ޢަރަބި ކަނޑުގައި އުފެދިފައިވާ ބާރުގަދަ ތޫފާން ބިޕޫރްޖޯއި އިންޑިޔާއާއި ޕާކިސްތާނުގެ ހުޅަނގު ފަރާތު އައްސޭރިފަށުގެ ސަރަޙައްދުތަކަށް އެރުމާ ގުޅިގެން ހިނގި ހާދިސާތަކުގައި އިންޑިޔާއިން ދެ މީހުން މަރުވެއްޖެއެވެ. ތޫފާނާ އެކު އެ ދެ ޤައުމުގެ އައްސޭރިފަށުގެ ސަރަޙައްދުތަކަށް ދަނީ ބޯކޮށް ވާރޭވެހެމުންނެވެ. މިއީ، ފާއިތުވި 25 އަހަރުގެ ތެރޭގައި އެ ސަރަޙައްދަށް އަރާފައިވާ އެންމެ ބާރުގަދަ އަދި އެންމެ ފަނާކުރަނިވި އެއް ތޫފާން ކަމުގައި ބެލެވެއެވެ.
ތޫފާން މިހާރު ދަތުރު ކުރަމުން ދަނީ އިންޑިޔާގެ ހުޅަނގު ގުޖަރާތް ސްޓޭޓާ ހިސާބުންނެވެ. ތޫފާނުގެ ބާރު ކެނޑެމުން ދިޔަ ނަމަވެސް، ގުޖަރާތްގެ ސަރަޙައްދުތަކަށް ގަދަ ވަޔާ އެކު ބޯކޮށް ވާރޭވެހެމުންދާ ކަމުގައި އެ ޤައުމުގެ މޫސުމާ ބެހޭ އިދާރާއިން ބުނެއެވެ. ތޫފާނާ ގުޅިގެން ހިނގާފައިވާ އެކި ހާދިސާތަކުގައި ގުޖަރާތުގައި 22 މީހަކަށް އަނިޔާވެ، ފަރުވާދޭން ޖެހިފައިވާ ކަމުގައި ވެސް އޮފިޝަލުން ވިދާޅުވެއެވެ.
މި ތޫފާނާ އެކު ބޯކޮށް ވާރޭވެހި ގިނަ ހިސާބުތަކެއްގައި ފެންބޮޑުވެފައިވާއިރު، ތޫފާނާ އެކު އުފެދިފައިވާ ބިޔަ ރާޅުތަކާ އެކު އައްސޭރިފަށުގެ ސަރަޙައްދުތަކަށް ވަނީ އުދައަރާފައެވެ. އަދި، ގަދަ ވަޔާ އެކު ބިޔަ ގަސްތަކުގެ އިތުރުން ކަރަންޓުގެ ޚިދުމަތް ދިނުމަށް ބޭނުންކުރާ ގިނަ ޢަދަދެއްގެ ދަނޑިތައް ވެސް ވަނީ ވެއްޓިފައެވެ. ބައެއް ސަރަޙައްދުތަކުގައި މަގުތަކަށް ވެސް ބޮޑެތި ގެއްލުންތަކެއް ލިބިފައިވާއިރު، މި ތޫފާނާ ގުޅިގެން ލިބިފައިވާ ގެއްލުން އަދި އަންދާޒާ ކުރެވިފައެއް ނުވެއެވެ. ތޫފާނާ ގުޅިގެން ގުޖަރާތްގެ ގިނަ ސަރަޙައްދުތަކެއްގައި ރޭލު ދަތުރުފަތުރުގެ ޚިދުމަތް ވެސް ވަނީ މެދުކަނޑައިލާފައެވެ.
މި ތޫފާނާ ގުޅިގެން ގުޖަރާތުގައި ދެ މީހަކު މަރުވީ ބާވްނަގަރު ކިޔާ ރަށެއްގައެވެ. އެއީ ދެބަފައިން ކަމުގައި ގުޖަރާތްގެ އޮފިޝަލުން ވިދާޅުވެއެވެ. ދަނޑުވެރިކަން ކުރާ އެ ދެ މީހުން މަރުވީ، ފެންގަނޑެއްގެ ތެރެއަށް އެ މީހުން ގެންގުޅޭ ނައަމްސޫފި ދަމައިގަތުމުން އެ ތަކެތި ސަލާމަތް ކުރަން މަސައްކަތް ކުރުމުގެ ތެރޭގައެވެ. މި ތޫފާނާ ގުޅިގެން އިތުރު މީހެއްގެ ފުރާނައަށް ނުރައްކާވި ކަމުގެ ރިޕޯޓެއް އިންޑިޔާއިން ކޮށްފައެއް ނެތެވެ.
ތޫފާން ބިޕޫރްޖޯއި ވަނީ ޕާކިސްތާނުގެ ސަރަޙައްދުތަކަށް ވެސް އަރާފައެވެ. މި ތޫފާނާ ގުޅިގެން އެއްވެސް މީހެއްގެ ފުރާނައަށް ނުރައްކާވި ކަމުގެ ރިޕޯޓެއް އެ ޤައުމުން ވެސް އަދި މިހާތަނަށް ކޮށްފައެއް ނެތެވެ. ނަމަވެސް، ސިންދު ޕުރޮވިންސުގެ އައްސޭރިފަށުގެ ސަރަޙައްދުތަކުގައި ދިރިއުޅޭ 80,000 އަށްވުރެ ގިނަ މީހުން، އެ މީހުންގެ އަމިއްލަ ވަޒަނާއި ގެދޮރު ދޫކޮށް ރައްކާތެރި ހިސާބުތަކަށް ބަދަލުވެފައިވާ ކަމުގައި އެ ޤައުމުގެ އޮފިޝަލުން ވިދާޅުވެއެވެ.
މި ތޫފާނާ ގުޅިގެން ކުރަމުންދިޔަ ތައްޔާރީތަކުގެ ތެރެއިން އިންޑިޔާއާއި ޕާކިސްތާނުގެ ހުޅަނގު ފަރާތު އައްސޭރިފަށުގައި ދިރިއުޅޭ 170,000 އަށްވުރެ ގިނަ މީހުން ވަނީ ރައްކާތެރި ހިސާބުތަކަށް ބަދަލުކޮށްފައެވެ. އެ މީހުންނަށް ހިޔާވަހިކަން ފޯރުކޮށްދޭން ސްކޫލްތަކާއި ސަރުކާރުގެ އެހެނިހެން ޢިމާރާތްތައް ދަނީ ބޭނުން ކުރަމުންނެވެ.
ބެންގާލީ ބަހުން ބިޕޫރްޖޯއިގެ މާނައަކީ ކާރިސާއެވެ. މި ތޫފާނުގެ އަސަރު އެންމެ ފުރަތަމަ ކޮށްފައި ވަނީ އިންޑިޔާގެ ގުޖަރާތް ސްޓޭޓްގެ ޖަޚާއޫއަށެވެ. ތޫފާނާ އެކު އެ ސަރަޙައްދަށް ގަޑިއަކު 125 ކިލޯމީޓަރުގެ ބާރުމިނުގައި ވައިޖެހެމުންދާ ކަމުގައި އެ ޤައުމުގެ މޫސުމާ ބެހޭ އިދާރާއިން ބުނެއެވެ. އަދި، ކުރިއަށް އޮތް ދުވަސްތަކުގައި ވެސް އެ ޤައުމުގެ ބޮޑު ސަރަޙައްދަކަށް ބޯކޮށް ވާރޭވެހޭނެ ކަމަށް އެ އިދާރާއިން ބުނެއެވެ. އޭގެ ތެރޭގައި ގުޖަރާތާ އިންވެގެން އޮންނަ ރާޖަސްތާން ސްޓޭޓް ވެސް ހިމެނެއެވެ.
ތޫފާން ބިޕޫރްޖޯއި އެރުމުގެ ކުރިން ވެސް އެހެން ތޫފާނެއް އަރައި ޕާކިސްތާނުގެ ހުޅަނގުއުތުރުގައިވާ ޚައިބަރް ޕަޚްތުންޚްވާ ޕުރޮވިންސަށް ވަނީ ވިއްސާރަ ކޮށްފައެވެ. އަދި، ފެންބޮޑުވުމާ ގުޅިގެން ކުރިމަތިވި އެކި ހާދިސާތަކުގައި މަރުވި މީހުންގެ ޢަދަދު މިހާރު ވަނީ 33 އަށް އަރާފައެވެ. ފެންބޮޑުވުމުގެ އަސަރު އެންމެ ބޮޑަށް ކޮށްފައި ވަނީ އެ ޕުރޮވިންސުގެ ބަންނޫ، ލައްކީ މަރްވަތް އަދި ކަރަކް ޑިސްޓްރިކްޓަށެވެ. ބޯ ވާރެޔާއެކު އެ ސަރަޙައްދަށް ހޭލް ނުވަތަ ގަނޑުފެން ވެސް ފައިބާފައިވާ ކަމުގައި އޮފިޝަލުން ވިދާޅުވެއެވެ.