ޖަރުމަނުގެ ބޮރޫޝިއާ ޑޯޓްމުންޑަށް ކުޅެމުން އައި އިންގްލަންޑުގެ ޒުވާން ކުޅުންތެރިޔާ ޖޫޑް ބެލިންހަމް ސްޕެނިޝް ލީގުގެ ރެއާލް މެޑްރިޑަށް ސޮއިކޮށްފިއެވެ.
މައުލޫމާތުލިބިފައިވާ ގޮތުގައި ބެލިންގހަމް ރެއާލްއަށް ސޮއިކޮށްފައިވަނީ ހަ އަހަރު ދުވަހުގެ އެއްބަސްވުމެއްގެދަށުންނެވެ.
ރެއާލްއިން ބެލިންގހަމް ހޯދުމަށްޓަކައި ޑޯޓްމުންޑާއި އެކު ވީ އެއްބަސްވުމުގެ ދަށުން 103 މިލިއަން ޔޫރޯ ދިނުމަށްވަނީ ހަމަޖެހިފައެވެ. އަދި މީގެއިތުރުން އެހެނިހެން ބައިތަކާއެކު މިއަގު އިތުރަށް ބޮޑުވެގެންދިއުން ވަރަށް ގާތްކަމަށްވެސް ހަބަރުލިބެއެވެ. މިގޮތުން މިދެންނެވި ބައިތަކާއެކު މިއެއްބަސްވުމުގެ އަގު 133.9 މިލިއަން ޔޫރޯއަށް އެރުން ގާތްކަމަށްވެއެވެ.
އުމުރުން 19 އަހަރުގެ ބެލިންގހަމް އޭނާގެ ފުޓްބޯޅަ ކެރިއަރ ފަށާފައިވަނީ ބަރމިންގހަމް ސިޓީއިންނެވެ. އަދި 2020 ވަނަ އަހަރުގެ 25 މިލިއަން ޕައުންޑްގެ އަގަކަށް ޑޯޓްމުންޑަށް ސޮއިކުރިއެވެ. ބެލިންގހަމްވަނީ ޑޯޓްމުންޑަށް ބަދަލުވެ މޮޅު ކުޅުމެއް ދައްކާފައެވެ. އަދި މިކަމުގެ ސަބަބުން އޭނާ ހޯދުމަށް ޔޫރަޕްގެ ބޮޑެތި ކްލަބްތަކުން މަސައްކަތް ކުރާތާ މިހާރު ދެ އަަހަރެއްހާ ދުވަސް ވެއްޖެއެވެ. ރެއާލްއިން އެޓީމަށް ސޮއިކުރި މިއާ ކުޅުންތެރިޔާ މިރޭގެ ވަގުތެއްގައި ރަސްމީކޮށް އާންމު ކޮށް ދައްކާލާނެއެވެ.
ބެލިންގހަމްވަނީ އޭނާ ވޭތުވެދިޔަ ތިން އަހަރު ހޭދަކުރި ޑޯޓްމުންޑްގެ ހުރިހާ ފަރާތްތަކަށް ވަރަށް ބޮޑަށް ޝުކުރު އަދާކޮށްފައެވެ. އަދި ޑޯތްމުންޑްގެ ޖަރޒީ ލުމަކީ އޭނާއަށް ލިބިގެންދިޔަ ޝަރަފެއްގެ ގޮތުގައި ސިފަކުރިއެވެ.