ޔޫރޯ 2024 ކޮލިފައިން ގްރޫޕް ބީގައި ގްރީސްއާ ދެކޮޅަށް ކުޅުނު މެޗު ފްރާންސުން ކާމިޔާބުކޮށްފިއެވެ.
ފަރަންސޭސިވިލާތުގައި ކުޅުނު މިމެޗް އެޓީމުން ކާމިޔާބުކުރީ އެއްލަނޑު ސުންލަނޑުންނެެވެ.
ދެޓީމްގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗްގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ފަރަންސޭސި ޓީމުންނެވެ. ނަމަވެސް މިއާއެކުވެސް މިމެޗްގެ ފުރަތަމަ ހާފްގައި ދެޓީމުން ކުރެ އެއްވެސް ޓީމަކަށް ލަނޑެއް ކާމިޔާބު ކުރެވޭގޮތެއްނުވިއެވެ.
މިމެޗުން ފަރަންސޭސީން މޮޅުވި ލަނޑު މެޗްގެ 55 ވަނަ މިނެޓްގައި ލިބުނު ޕެނަލްޓީއަކުން ކާމިޔާބުކޮށްދިނީ ކެޕްޓަން ކިލިއަން އެމްބާޕޭއެވެ. މިޕެނަލްޓީ އެޓީމަށް ލިބިގެންދިޔައީ ގްރީސްގެ ޕެނަލްޓީ އޭރިއާ ތެރެއިން ކޮންސްޓަންޓިނޯސް މަވްރޮޕަނޯސް ބޯޅަ ހޯދަން އުޅުމުގެ ތެރޭގައި ފަރަންސޭސި ފޯވަޑް އެންޓޮއިން ގްރީޒްމަންގެ ބޮލުގައި ޖެހި ބޯފަޅައިގެން ދިއުމުންނެވެ.
އެމްބާޕޭ މި ޕެނަލްޓީ ކާމިޔާބުކޮށްފައިވަނީ ދެފަހަރު ޖަހައިގެންނެވެ. އެއީ އޭނާ ފޮނުވާލި ފުރަތަމަ ޕެނަލްޓީ ގްރީސްގެ ކޯޕަރ އޮޑީސިއަސް ވްލަޗަޑިމޯސް މަތަކުރި ނަމަވެސް ޕެނަލްޓީ ޖެހުމުގެ ކުރިން ގްރީސް ކުޅުންތެރިން ޕެނަލްޓީ އޭރިޔާ ތެރެއަށް ވަދެފައިވުމުގެ ސަބަބުން ދެވަނަ ފަހަރަށް ޕެނަލްޓީ ޖެހުމުގެ ފުރުސަތު ދިނުމުންނެެވެ.
މި ކާމިޔާބީއާއެކު ފަރަންސޭސީން މިވަނީ މިހާތަނަށް ކުޅުނު ހަތަރު މެޗް ކާމިޔާބުކޮށް ގްރޫޕްގެ އެއްވަނައިގާ ހަމަޖެހިލާފައެވެ. އަދި މިހަތަރު މެޗްގައި ބައިކޮޅަށް އެއްވެސް ލަނޑެއްވެސް ވަދެފައެއްވެސް ނުވެއެވެ. އަދި ގްރީސް އުޅެނީ ތިން މެޗުން ލިބިފައިވާ 6 ޕޮއިންޓާއެކު ތާވަލްގެ ދެވަނައިގައެވެ. މިގްރޫޕްގައި ރިޕަބްލިކް އޮފް އަޔަލަންޑާއި ޖިބްރޯލްޓަރ ބައްދަލުކުރިމެޗް ތިން ލަނޑު ސުންލަނޑުން ކާމިޔާބުކުރީ އަޔަލަންޑްއެވެ.