ސްކޫލް ދަރިވަރުންނަށް ނަފްސާނީ ފުރަތަމަ އެހީ ފޯރުކޮށްދިނުމަށް ޤާއިމްކުރި ހެލްޕްލައިން 1484 ރައީސުލްޖުމްހޫރިއްޔާގެ އަނބިކަނބަލުން ފަޒްނާ އަޙްމަދު އިފްތިތާޙްކޮށް ދެއްވައިފިއެވެ. މިރަސްމިއްޔާތު އޮތީ މިއަދު ހެނދުނު ހ.މީރުމާގައެވެ.
މިހެލްޕް ލައިނަކީ މިނިސްޓްރީ އޮފް އެޑިޔުކޭޝަނުން އިސްނަންގަވައިގެން، ޔުނިސެފާއި، ޑަބްލިޔު.އެޗް.އޯ ގެ އެހީތެރިކަމާއި އެކުގައި ގާއިމްކުރެއްވި ހެލްޕް ލައިނެކެވެ.
މިހެލްޕް ލައިން އިފްތިތާހް ކުރުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރ އޮފް އެޑިއުކޭޝަން ޑރ.އާއިޝަތު އަލީ ވިދާޅުވީ ކޯވިޑް 19ގެ އާލަމީ ވަބާގައި ސްކޫލްތައް ބަންދުވެ ދަރިވަރުން ގޭގައި ތިބެން ކިޔަވަން ޖެހުމާއި އޮންލައިންކޮށް ކިޔެވުމުގެ ކަންތައްތައް ތަރުތީބުކޮށް ހަމަޖައްސަން ޖެހުމުގެ ސަބަބުން ނަފްސާނީ ގޮތުން ދަރިވަރުން ތަހައްމަލު ކުރަން ޖެހުނު ކަންތައްތައް ފާހަގަވެގެންދިޔަ ކަމަށެވެ. ތަފާސް ހިސާބުތަކުން ދައްކާގޮތުގައި ބައެއް ދަރިވަރުންނަށް ކުރި ނަފްސާނީ އަސަރުވަނީ ދާއިމީ ބައްޔަކަށް ބަދަލުވެފައި ކަމަށް މިނިސްޓަރ ވިދާޅުވިއެވެ. މިއާއެކު ރާއްޖޭގެ ހުރިހާ ކަންކޮޅުތަކުގައި ދިރިއުޅޭ ދަރިވަރުންނަށް ނަފްސާނީ ފުރަތަމަ އެހީ ފަސޭހަކަމާއެކު ފޯރުކޮށްދިނުމުގެ މުހިންމުކަން ފާހަގަވެގެންދިޔަކަމަށެވެ. މިނިސްޓަރ ވިދާޅުވީ ސްކޫލްތަކަށް ބަލާއިރު މިހާރު ނަފްސާނީ ފުރަތަމަ އެހީ ފޯރުކޮށްދެވެނީ %27 ސްކޫލުން ކަމަށެވެ. ނަމަވެސް މިއަދު އިފްތިތާހް ކުރެވުނު ނިޒާމަކީ ހުރިހާ ދަރިވަރުންނަށް ދެވޭ ދާއިމީ ޚިދުމަތެއްގެ ގޮތުގައި ނަފްސާނީ ފުރަތަމަ އެހީ ފޯރުކޮށްދެވޭނެ ނިޒާމެއް ކަމަށް މިނިސްޓަރ ވިދާޅުވިއެވެ.
މިނިޒާމުގެ ތެރެއިން ދަރިވަރުންނަށް ދިމާވާ ކަންބޮޑުވުންތަކާއި، ގުޅިގެން ދިމަވެދާނެ ނަފްސާނީ ހާސްކަމަކުން އަރައިގަތުމަށް ކައުންސެލަރުން މެދުވެރިކޮށް އެހީ ފޯރުކޮށްދިނުމާއި، ދަރިވަރުންނަށް އަރލީ އިންޓަރވެންޝަން ދިނުމާއި، ސްކޫލް ކައުންސެލިންގެ ޚިދުމަތް އިތުރުކޮށް ހަރުދަނާ ކުރެވިގެންދާނެ ކަމަށް މިނިސްޓަރ ވިދާޅުވިއެވެ.
"ދަރިވަރުން ފުރިހަމަ ގޮތުގައި ދިރިއުޅުމުގައާއި ކިޔެވުމުގައި ކަންކަމުގައި ޝާމިލްވުމަށްޓަކައި އެކުދިންނަކީ ނަފްސާނ އަދި ޖިސްމާނީ ގޮތުން ދުޅަހެޔޮ ދަރިވަރުންތަކަކަށްވުން ވަރަށް މުހިންމު. ދިމާވާ ކުޑަކުޑަ ކަމަކުންވެސް އެކަމުން އަރައިގަންނާނެ އުކުޅުތައް ދަރިވަރުންނަށް ނޭގޭނަމަ ކުއްޖާ މާޔޫސްކޮށްލާ. އަދި އޭގެ ސަބަބުން ކުއްޖާގެ މުޅި ދިރިއުޅުމަށް ބޮޑު އަސަރުތަކެއް ކުރޭ. މިއަސަރުތަކަކީ ރަނގަޅު ފަރުވާއެއް ނުލިބިއްޖެނަމަ މުޅި ދިރިއުޅުމުގައިވެސް އޭގެ ވޭން ތަހައްމަލް ކުރަން ޖެހިނދާނެ ކަންކަން. މިއަދު މިއިފްތިތާހް ކުރެވުނު ހެލްޕް ލައިންގެ ސަބަބުން އަޅުގަނޑުމެންގެ އުއްމީދަކީ ދަރިވަރުންނަށް ބޭނުންވާ ނަފްސާނީ އެހީ އެކަމަށް ބޭނުންވާ ހިނދު ވީއެންމެ އަވަހަށް ދަރިވަރުންނަށް ލިބިގެންދިއުން". އެޑިއުކޭޝަން މިނިސްޓަރ ޑރ.އާއިޝަތު އަލީ ވިދާޅުވިއެވެ.
ދަރިވަރުންނަށް ނަފްސާނީ ފުރަތަމަ އެހީ ފޯރުކޮށް ދިނުމަށް ޤާއިމްކުރި މިހެލްޕްލައިން 1484 ގެ ޚިދުމަތް ހުކުރު ދުވަސްފިޔަވައި ކޮންމެ ދުވަހަކު މެންދުރުފަހު 3:00 އިން ރޭގަނޑު 9:00 އަށް ލިބޭނެއެވެ. މިހެލްޕްލައިންގެ ޚިދުމަތް ފެށުމަށް ހަމަޖެހިފައިވަނީ މިހިނގާ ޖޫންމަހުގެ 18ވަނަ ދުވަހުންފެށިގެންނެވެ. މިއީ ރާއްޖޭގެ ސްކޫލް މަދަރުސާތަކުގެ ދަރިވަރުންނަށް ނަފްސާނީ އެހީތެރިކަން ފޯރުކޮށްދިނުމަށް ޤާއިމްކުރެވުނު މިފަދަ ފުރަތަމަ ހެލްޕްލައިނެވެ.
ސްކޫލް މަދަރުސާތަކުގެ ދަރިވަރުންނަށް މި ހެލްޕްލައިން މެދުވެރިކޮށް ނަފްސާނީ ފުރަތަމަ އެހީ ފޯރުކޮށްދެއްވުމުގެ މަސައްކަތް ކުރައްވާނީ އެކަމަށްޓަކައި ޚާއްޞަކޮށް ތަމްރީން ދެެއްވާފައިވާ ސްކޫލްތަކުގައި މިހާރު ތިއްބެވި ކައުންސިލަރުންނެވެ. މި ހެލްޕްލައިނުން ރާއްޖޭގެ ހުރިހާ ކަންކޮޅެއްގައި ތިބި ސްކޫލް މަދަރުސާތަކުގެ ދަރިވަރުންނަށް ޚިދުމަތް ހޯދޭނެއެވެ.