އަހަރުގެ ދެވަނަ ގްރޭންޑް ސްލޭމް މުބާރާތް ކަމަށްވާ ފްރެންޗް އޯޕަން ރޯލަންޑް ގަރޯސް ޓެނިސް މުބާރާތުގެ އަންހެން ސިންގަލްސް ޗެމްޕިއަންކަން އެއްވަނައަށް ރޭންކް ކުރެވިފައިވާ ޕޯލަންޑުގެ އީގާ ޝްވާންޓެކް ހޯދައިފިއެވެ.
މިމުބާރާތް ޝްވާންޓެކް ކާމިޔާބުކޮށްފައި ވަނީ ރޭ ކުޅުނު ފައިނަލް މެޗުގައި ޗެކް ރިޕަބްލިކްގެ ކެރޮލީނާ މުކޯވާއާ ބައްދަލުކުރި މެޗް ދެ ސެޓް އެއް ސެޓުން ކާމިޔާބުކޮށްގެންނެވެ. މިމެޗްގެ ފުރަތަމަ ސެޓް ޝްވާންޓެކް ފަސޭހަ ކަމާއެކު ހައެއް ދޭކުން ޝްވާންޓެކް ކާމިޔާބުކުރި ނަމަވެސް، ދެވަނަ ސެޓްގައި މުކޯވާ ވަނީ އޭނާގެ ކުޅުން ރަނގަޅުކޮށް ފަހެއް ހަތަކުން ސެޓް ކާމިޔާބުކޮށްފައެވެ. މިމެޗްގެ ފަހު ސެޓް ޝްވާންޓޭކް ކާމިޔާބުކުރީ ހައެއް ހަތަރަކުންނެވެ.
މިކާމިޔާބީއާއެކު ޝްވާންޓެކް މިވަނީ މިމުބާރާތުގެ އަންހެން ސިންގަލްސް ބައިގެ ތަށި ދިފާއުކޮށްފައެވެ. އެންމެ ފަހުން މިކަން ހާސިލް ކުރެވިފައިވަނީ 2007 ވަނަ އަހަރު ޖަސްޓިން ހެނިންއަށެވެ. އަދި މިއީ ވޭތުވެދިޔަ ހަތަރު އަހަރުގެ ތެރޭގައި ޝްވާންޓެކް މިތަށި ކާމިޔާބުކުރި ތިންވަނަ ފަހަރެވެ.
މެޗަށްފަހު ވާހަކަ ދައްކަމުން ޝްވާންޓެކް ބުނީ މިއީ ފަސޭހަ މެޗެއް ނޫން ކަމަށާއި, އޭނާއަށް މުކޯވާގެ ފަރާތުން ގިނަ އުނދަގޫތަކަކާ ކުރިމަތިވި ކަމަށެވެ. އަދި ވޭތިވެދިޔަ ދެތިން ހަފުތާވެސް ދިޔައީ މިފަހަރު އެހާ ފަސޭހަކޮށް ނޫންކަން އޭނާ ފާހަގަކުރިއެވެ. އަދި މިތަށި ދިފާއު ކުރުވުމުން އުފާވާ ކަމަށްވެސް ވަނީ ބުނެފައެވެ.
އަނިޔާގެ ސަބަބުން މިދިޔަ ސީޒަންގައި ކުޅުން ހުއްޓާލުމަށް ޑޮކްޓަރުން ލަފާދީފައިވާ މުކޯވާ މިމެޗުން ބަލިވި ނަމަވެސް އޭނާވެސް ވަނީ މޮޅު ކުޅުމެއް ދައްކާފައެވެ.