ސްވިޑެންގައި ހުންނަ މިސްކިތެއްގެ ކުރިމަތީގައި ކީރިތި ޤުރުއާނުގެ މުޞްޙަފެއްގައި ރޯކޮށްލި މައްސަލައިގައި ހިތްހަމަނުޖެހުން ފާޅުކުރުމުގެ ގޮތުން އިރާޤުގެ ވެރިރަށް ބަޣްދާދުގައި ހުންނަ ސްވިޑެންގެ އެމްބަސީއަށް ބަޔަކު ވަދެއްޖެއެވެ. ސްވިޑެންގެ ވެރިރަށް ސްޓޮކްހޯމްގައި ހުންނަ މައި މިސްކިތުގެ ކުރިމަތީގައި މުޞްޙަފަކަށް ގެއްލުންދީ، ރޯކޮށްލާފައި ވަނީ އެ ޤައުމުގައި ދިރިއުޅޭ އިރާޤު ރައްޔިތެކެވެ. އޭނާގެ ނަމަކީ ސުލްވާން މުމީކެވެ.
މުޅި މުސްލިމް އުންމަތުން ދަނީ އެ ޖައްބާރު އަމަލު ކުށްވެރި ކުރަމުންނެވެ. މި ކަމާ މެދު ނުރުހުން ފާޅުކުރުމުގެ ގޮތުން ބަޣްދާދުގައި ހުންނަ ސްވިޑެންގެ އެމްބަސީ ކައިރިއަށް ގިނަ ޢަދަދެއްގެ ބަޔަކު ވަނީ އެއްވެ އެ ކަމާ ދެކޮޅަށް އަޑު އުފުލާފައެވެ. އަދި، މުޒާހަރާގެ ބައެއް ބައިވެރިން ވަނީ އެމްބަސީގެ ގޯތިތެރެއަށާއި، އެމްބަސީ ޢިމާރާތުގެ ތެރެއަށް ވެސް ވަދެފައެވެ. ނަމަވެސް، ގިނައިރުތަކެއް ނުވެ ބަޣްދާދުގެ ފުލުހުން ވަނީ އެ މީހުން އެމްބަސީ ތެރެއިން ނެރެފައެވެ.
ސްޓޮކްހޯމްގެ މައި މިސްކިތް ކުރިމަތީގައި މުޞްޙަފެއްގައި ރޯކޮށްލާފައި ވަނީ ބަރަކާތްތެރި އަޟުޙާ ޢީދު ދުވަހުއެވެ. ހައްދުފަހަނަ އަޅާފައިވާ ޖައްބާރު މީހެއް ކަމުގައިވާ މުމީކު އެ އަމަލު ހިންގާފައި ވަނީ ސްވިޑެންގެ ފުލުހުން ދީފައިވާ ހުއްދައެއްގެ ދަށުން ކުރަމުންދިޔަ މުޒާހަރާއެއްގެ ތެރެއިންނެވެ. މުޒާހަރާ ކުރުމަށް މުމީކަށް ހުއްދަ ދީފައި ވަނީ ޚިޔާލުފާޅުކުރުމުގެ މިނިވަން ކަމުގެ ދަށުން ކަމުގައި ފުލުހުން ބުނެއެވެ. ނަމަވެސް، މުޞްޙަފުގައި ރޯކޮށްލައި މުސްލިމުންނާ މެދު ނަފުރަތު އުފައްދަން މަސައްކަތް ކުރުމުގެ ކުށުގައި މުމީކުގެ މައްސަލަ ތަހުޤީޤު ކުރަން ފަށާފައިވާ ކަމުގައި ފުލުހުން ބުނެއެވެ.
މުޞްޙަފުގައި ރޯކޮށްލި މައްސަލައިގައި އެންމެ ބޮޑަށް ނުރުހުން ފާޅުކޮށްފައިވާ އެއް ޤައުމަކީ ތުރުކީވިލާތެވެ. މި ކަމާ ގުޅޭ ގޮތުން ވާހަކަފުޅު ދައްކަވަމުން އެ ޤައުމުގެ ރައީސް ރަޖަބް ޠައްޔިބް އުރުދުޣާން ވިދާޅުވީ، ކީރިތި ޤުރުއާނުގެ މުޞްޙަފުގެ ހުރުމަތް ކަނޑައި، ގެއްލުންދީ، ހުޅުޖެހުމަކީ ޚިޔާލުފާޅުކުރުމުގެ މިނިވަންކަމުގެ ދަށުން ބަލައިގަނެވޭ އަމަލެއް ނޫން ކަން ހުޅަނގުގެ ޤައުމުތަކަށް ދައްކަވާނެ ކަމުގައެވެ.
މުޞްޙަފުގެ ހުރުމަތް ކެނޑި މައްސަލަ އެންމެ ހަރުކަށި އިބާރާތުން ކުށްވެރިކޮށްފައިވާ ޤައުމުތަކުގެ ތެރޭގައި އިރާޤާއި، އީރާނާއި، ސަޢޫދީ ޢަރަބިއްޔާއާއި މިޞްރުގެ އިތުރުން ދިވެހިރާއްޖެ ވެސް ހިމެނެއެވެ. މި މައްސަލައިގައި އުރުދުނާއި މަޣުރިބުގައި ހުންނަ ސްވިޑެންގެ ސަފީރުން އެ ޤައުމުގެ ޚާރިޖީ ވުޒާރާތަކަށް ހާޒިރުކޮށް ސުވާލުކޮށްފައިވެއެވެ.
މުޞްޙަފުގެ ހުރުމަތް ކެނޑުން ކުށްވެރި ކުރަމުން ދިވެހި ޚާރިޖިއްޔާއިން ވަނީ އެއީ އިޙުތިރާމު ކުޑަ، ދަށުދަރަޖައިގެ ހަޑިމުޑުދާރު އަމަލެއްގެ ގޮތުގައި ސިފަކޮށްފައެވެ. އަދި، އެތަކެއް މިލިޔަން މުސްލިމުންނެއްގެ ހިތްތަކުގައި ނަފުރަތު އުފައްދައި، އެ މީހުންގެ ދީނީ ޝުއޫރުތަކަށް އަރައިގަތުމުގެ އަމަލެއްގެ ގޮތުގައި ދެކޭ ކަމުގައި ބުނެފައެވެ. އަދި، ސްވިޑެންގައި މި ފަދަ ނާތަހުޒީބު އަމަލުތައް ތަކުރާރުކުރުމުގެ ފުރުޞަތު ދޭތީ ކަންބޮޑުވުން ފާޅުކުރާ ކަމަށާއި، އެއީ ޚިޔާލުފާޅުކުރުމުގެ މިނިވަންކަމުގެ ބަހަނާގެ ދަށުން ގަބޫލު ކުރެވޭނެ އަމަލެއް ނޫން ކަމުގައި ވެސް ދިވެހި ޚާރިޖީއްޔާއިން ބުންޏެވެ.
މިޞްރާއި ސަޢޫދީ ޢަރަބިއްޔާއިން ވެސް ބުނީ މި އަމަލުން ހާމަ ވަނީ ސްވިޑެން ސަރުކާރުން ޚިޔާލުފާޅުކުރުމުގެ މިނިވަންކަމުގެ ނިވަލުގައި މުސްލިމުންނާ މެދު ނަފުރަތު އުފެއްދުމަށް ފުރުޞަތު ދެމުންދާ ކަން ކަމުގައެވެ. އަދި، މިއީ އެއްވެސް ހާލެއްގައި ބަލައިގަނެވޭނެ އަމަލެއް ނޫން ކަމުގައި މުސްލިމުން އުންމަތުން ދަނީ ބުނަމުންނެވެ.
ސްވިޑެންގެ ބޮޑުވަޒީރު އުލްފު ކްރިސްޓަރޝޮން ވެސް ވަނީ މުޞްޙަފުގައި ހުޅުޖެހި މައްސަލައިގައި ކަންބޮޑުވުން ފާޅުކުރައްވާފައެވެ. އޭނާ ވެސް ވިދާޅު ވަނީ، މުޒާހަރާ ކުރުމުގެ ހައްޤު ޤާނޫނުއަސާސީން ލިބިދީފައިވީ ނަމަވެސް، ކީރިތި ޤުރުއާނުގެ މުޞްޙަފުގައި ހުޅުޖެހުމަކީ ރަނގަޅު ކަމެއް ނޫން ކަމުގައެވެ. އަދި، ބަލައިގަނެވޭނެ ކަމެއް ނޫން ކަމުގައެވެ. އަދި، އެ ފަދަ އަމަލުތަކާ މެދު ފިޔަވަޅު އެޅުމުގެ ބާރު ލިބިގެން ވަނީ ފުލުހުންނަށް ކަމުގައި ވެސް އޭނާ ވިދާޅުވިއެވެ.
ޖަނަވަރީ މަހު ވެސް ސްވިޑެންގެ ސިޔާސީ ދާއިރާގައި ހަރަކާތްތެރިވާ މީހަކު ވަނީ ކީރިތި ޤުރުއާނުގެ މުޞްޙަފެއްގައި ރޯކޮށްލާފައެވެ. އެ މައްސަލައިގައި މުޅި މުސްލިމް އުންމަތުގެ ނުރުހުން ސްވިޑެންއަށް އަމާޒުވެގެންދިޔަ އިރު، ތުރުކީވިލާތުން ވަނީ ނޭޓޯގެ މެންބަރުކަމާ ގުޅޭ ގޮތުން އެ ޤައުމާ މަޝްވަރާ ކުރުން މެދުކަނޑައިލާފައެވެ. ޢީދު ދުވަހުގެ ހާދިސާއާ ގުޅިގެން ސްވިޑެނުން ނޭޓޯގެ މެންބަރަކަށްވުމަށް ކުރަމުންދާ މަސައްކަތްތަކަށް ތުރުކީވިލާތުން އިތުރަށް ހުރަސްއަޅާނެ ކަމަށް ބެލެވޭ ކަމުގައި މަސްރަޙު ދިރާސާކުރާ ފަރާތްތަކުން ގަބޫލުކުރެއެވެ.