އަހަރުގެ ދެވަނަ ގްރޭންޑް ސްލޭމް މުބާރާތް ކަމަށްވާ ފްރެންޗް އޯޕަން ރޯލަންޑް ގަރޯސް ޓެނިސް މުބާރާތް ކާމިޔާބުކޮށް، ގްރޭންޑް ސްލޭމުގެ އައު ރިކޯޑެއް ސާބިއާގެ ނޯވަކް ޖޮކޮވިޗް ހަދައިފިއެވެ.
މިކާމިޔާބީއާއެކު ޖޮކޮވިޗް މިވަނީ 23 ވަނަ ގްރޭން ސްލޭމް ކާމިޔާބުކޮށް، އެންމެ ގިނަ ގްރޭން ސްލޭމް މުބާރާތް ކާމިޔާބުކުރި ފިރިހެން ކުޅުންތެރިޔާއަށް ވެގެންގޮސްފައެވެ.
މިމުބާރާތުގެ ޗެމްޕިއަންކަން ޖޯކޮވިޗް ހޯދީ ރޭ ކުޅުނު ފައިނަލް މެޗުގައި ނޯވޭގެ ކެސްޕަރ ރޫޑް ސީދާ ތިން ސެޓުން ބަލިކޮށްގެންނެވެ. މިމެޗްގެ ފުރަތަމަ ސެޓް ނިމުނީ ޓައި ބްރޭކަކަށް ގޮސްގެންނެވެ. ވަރަށް ހަމަހަމަ ކުޅުމެއް ކުޅެމުންގޮސް ހައެއް ހަޔަކުން އެއްވަރުވެ ޓައި ބްރޭކަށް ދިޔަ ނަމަވެސް ޓައި ބްރޭކްގައި ޖޯކޮވިޗް ވަނީ އޭނާގެ މޮޅު ކުޅުން ދައްކާ ފަސޭހަ ކަމާއެއް ހަތެއް އެކަކުން ޓައިބްރޭކް ކާމިޔާބުކޮށް ފުރަތަމަ ސެޓްވެސް ކާމިޔާބުކޮށްފައެވެ. އެއާއެކު ދެވަނަ ސެޓް ހައެއް ތިނަކުން ކާމިޔާބުކުރިއިރު، ފަހު ސެޓް ހަތެއް ފަހަކުން ކާމިޔާބުކުރީވެސް ޖޮކޮވިޗްއެވެ.
މިމެޗްގެ ކުރިން 22 ގްރޭން ސްލޭމް މުބާރާތާއެކު ރަފައެލް ނަޑާލްއާ އެއްވަރުވެފައި އޮތުމަށްފަހު މިހާރު ޖޮކޮވިޗް މިވަނީ ނަޑާލްވެސް ފަހަތަށް ޖައްސާލައި، އެއް ގްރޭން ސްލޭމުން ކުރިއަށް ޖެހިލާފައެވެ. މީގެއިތުރުން ހަތަރު ގްރޭން ސްލޭމް މުބާރާތުގެ ކޮންމެ މުބާރާތެއް މަދުވެގެން ތިން ފަހަރު ކާމިޔާބުކޮށްފައިވާ ފުރަތަމަ ކުޅުންތެރިޔާއަށްވެސް ޖޮކޮވިޗް މިވަނީ ވެގެން ގޮސްފައެވެ.
އަންހެނުންނަށް ބަލާލާއިރު އެންމެ ގިނަ ގްރޭން ސްލޭމް ކާމިޔާބުކޮށްފައިވަނީ 24 މުބާރާތް ކާމިޔާބުކޮށްފައިވާ މާގަރެތް ކޯޓެވެ. އެހެންކަމުން މިހާރު ޖޮކޮވިޗްއަށް މިވަނީ މާގަރެޓްއާ އަރާ ހަމަކުރުމަށް އެންމެ މުބާރާތަަކަށް ގާތްކޮށްފައެވެ. އަދި 23 މުބާރާތާއެކު އޭނާ މިވަނީ އަންހެންގެ ދެވަނަ މަގާމުގައި އޮތް ސެރީނާ ވިލިއަމްސްއާ އަރާ ހަމަކޮށްފައެވެ.