13 އަހަރުން ދަށުގެ އެފްއޭއެމް އިންޓަރ ސްކޫލް ފުޓްބޯޅަ މުބާރާތުގެ ޗެމްޕިއަންކަން ކަލާފާން ސްކޫލުން ހޯދައިފިއެވެ.
މުބާރާތުގެ ޗެމްޕިއަންކަން ކަލާފާނުން ހޯދީ މުބާރާތުގެ ފައިނަލް މެޗުގައި ރޭ އަޙްމަދިއްޔާ އިންޓަރނޭޝަނަލް ސްކޫލާ ވާދަކޮށް ތިން ލަނޑު ސުން ލަނޑުން މެޗު ކާމިޔާބުކޮށްގެންނެވެ.
ޤައުމީ ފުޓްބޯޅަ ދަނޑުގައި ކުޅުނު މި މެޗު ފަށައިގެން ހަތް ސިކުންތު ތެރޭގައި ކަލާފާނުން ވަނީ ލީޑު ނަގާފައެވެ. އެ ގޮތުން މެޗު ކިކޮފް ކުރުމަށް ފަހު، ކަލާފާނު ކުޅުންތެރިން މަތިން ފޮނުވާލި ބޯޅައެއް ފެނުގައި ޖެހިފައި، އަޙްމަދިއްޔާގެ ގޯލްކީޕަރު މުޙައްމަދު އަރާން ޝަމީމް އަތްމަތިން ދިޔަ ވަގުތު، ކަލާފާނުގެ ކެޕްޓަން ހުސެއިން އިލްހާމް އިބްރާހިމް ވަނީ އެ ބޯޅަ ގޯލަށް ފޮނުފާލާފައެވެ.
އޭގެ ފަހުން މި މެޗުގައި ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު، ކަލާފާނުން އަނެއް ދެ ލަނޑު ޖަހާފައިވަނީ މެޗުގެ ފަހުކޮޅެވެ. އެގޮތުން މެޗުގެ 46 ވަނަ މިނެޓުގައި ކައުންޓަރ އެޓޭކެއްގައި އުފެއްދި ހަމަލާއަކުން އިލްހާމް ވަނީ އެ ޓީމުގެ ދެވަނަ ލަނޑު ކާމިޔާބުކޮށްދީފައެވެ. އަދި އޭގެ ދެ މިނެޓު ފަހުން ކޯނަރަކުން ކަލާފާނުގެ ތިންވަނަ ލަނޑު ޖަހައިދިނީ މުޙައްމަދު ނަޝަމް ނިޔާޒެވެ.
މި މުބާރާތުގެ އެންމެ ގިނަ ލަނޑު ޖެހި ކުޅުންތެރިޔާގެ މަޤާމާއި، މުބާރާތުގެ އެންމެ މޮޅު ކުޅުންތެރިއާގެ މަޤާމު ހޯދީ ކަލާފާނުގެ ކެޕްޓަން އިލްހާމެވެ. އަދި އެންމެ މޮޅު ކޯޗަކަށް ކަލާފާނުގެ ފަރީދު މުޙައްމަދު ހޮވުުނުއިރު، ފެއާޕްލޭ ޓީމަކީ މަޖީދިއްޔާ ސްކޫލެވެ.
މި ފަހަރުގެ 13 އަހަރުން ދަށުގެ އިންޓަރ ސްކޫލް މުބާރާތުގައި ޖުމްލަ 36 ސްކޫލެއް ވަނީ ވާދަކޮށްފައެވެ.