ރަޝިޔާ ސަރުކާރާ ދެކޮޅަށް ބަޣާވާތްކުރުމާ ގުޅިގެން އެ ޤައުމުގެ ކުލީ ސިފައިންގެ ކުންފުނި – ވާގްނަރ ގުރޫޕުގެ ބަރު ހަތިޔާރު އަތުލަން ރަޝިޔާގެ އަސްކަރިއްޔާއިން ނިންމައިފިއެވެ. މި ކަން ހާމަކުރަމުން ރަޝިޔާގެ ދިފާޢީ ވުޒާރާއިން ބުނީ، ވާގްނަރ ގުރޫޕުގެ ކުލީ ސިފައިން އެ ޤައުމުގެ އަސްކަރިއްޔާގެ ބާރުގެ ދަށަށް ގެންނަން މަސައްކަތް ފަށާފައިވާ ކަމުގައެވެ.
އެ ގުރޫޕަށް ދޫކޮށްފައިވާ ބަރު ހަތިޔާރު އަތުލަން ނިންމާފައި ވަނީ، އަސްކަރިއްޔާއާ ދެކޮޅަށް ބަޣާވާތެއް ކުރަން މަސައްކަތް ކުރުމުންނެވެ. އެ ގުރޫޕުގެ ބާނީ އަދި އިސްވެރިޔާ ޔެވްގެނީ ޕްރިގޮޜިންގެ އަމުރަށް އެ ގުރޫޕުން ވަނީ ރަޝިޔާގެ ދެކުނުގައިވާ ދެ ރަށަކަށް އަރައި، އަސްކަރީ މަރުކަޒުތައް އެ ގުރޫޕުގެ ބާރުގެ ދަށަށް ގެންގޮސްފައެވެ. އެއީ، ރަސްތޮފާއި ވަރޯނިޝެވެ. ނަމަވެސް، ރަޝިޔާ ސަރުކާރާ ދެމެދު ވެވުނު އެއްބަސްވުމެއްގެ ދަށުން އެ ގުރޫޕުގެ ކުލީ ސިފައިން ވަނީ އެ ދެ ރަށުން ފައިބާ، ބެލަރޫސްއަށް ދަތުރުކޮށްފައެވެ.
ޕްރިގޮޜިން އިސްވެ ރަޝިޔާގެ އަސްކަރިއްޔާއާ ދެކޮޅަށް ބަޣާވާތެއް ފެށުމާ އެކު ރަޝިޔާގެ ސަލާމަތީ ފިޔަވަޅުތަކާ މެދު ސުވާލު އުފެދުނެވެ. އަދި، ރައީސް ވްލަޑިމިޔަރ ޕުޓިންގެ ސަރުކާރަށް ނުރައްކަލާ ކުރިމަތިވެ، ވެރިރަށް މޮސްކޯގައި ސަލާމަތީ ފިޔަވަޅުތައް ވަރުގަދަ ކުރިއެވެ. ވާގްނަރއިން ބަޣާވާތް ހުއްޓައިލާފައި ވަނީ މޮސްކޯއާ ދިމާލަށް ދަތުރު ފެށުމަށް ފަހުއެވެ. މިއީ، ރަޝިޔާގެ ސަލާމަތީ ބާރުތަކުގެ ވަރަށް ބޮޑު ވެއްޓުމެއްގެ ގޮތުގައި މަސްރަޙު ދިރާސާކުރާ ފަރާތްތަކުން ގަބޫލުކުރެއެވެ.
މި މައްސަލައިގައި ރަޝިޔާގެ ދިފާޢީ ޚިދުމަތްތަކާ ބެހޭ އިދާރާ – ފެޑެރަލް ސެކިޔުރިޓީ ސަރވިސަސް (އެފް.އެސް.ބީ)އިން ވަނީ ވާގްނަރއާއި ޕްރިގޮޜިންއާ ދެކޮޅަށް ޖިނާޢީ ތަހުޤީޤެއް ފަށާފައެވެ. އެ ތަހުޤީޤުގެ މަސައްކަތް މިހާރު ނިމިފައިވާ ކަމުގައި އެ ޤައުމުގެ ދިފާޢީ ވުޒާރާއިން ބުނެއެވެ. އަދި، ވާގްނަރގެ ބަޣާވާތުގެ ބޭނުމަކީ އަސްކަރިއްޔާގެ އިސްވެރިން މަގާމުތަކުން ދުރުކުރުން ކަމުގައި ނިންމާފައިވާ ކަމުގައި ވެސް އެ ވުޒާރާއިން ބުންޏެވެ.
ތިން ދުވަހަށް ފަހު ވާގްނަރގެ ބަޣާވާތް ހުއްޓައިލާފައިވާ ކަން ޕްރިގޮޜިން އިޢުލާނު ކޮށްފައި ވަނީ ޖޫން 24 ވަނަ ދުވަހުއެވެ. ބަޣާވާތުގެ ދަށުން އެ ގުރޫޕުން ވަނީ ރަޝިޔާގެ އަސްކަރިއްޔާގެ ހަ ހެލިކޮޕްޓަރާއި ޖާސޫސީ މަތިންދާބޯޓެއް ވެސް ވައްޓައިލާފައެވެ. ބަޣާވާތް ހުއްޓައިލީ ބެލަރޫސްގެ ރައީސް އެލެގްޒެންޑަރ ލުކަޝެންކޯ މެދުވެރިއެއްގެ ދައުރު އަދާކޮށްގެންނެވެ.
މި ބަޣާވާތާ ގުޅޭ ގޮތުން ވާހަކަފުޅު ދައްކަވަމުން ޕުޓިން ވިދާޅުވީ، ބަޣާވާތް ހުއްޓުވާފައި ވަނީ އިތުރު ލޭއޮހޮރުވުންތަކަށް ފުރުޞަތު ނުދިނުމުގެ ގޮތުން ކަމުގައެވެ. އަދި، ބަޣާވާތުގައި ބައިވެރިވި ވާގްނަރގެ ކުލީ ސިފައިންނަށް މަޢާފު ދީފައިވާ ކަމުގައި ވެސް އޭނާ ވިދާޅުވިއެވެ. އަދި، ދާޚިލީ ހަމަނުޖެހުމެއް ހިންގައި، ރަޝިޔާ ރައްޔިތުން އެކަކު އަނެކަކު މެރުމަކީ ހުޅަނގުން ބޭނުންވާ ގޮތް ކަމުގައި ވެސް ޕުޓިން ވިދާޅުވިއެވެ.
މިއީ ބަޣާވާތެއް ކަމަށް ޕްރިގޮޜިން ގަބޫލެއް ނުކުރެއެވެ. އޭނާ ބުނީ އެއީ ހަޅުތާލެއް ކަމުގައެވެ. އަދި، އޭނާގެ ބޭނުމަކަށްވީ ރަޝިޔާގެ ސަލާމަތީ އަދި ދިފާޢީ ކަންކަމުގެ ދޯދިޔާ ކަން ޕުޓިންއަށް ހާމަކޮށްދިނުން ކަމުގައެވެ. އަދި، ޕުޓިންގެ ސަރުކާރު ވައްޓައިލަން އެއްވެސް އިރެއްގައި މަސައްކަތް ކޮށްފައި ނުވާނެ ކަމުގައި ވެސް އޭނާ ބުންޏެވެ. ވާގްނަރގެ 25,000 އެއްހާ ސިފައިން ޔޫކްރެއިން މަގުން ރަޝިޔާއަށް އެތެރެވިއެވެ.
މި ބަޣާވާތާ ގުޅިގެން ވާގްނަރއިން ޔޫކްރެއިން ހަނގުރާމައިގައި އަދާކުރަމުންދިޔަ ދައުރަށް ވަނީ ހުރަސް އެޅިފައެވެ. އެ ގުރޫޕުގެ ކުލީ ސިފައިން މިހާރު ވަނީ ބެލަރޫސްއަށް ގެންގޮސްފައެވެ. ޕްރިގޮޜިން ވެސް މި ވަގުތު ހުރީ ބެލަރޫސްގައެވެ. ވާގްނަރއަކީ ރަޝިޔާއިން ޔޫކްރެއިންގައި ކުރަމުންދާ ހަނގުރާމައިގެ ކުރީ ސަފުގައި އިސް ދައުރެއް އަދާކުރަމުން ދިޔަ ކުންފުންޏެކެވެ.
ވާގްނަރއިން ބަޣާވާތް ކުރަން ފެށުމާ އެކު ޔޫކްރެއިނުން ވަނީ އެ ޤައުމަށް އަރާފައިވާ ރަޝިޔާގެ އިސްތިޢުމާރީ ސިފައިންނާ ދެކޮޅަށް ފަށާފައިވާ ކައުންޓަރއޮފެންސިވް ނުވަތަ ރައްދު ޙަމަލާގެ އަސްކަރީ ކެމްޕޭން އިތުރަށް ވަރުގަދަ ކޮށްފައެވެ. ރަޝިޔާގެ އަތްދަށުގައިވާ ބައެއް އަވަށްތައް މިހާރު ވަނީ މިނިވަންކޮށްފައެވެ. ހަނގުރާމަ އެންމެ ގަދައަށް ހިނގަމުންދާ ސަރަޙައްދުތަކުގެ ތެރޭގައި ބަޚްމުތާއި، ލިމާން އަދި އަވްދޭވްކާ ހިމެނެއެވެ.