ލުބުނާނާއި ޔަހޫދީ އިސްރާޢީލް ގުޅޭ ސަރަޙައްދީ ރޮނގު ކައިރިން ލުބުނާނުގެ ވައިގެ ސަރަޙައްދުން ދަތުރު ކުރަމުންދިޔަ އިސްރާޢީލުގެ އަސްކަރީ ޑްރޯނެއް ހިޒްބުاللهއިން ވައްޓައިލައިފިއެވެ. ޑްރޯން ވައްޓައިލާފައި ވަނީ ލުބުނާނުގެ ދެކުނުގައި އޮންނަ ޒިބްޤީން މަތިން ދަތުރުކުރަމުން ދަނިކޮށް ކަމުގައި އެ ޖަމާޢަތުން ބުނެއެވެ. ޑްރޯން ވައްޓައިލާފައި ވަނީ އެއަށް ޙަމަލާދީގެން ކަމަށް ހިޒްބުاللهއިން ހާމަކުރި ނަމަވެސް، މި ކަމާ ގުޅޭ އިތުރު ތަފުސީލެއް އެ ޖަމާޢަތުން ޢާންމުކޮށްފައެއް ނުވެއެވެ.
ޔަހޫދީ އިސްރާޢީލުގެ އަސްކަރީ ޑްރޯނެއް ލުބުނާން ތެރެއަށް ވެއްޓައިފައިވާ ކަން ޔަހޫދީ ޖައްބާރު އަސްކަރިއްޔާއިން ވަނީ ކަށަވަރު ކޮށްދީފައެވެ. އަދި، އެ އުޅަނދު ވެއްޓުނީ ޢާންމުކޮށް ވެސް ހިންގާ އަސްކަރީ އޮޕަރޭޝަނެއްގައި ހަރަކާތްތެރިވަމުން ދަނިކޮށް ކަމަށާއި، އެ ޑްރޯނުން އެއްކޮށްފައިވާ ޖާސޫސީ މަޢުލޫމާތު އިތުރު ފަރާތަކަށް ލިބުމުގެ ފުރުޞަތު ނޯންނާނެ ކަމުގައި ވެސް ޔަހޫދީ ޓެރެރިސްޓު އަސްކަރިއްޔާއިން ބުންޏެވެ.
މި ހާދިސާ ހިނގާފައި ވަނީ މި ވަނީ ޔަހޫދީ ޖައްބާރު އަސްކަރިއްޔާގެ ސިފައިންނާއި ހިޒްބުالله ޖަމާޢަތުގެ މުޖާހިދުންނާ ދެމެދު ނުތަނަވަސް ކަން ހޫނުވެފައިވާ ދަނޑިވަޅެއްގައެވެ. އެ ޤައުމުގެ ސަރަޙައްދީ ރޮނގު ކައިރީ އޮންނަ ޝަބްޢާ ދަނޑުބިންތައް އޮންނަ ސަރަޙައްދުގައި ދާދި ފަހުން ހިނގި ހާދިސާއެއްގައި ޔަހޫދީ ޓެރެރިސްޓު ސިފައިން ވަނީ ކަރުނަ ގޭސް ޖަހައި، ލުބުނާނުގެ ޢާންމު ރައްޔިތުންނަށް ޙަމަލާދީފައެވެ.
ޔަހޫދީ ސިފައިން އެ މީހުންނަށް ޙަމަލާދީފައި ވަނީ ސަރަޙައްދީ ރޮނގު ކައިރީގައި މުޒާހަރާއެއް ކުރުމާ ގުޅިގެންނެވެ. މި ޙަމަލާތަކުގައި ލުބުނާނުގެ ޢާންމު ރައްޔިތުންގެ އިތުރުން ގިނަ ޢަދަދެއްގެ ސިފައިންގެ ޞިއްޙަތަށް ވެސް އަސަރު ކުރިއެވެ. ޝަބްޢާގެ ދަނޑުބިންތައް ކައިރީގައި އޮންނަ ބިންތަކަށް ޔަހޫދީ އިސްރާޢީލުން އަތްގަދަ ކޮށްފައި ވަނީ 1967 ވަނަ އަހަރުއެވެ.
ޔަހޫދީ އިސްރާޢީލުން ބުނީ އެ މީހުންގެ ބިންތަކަށް އަރައި ހިޒްބުاللهއިން ޓެންޓުތަކެއް ޖަހާފައިވާ ކަމުގައެވެ. ނަމަވެސް، އެ ޖަމާޢަތުން މި ކަމާ މެދު ވަކި އެއްޗެއް ހާމަކޮށްފައެއް ނެތެވެ. މޭ މަހުގެ ތެރޭގައި އެ ޖަމާޢަތުން ވަނީ ލުބުނާނުގެ ދެކުނުގެ ސަރަޙައްދުތަކުގައި، ޔަހޫދީ އިސްރާޢީލުގެ ސަރަޙައްދީ ރޮނގު ކައިރީގައި، ވަރުގަދަ އަސްކަރީ ތަމްރީނުތަކެއް ބާއްވާފައެވެ.
ހިޒްބުاللهއަކީ 1980ގެ އަހަރުތަކުގެ ތެރޭގައި ލުބުނާނުގައި ގާއިމުކޮށްފައިވާ ސިޔާސީ އަދި އަސްކަރީ ހަރަކާތެކެވެ. އެއީ އީރާނާ އެކު ގާތް ގުޅުމެއް ބާއްވަމުން ގެންދާ، އެ ޤައުމުން ވާގިވެރިވާ ޝިޔަޢީންގެ ޖަމާޢަތެކެވެ. އެ ޖަމާޢަތުގެ މައިގަނޑު މަޤުޞަދުތަކުގެ ތެރޭގައި ޔަހޫދީ އިސްރާޢީލާއި ހުޅަނގުގެ ހަންފެތުރުމާ ދެކޮޅަށް މަސައްކަތްކޮށް، ޖިހާދުކުރުން ހިމެނެއެވެ. ހިޒްބުاللهއަކީ ލުބުނާނުގެ ރައްޔިތުންނަށް ގިނަ އިޖުތިމާޢީ ޚިދުމަތްތައް ފޯރުކޮށްދޭ ޖަމާޢަތެއް ނަމަވެސް، ޔަހޫދީ އިސްރާޢީލާއި ހުޅަނގުން ވަނީ އެއީ ޓެރެރިސްޓު ޖަމާޢަތެއްގެ ގޮތުގައި ކަނޑައަޅާފައެވެ.