އިނގިރޭސި ޕްރިމިއަރ ލީގުގެ މިދިޔަ ސީޒަނުގައި އެންމެ ފާހަގަކޮށްލެވުނު އެއް ޓީމު ކަމަށްވާ ބްރައިޓަންއިން ބްރެޒިލުގެ ފޯވާޑް ޖާއޯ ޕެޑްރޯގެ ސޮއި ހޯދައިފިއެވެ.
ޗެމްޕިއަންޝިޕްގެ ކްލަބެއް ކަމަށްވާ ވޮޓްފަޑަށް ކުޅެމުން އައި ޕެޑްރޯ ބްރައިޓަންއަށް ސޮއިކޮށްފައިވަނީ ފަސްއަހަރު ދުވަހުގެ އެއްބަސްވުމެއްގެދަށުންނެވެ.
މައުލޫމާތުލިބިފައިވާގޮތިގައި ބްރައިޓަންއިން ވަނީ ވޮޓްފަޑްއަށް 30 މިލިއަން ޕައުންޑްގެ އަގެއް ދައްކާފައެވެ. މިއީ އެކްލަބުން މިހާތަނަށް އެންމެ އަގުބޮޑުކޮށް އެޓީމަށް ގެންދިޔަ ކުޅުންތެރިޔާއެވެ. 2020 ވަނަ އަހަރު ވޮޓްފަޑްއާއި ގުޅުނު ޕެޑްރޯ ގެންދިއުމާއި ގުޅޭގޮތުން އޭނާ އާ މިދިޔަ މަހުގެ 5 ވަނަ ދުވަހު އެއްބަސްވުމަކަށްއާދެވުނު ނަމަވެސް އޭނާ ރަސްމީކޮށް ބްރައިޓަންގެ ކުޅުންތެރިޔަކަށް މިހެދުނީ ޓްރާންސްފަރ މާކެޓް ހުޅުވުމާއެކުއެވެ.
ބްރައިޓަންގެ ޓެކްނިކަލް ޑިރެކްޓަރޑެވިޑް ވެއަރ ހާމަކުރިގޮތުގައި ޕެޑްރޯއަކީ އެޓީމުން ވަރަށް ގިނަ ދުވަސް ވަންދެން ފާރަލަމުން އައިސްފައިވާ ކުޅުންތެރިއެއް ކަމަށެވެ. އުމުރުން 21 އަހަރުގެ މިކުޅުންތެރިޔާއަކީ ވަރަށް ހުނަރުވެރި މުސްތަގްބަލް އަލި ކުޅުންތެރިއެއްގެގޮތުގައި ވެއަރ ފާހަގަ ކުރިއެވެ. ބްރައިޓަންއިން މިސީޒަންގައި ދެއްކި މޮޅު ކުޅުމުގެ ސަބަބުން މިއަންނަ ސީޒަންގައި ޔޫރަޕްގައި ކުޅުމުގެ ފުރުސަތު ވަނީ ތަނަވަސްވެގެން ގޮސްފައެވެ.