ރާއްޖޭގެ ރިސޯޓުތަކުގެ މެދުގައި ކުރިއަށްގެންދާ އެންމެ ބޮޑު ފުޓްސަލް މުބާރާތް ކަމަށްވާ ރިސޯޓް ލީގު 2023 ގެ އަރި ޒޯނުގެ ފައިނަލުގައި ވިލަމެންދޫ އައިލެންޑް ރިސޯޓް ބަލިކޮށް ކޮންރެޑް މޯލްޑިވްސްއިން ދެވަނަ ފަހަރަށް ތަށި މިލްކުކޮށްފިއެވެ.
މި މުބާރާތުގެ ފައިނަލަށް ކޮންރެޑް ދަތުރުކުރީ ލީގު ބުރުގެ އެއްވަނަ ޓީމުގެ ގޮތުގައެވެ. އަދި ވިލަމެންދޫ ފައިނަލަށް ދަތުރުކުރީ ސެމީ ފައިނަލުގައި ލިލީ ބީޗް ބަލިކުރުމަށްފަހުއެވެ. ކޮންރެޑުގައި ކުރިއަށްދިޔަ މި މުބާރާތުގައި މިއަދު ހަވީރު ކުޅުނު ފައިނަލު މެޗު އެ ޓީމުން ކާމިޔާބުކޮށްފައިވަނީ 2-0 ގެ ނަތީޖާއަކުންނެވެ.
މި މެޗުގެ ވަރަށް ކުރީކޮޅު ކޮންރެޑުން ވަނީ ލަނޑު ޖަހައި ލީޑު ނަގާފައެވެ. މެޗުގެ ދެވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ އާދަމް އާޒިމެވެ. މި ލަނޑަށްފަހުވެސް ކޮންރެޑަށް ލަނޑު ޖަހާނެ ގިނަ ފުރުސަތުތަކެއް ލިބި ވަނީ ބޭކާރުވެފައެވެ. އަދި މި ހާފުގައި ވިލަމެންދުއަށްވެސް ލަނޑު ޖަހަން ރަނގަޅު ދެ ފުރުސަތެއް ލިބިގެންދިޔައެވެ.
މި މެޗުގެ ދެވަނަ ހާފު ފަށައިގެން ކޮންރެޑުން ވަނީ އެ ޓީމުގެ އެޓޭކުތައް ވަރުގަދަކޮށްފައެވެ. އެގޮތުން މެޗުގެ 23 ވަނަ މިނެޓުގައި ކޮންރެޑުން ވަނީ އިތުރު ލަނޑެއް ޖަހައި ލީޑު ފުޅާކޮށްފައެވެ. މި ލަނޑު އެ ޓީމަށް ކާމިޔާބުކޮށްދިނީ ހުސެއިން ޝައްފާޙެވެ. މި ލަނޑަށްފަހުވެސް ކޮންރެޑުން ވަނީ ވިލަމެންދޫގެ ގޯލަށް ނުރައްކާކޮށް ގިނަ ހަމަލާތަކެއް ފޮނުވާލާފައެވެ.
މިއަދު ކުޅުނު ފައިނަލް މެޗުގެ މޮޅު ކުޅުންތެރިއަކަށް ހޮވުނީ ކޮންރެޑުގެ އަޙްމަދު ޝާހީނެވެ.
މި މުބާރާތުގެ އެންމެ މޮޅު ފަސް ކުޅުންތެރިންނަކީ އިޙްސާން މަންސޫރާއި، އާދަމް އާޒިމާއި، ހުސެއިން އީސާ އާއި، ހުސެއިން ޝައްފާޙް އަދި ހުސެއިން ޒާދީއެވެ. މުބާރާތުގެ އެންމެ މޮޅު ކުޅުންތެރިއަކަށް ވިލަމަންދޫގެ އިޙްސާން މަންސޫރު ހޮވުނުއިރު، އެންމެ މޮޅު ކޯޗަކީ ކޮންރެޑުގެ ހުސެއިން ޝާހީނެވެ.
މި އަހަރުގެ ރިސޯޓް ލީގުގައި ދެން ކުރިއަށް ދެން އޮންނާނީ ދާލު ޒޯނުގެ ކުޅުމެވެ. އަރި ޒޯނުގެ ކުޅުން ނިމިގެންދިޔައިރު، މީގެ ކުރިން ނޯތު މާލޭ ޒޯނުގެ ކުޅުން ވަނީ ނިމިފައެވެ. ދާލު ޒޯނުގެ މެޗުތައް ކުރިއަށްދާނީ ކަނޑިންމަ މޯލްޑިވްސްގައެވެ.