އިންޑިއާގެ 62 ވަނަ ނެޝަނަލް އިންޓަރ ސްޓޭޓް ސީނިއާ އެތުލެޓިކްސް ޗެމްޕިއަންޝިޕުގައި ވާދަކުރަން ރާއްޖޭގެ ދުވުންތެރިންގެ ޓީމެއް ފޮނުވަން އެތުލެޓިކްސް އެސޯސިއޭޝަން އޮފް މޯލްޑިވްސްއިން ނިންމައިފިއެވެ.
މި މަހުގެ 15 އިން 18 އަށް އިންޑިއާގެ ބުބަނޭޝްވަރުގައި ކުރިއަށްދާ މި މުބާރާތުގައި ރާއްޖެއިން ވާދަކުރާ ދުވުންތެރިންނަކީ ހަސަން ސާއިދު، އަޙްމަދު ނަޖުދާން އަބްދުﷲ، ހުސެއިން ރިޒާ، ހުސެއިން ފަޒީލް ހާރޫން އަދި ޒިވާ މޫސާ ޝަފީއުއެވެ.
މި މުބާރާތުގައި ވާދަކުރަން ހޮވި ފަސް ދުވުންތެރިންނަކީވެސް އަންނަ އޮގަސްޓު މަހު މަޑަގަސްކަރައިގައި އޮންނަ އިންޑިއަން އޯޝަން އައިލެންޑް ގޭމްސް (އައިއޯއައިޖީ)އަށް ތައްޔާރުވަމުން އަންނަ އެތުލެޓިކްސް ސްކޮޑުގައި ހިމެނޭ ދުވުންތެރިންނެވެ.
ގައުމީ އެތުލެޓިކްސް ޓީމުގެ ގިނަ ދުވުންތެރިން ތަމްރީނުތަކުގައި ރާއްޖޭން ބޭރުގައި މިވަގުތު ހަރަކާތްތެރިވަމުން އާދެއެވެ. އެގޮތުން ހަތަރު ދުވުންތެރިޔަކު ޖެމެއިކާގައި ތަމްރީނު ހަދަމުން އަންނައިރު، އިންޑިއާގެ ބެންގަލޫރުގައިވެސް ގިނަ ދުވުންތެރިންތަކެއް ތަމްރީނުތައް ފުރިހަމަކުރެއެވެ.
މީގެ ކުރިންވެސް އިންޑިއާގެ ސްޓޭޓް މުބާރާތްތަކުގެ އިތުރުން އިންޑިއާގެ ގައުމީ ފެންވަރުގެ އެކި މުބާރާތްތަކުގައި ދިވެހި އެތުލީޓުން އަންނަނީ ވާދަކުރަމުންނެވެ. މިގޮތުން މިއަހަރުވެސް އިންޑިއަން ގްރޯން ޕްރީގައި ރާއްޖޭގެ އެތުލީޓުން ވާދަކުރިއެވެ.