ޔުއެފާ ނޭޝަންސް ލީގުގެ ސެމީ ފައިނަލުގައި ނެދަލަންޑްސް ބަލިކޮށް ފައިނަލުން ކްރޮއޭޝިއާ ޖާގަ ހޯދައިފިއެވެ.
ނެދަލަންޑްސްގެ ރޮޓަރޑަމްގައި ކުޅުނު ސެމީ ފައިނަލް މެޗް ކްރޮއޭޝިއާ ކާމިޔާބުކުރީ ފުރިހަމަ ވަގުތު ހަމަވިއިރު ދެޓީމް 2 ލަނޑު 2 ލަނޑުން އެއްވަރުވުމުން ކުޅުނު އިތުރު ވަގުތުގައި ކާމިޔާބުކުރި 2 ލަނޑާއެކު ހަތަރު ލަނޑު ދެލަނޑުންނެވެ.
މިމެޗްގައި ގިނައިރު ކްރޮއޭޝިއާއިން ބޯޅަ ގެންގުޅުނު އިރު ދެޓީމުންވެސް ހަމަލާ އުފެއްދިފައިވަނީ ވަރަށް ހަމަހަމަ ކޮށެެވެ. މިމެޗްގެ ފުރަތަމަ ލަނޑު ޖަހާ ލީޑު ނަގާފައިވަނީ ނެދަަލަންޑްސްއިންނެވެ. މިލަނޑު މެޗްގެ 34 ވަނަ މިނެޓްގައި އެޓީމަށް ޖަހާދިނީ ޑޮންޔެލް މާލެންއެވެ. މިމެޗްގައި ކްރޮއޭޝިއާއިން މެޗްގެ ނަތީޖާ ހަމަހަމަ ކުރި ލަނޑު މެޗްގެ 55 ވަނަ މިނެޓްގައި ލިބުނު ޕެނަލްޓީއަކުން ކާމިޔާބުކޮށްދިނީ އަންޑްރެއި ކްރަމަރިޗްއެވެ. އަދި މެޗްގެ 72 ވަނަ މިނެޓްގައި މާރިއޯ މަސަލިޗް ޖަހާދިން ލަނޑާއެކު މިމެޗްގެ ލީޑު ކްރޮއޭޝިއާއިން ނެގިއެވެ.
މިމެޗް މިނަތީޖާގައި އޮވެ ނިމެން ދަނިކޮށް ނެދަލަންޑްސްއަށް މެޗްގެ ނަތީޖާ ހަމަހަމަ ކޮށްދިނީ އިތުރު ވަގުތުގެ 6 ވަނަ މިނެޓްގައި ނޮއާ ލޭންގްއެވެ. މިއާއެކު މިމެޗްގެ ނަތީޖާ ނެރުމަށް އިތުރު ވަގުތުގެ ދެ ހާފް ކުޅެން ޖެހުނެވެ.
މިމެޗްގައި ކްރޮއޭޝިއާއިން ދެވަނަ ފަހަރަށް ލީޑު ނެގީ މެޗްގެ 98 ވަނަ މިނެޓްގައި ބަދަލުކުޅުންތެރިޔާ ބްރޫނޯ ޕެތްކޮވިޗް ޖަހާދިން ލަނޑުންނެވެ. އަދި އިތުރު ވަގުތުގެ ކުޅުން ނިމެން ހަތަރު މިނެޓަށް ވެފައިވަނިކޮށް ލިބުނު ޕެނަލްޓީ އަކާއެކު ކްރޮއޭޝިއާއިން ވަނީ މިމެޗްގައި ދެ ލަނޑުގެ ލީޑެއް ނަގާފައެވެ. މިލަނޑު އެޓީމަށް ކާމިޔާބުކޮށްދިނީ ކެޕްޓަން ލޫކާ މޮޑްރިޗްއެވެ. މިކާމިޔާބީއާއެކު ކްރޮއޭޝިއާ ނޭޝަންސް ލީގުގެ ފައިނަލްގެ ފުރަތަމަ ޖާގަ ކަށަވަރު ކުރިއިރު ފައިނަލްގައި ވާދަކުރާ ދެވަނަ ޓީމެއް އެނގިގެންދާނީ މިރޭ ސްޕެއިން އާއި އިޓަލީވިލާތް ބައްދަލުކުރާ ދެވަނަ ސެމީފައިނަލާއެކުއެވެ.