގެ ފުރާނަ ގެއްލިފައި ވަނީ ފިހިގެން ކަމުގައި ފުލުހުން ވިދާޅުވިއެވެ.
އެ ސްޓޭޓްގެ ޗީފް މިނިސްޓަރުގެ ނައިބު ދެވާންދްރާ ފަދްނަވީސް ވިދާޅުވީ، މި ހާދިސާގައި މަރުވި މީހުންގެ ޢަދަދު މިހާރު 25 އަށް އަރާފައިވާ ކަމަށާއި، އިތުރު އަށް މީހަކަށް ފިހިގެން ބޮޑެތި ޒަޚަމުތަކެއް ލިބުނު ކަމުގައެވެ. ބޮޑުވަޒީރު ނަރެންދްރަ މޯދީ ވަނީ، މި ހާދިސާއާ ގުޅިގެން ހިތާމަފާޅުކުރައްވާ ކަމުގައި ވިދާޅުވެ، މަރުވި މީހުންގެ ޢާއިލާތަކަށް ތަޢުޒިޔާ ދަންނަވާފައެވެ.
މަހަރާސްތްރާ ސްޓޭޓްގެ ޗީފް މިނިސްޓަރު އޭކްނާތް ޝިންދޭ ވެސް ވަނީ މަރުވި މީހުންގެ ޢާއިލާތަކަށް ތަޢުޒިޔާ ވިދާޅުވެފައެވެ. އަދި، މަރުވެފައިވާ ކޮންމެ މީހެއްގެ ޢާއިލާއަށް ބަދަލުގެ ގޮތުގައި 8,500 އެމެރިކާ ޑޮލަރު ދޭނެ ކަން އޭނާ ވަނީ އިޢުލާނު ކުރައްވާފައެވެ. އިންޑިޔާގައި ހިނގާ މި ފަދަ ނުރައްކާތެރި މަގުމަތީގެ އެކްސިޑެންޓުތަކުގައި ގިނަ ޢަދަދެއްގެ ބަޔެއްގެ ފުރާނެއް ގެއްލޭ ކަން ފާހަގަކުރެވެއެވެ.