ޔޫރޯ 2024 މުބާރާތުގެ ކޮލިފައިންއަށް އެކުލަވާލި އިންގްލަންޑް ޓީމުން, އަނިޔާގެ ސަބަބުން ޖޫޑް ބެލިންހަމް އާއި ލުވިސް ޑަންކް ބާކީކޮށްފިއެވެ.
ޔޫރޯ ކޮލިފައިންގައި މޯލްޓާ އާއި ނޯތު މެސެޑޯނިއާއާ ބައްދަލުކުރާ ދެ މެޗަށް އެކުލަވާލި ސްކޮޑުން ބްރައިޓަންގެ ކެޕްޓަން އަނިޔާގެ ސަބަބުން އިންގްލަންޑް ޓީމާ ގުޅިފައިނުވި ނަމަވެސް އަނިޔާގައި ހުރި ބޮރޫޝިއާ ޑޯޓްމުންޑްގެ ބެލިންހަމް ވަނީ އިންގްލަންޑް ޓީމާ ގުޅި އޭނާއަށް ލިބިފައިވާ އަނިޔާއިން ރަނގަޅުވުމުގެ މަސައްކަތް އެ ޓީމްގެ ޑޮކްޓަރުންގެ އެހިތެރިކަމާއެކު ފަށާފައެވެ.
އުމުރުން 19 އަހަރުގެ ބެލިންހަމް މިއަންނަ ސީޒަންގައި ފެނިގެން ދާނީ ސްޕެނިޝް ލީގުގެ ރެއާލް މެޑްރިޑުންނެވެ. އިންގްލަންޑްގެ ކޯޗު ގެރެތު ސައުތު ގޭޓް އެކުލަވާލި 25 ކުޅުންތެރިންގެ ސްކޮޑްގައި ހިމެނޭ ވެސްޓް ހޭމް ޔުނައިޓެޑުގެ ޑެކްލަން ރައިސް އާއި މެންޗެސްޓާ ސިޓީއަށް ނިސްބަތްވާ ކުޅުންތެރިން ކަމަށްވާ ޖެކް ގްރީލިޝް، ޖޯން ސްޓޯންސް، ފިލް ފޯޑެން، ކައިލް ވޯކަރ އަދި ކެލްވިން ފިލިޕްސް އެ ޓީމާ ކުރިއަށް އޮތް ދެތިން ދުވަހުގެ ތެރޭގައި ބައިވެރިވާނެ ކަމަށް މައުލޫމާތު ލިބެއެވެ. މި ކުޅުންތެރިން މި ވަގުތު އަންނަނީ ޔޫރަޕްގައި ހޯދި ތާރީހީ ކާމިޔާބުތަކަށްފަހު ޓީމާއެކު އުފާފާޅުކުރަމުންނެވެ.
ޔޫރޯ ކޮލިފައިންގައި އިންގްލަންޑާއި މޯލްޓާ ބައްދަލުކުރާ މެޗް އަންނަ ހުކުރު ދުވަހު މޯލްޓާގައި ކުޅޭއިރު، ނޯތު މެސެޑޯނިއާއާ ބައްދަލުކުރާ މެޗް އަންނަ ހަފްތާގެ ހޯމަ ދުވަހު ކުޅުމަށް ހަމަޖެހިފައިވަނީ އިންގްލަންޑްގައެވެ.