ޔޫކްރެއިންގެ އިރުމަތީގައިވާ ކްރަމަތޮރްސްކަށް ރަޝިޔާއިން ދިން ވަރުގަދަ ޙަމަލާތަކެއްގެ ތެރެއިން މިސައިލް ޙަމަލާއެއް ރެސްޓޯރެންޓަކަށް އަރައި ޢާންމުންގެ ހަތަރު މީހުން މަރުވެއްޖެއެވެ. ރެސްޓޯރެންޓަކާއި ފިހާރަބަރިއެއް ހުންނަ ސަރަޙައްދަށް ދިން މިސައިލް ޙަމަލާގައި ޢާންމުންގެ އިތުރު ބަޔަކު ޒަޚަމުވެފައިވާ ކަމުގައި ކްރަމަތޮރްސްކުގެ އޮފިޝަލުން ވިދާޅުވެއެވެ. ޙަމަލާދީފައި ވަނީ ރިޔާ ލައުންޖް ކިޔާ މަޝްހޫރު ރެސްޓޯރެންޓަކަށެވެ.
ކްރަމަތޮރްސްކު އަދިވެސް އޮތީ ޔޫކްރެއިންގެ ބާރުގެ ދަށުގައެވެ. ނަމަވެސް، އެ ރަށް ކައިރީގައިވާ ބައެއް ސަރަޙައްދުތަކަށް ރަޝިޔާގެ އަސްކަރިއްޔާއިން ވަނީ އަތްގަދަކޮށްފައެވެ. އެ ރަށަށް ރަޝިޔާ ސިފައިން ވަރުގަދަ ޙަމަލާތަކެއް ދީފައި ވަނީ އެ ރަށް ހިފުމަށް ކުރަމުންދާ މަސައްކަތްތަކުގެ ދަށުންނެވެ.
ރެސްޓޯރެންޓަށް ދިން ޙަމަލާގައި އެ ތަނަށް ބޮޑެތި ގެއްލުންތަކެއް ލިބިފައިވާއިރު، ވެއްޓިފައިވާ ޢިމާރާތުގެ ބައިތަކުގެ ދަށުވެފައިވާ ކަމަށް ބެލެވޭ މީހުން ސަލާމަތް ކުރަން އޮފިޝަލުން ދަނީ މަސައްކަތް ކުރަމުންނެވެ. މި ހާދިސާގައި މަރުވި މީހުންގެ ތެރޭގައި 17 އަހަރުގެ އަންހެން ކުއްޖެއް ވެސް ހިމެނެއެވެ. ޙަމަލާގައި އެ ސަރަޙައްދުގައި ހުންނަ ޢާންމުން ދިރިއުޅޭ ޢިމާރާތްތަކަށް ވެސް ވަނީ ގެއްލުން ލިބިފައެވެ.’
ރެސްޓޯރެންޓަށް ޙަމަލާދިން ވަގުތު އެ ތަނުގެ ތެރޭގައި 80 އެއްހާ މީހުން ތިބި ކަމަށް ބެލެވޭ ކަމަށާއި، އޭގެ ތެރޭގައި ކަސްޓަމަރުންނާއި އެ ތަނުގެ މުވައްޒަފުން ހިމެނޭ ކަމުގައި ކްރަމަތޮރްސްކުގެ އޮފިޝަލުން ވިދާޅުވެއެވެ. މި ހާދިސާގައި 40 އެއްހާ މީހުން ޒަޚަމުވެފައިވާއިރު، އޭގެ ތެރޭގައި އަށް މަހުގެ ތުއްތު ކުއްޖަކާއި، ބޭރު ޤައުމުތަކުގެ ތިން މީހުން ހިމެނޭ ކަމުގައި މަސްރަޙު ދިރާސާކުރާ ފަރާތްތަކުން ބުނެއެވެ.
މި ހާދިސާއާ ގުޅޭ ގޮތުން ވާހަކަފުޅު ދައްކަވަމުން ޔޫކްރެއިންގެ ރައީސް ވޮލޮޑޮމީރް ޒެލެންސްކީ ވިދާޅުވީ މި ޙަމަލާއިން ހާމަކޮށްދެނީ ހަނގުރާމައިގައި ރަޝިޔާ ބަލިކުރުން ނޫން އިތުރު ގޮތެއް ނެތް ކަމުގައެވެ. އަދި، ރަޝިޔާއާ ދެކޮޅަށް ބައިނަލްއަޤުވާމީ ކޯޓުތަކުގައި ސަރިޔަތް ހިންގަންޖެހޭ ކަމުގައެވެ. އެމެރިކާއިން ވެސް ވަނީ ކްރަމަތޮރްސްކަށް ދިން ޙަމަލާތައް ކުށްވެރިކޮށްފައެވެ.
އޭޕްރިލް މަހުގެ ތެރޭގައި ވެސް ރަޝިޔާއިން ވަނީ ކްރަމަތޮރްސްކަށް ވަރުގަދަ މިސައިލް ޙަމަލާތަކެއް ދީފައެވެ. އެ ރަށުގައި އޮންނަ ރޭލު ސްޓޭޝަނަކަށް އަމާޒުކޮށް ދިން ޙަމަލާތަކުގައި ޢާންމުންގެ 60 މީހުން މަރުވިއެވެ. ހުސްވި އަހަރުގެ ޖޫން މަހުގެ ތެރޭގައި ވެސް ރަޝިޔާއިން ވަނީ ކްރަމަތޮރްސްކް ކައިރީގައިވާ ކްރެމެންޗުކްގެ ފިހާރަބަރިއަކަށް ޙަމަލާދީ ޢާންމުންގެ 18 މީހުން މަރައިލާފައެވެ.