ކުޅިވަރު ވަޞީލަތްތައް ޤާއިމުކުރެއްވުމަށް ކުރިއަށްގެންދަވާ މަޝްރޫޢުތަކުގެ ތެރެއިން ހއ. ކެލާ ފުޓްބޯޅަ ދަނޑުގެ ސިޑިބަރި ތަރައްޤީކުރުމުގެ ނުނިމި ހުރި މަސައްކަތް ބަޔަކާ ޙަވާލުކުރައްވައިފިއެވެ.
ކުޅިވަރާ ބެހޭ ވުޒާރާގައި ކުރިއަށްގެންދިޔަ ރަސްމިއްޔާތެއްގައި ކެލާ ފުޓްބޯޅަ ދަނޑުގެ ސިޑިބަރި ތަރައްޤީކުރުމުގެ ނުނިމި ހުރި މަސައްކަތްކުރުމަށް ޙަވާލުކުރައްވާފައިވަނީ މެކްސްޓަރ މޯލްޑިވްސްއާއެވެ.
މި އެއްބަސްވުމުގައި ކުޅިވަރާ ބެހޭ ވުޒާރާގެ ފަރާތުން ސޮއިކުރެއްވީ ޑެޕިއުޓީ މިނިސްޓަރ އަޙްމަދު ފުވާދެވެ. އަދިި މެކްސްޓަރ މޯލްޑިވްސްގެ ފަރާތުން ސޮއިކުރެއްވީ އެ ކުންފުނީގެ އޮޕަރޭޝަންސް މެނޭޖަރ އަބްދުﷲ އިބްރާހީމެވެ.
މި މަސައްކަތް އެ ކުންފުންޏާ ޙަވާލުކުރެއްވީ މަސައްކަތް ފަށާތާ، 75 ދުވަހުގެ ތެރޭގައި ނިންމަން ޖެހޭ ގޮތަށެވެ. މި މަޝްރޫއަކީ ކުޅިވަރާ ބެހޭ ވުޒާރާގެ ބަޖެޓުން ތިން މިލިޔަން ހަލައްކަ ސާޅީސްހާސް ނުވަސަތޭކަ ފަސްދޮޅަސްް ދެ ރުފިޔާ ފަންސާސް ނުވަ ލާރި ޚަރަދުކޮށްގެން ކުރިިއަށްގެންދަން ނިންމާފައިވާ މަޝްރޫއެކެވެ.