ޔުއެފާ ޗެމްޕިއަންސް ލީގުގެ ފައިނަލުގައި ވާދަކުރާ މެންޗެސްޓާ ސިޓީ އާއި އިންޓަރ މިލާނުން ކާމިޔާބީއަކާއެކު ސީޒަން ނިންމާލުމަށް ތައްޔާރުވެއްޖެއެވެ.
ތުރުކީވިލާތުގެ އިސްތަންބޫލްގެ އަޓަޓަރކް ސްޓޭޑިއަމުގައި މިރޭ ފައިނަލް މެޗު ކުޅޭއިރު، ސިޓީއާއި އިންޓަރވެސް ސީޒަން ނިންމާލާފައިވަނީ ވަރަށް ފޯމުގައި ތިބެގެންނެވެ. މިގޮތުން ސިޓީއިން އިނގިރޭސި ޕްރިމިއަރ ލީގުގެ އިތުރުން އެފްއޭ ކަޕްގެ ތަށި ކާމިޔާބުކޮށްފައިވާއިރު، އިންޓައިން ސީޒަން ނިންމާލީ އިޓާލިއަން ލީގުގެގެ ތިންވަނައިގައި އޮވެ އިޓާލިއަން ކަޕުގެ ތައްޓާއެކުއެވެ. އެހެން ކަމުން މިމެޗަށް މިދެޓީމްވެސް ނިކުންނަނީ ޗެމްޕިއަންސް ލީގުގެ ތަށި ކާމިޔާބުކުރުމުގެ ވަރަށް ބޮޑު އުންމީދަކާއެކުއެވެ.
ޗެމްޕިއަންސް ލީގުގެ ތައްޓަކީ މިހާތަނަށް ސިޓީއަށް ކާމިޔާބު ނުކުރެވޭ ތައްޓެކެވެ. އެހެން ކަމުން މިތަށި ކާމިޔާބު ކުރުމަށް ސިޓީއިން ވަރަށް ބޮޑަށް ވަނީ ބޭނުންވެފައެވެ. މިއީ ވޭތިވެދިޔަ ތިން ސީޒަންގައި ސިޓީއިން މިމުބާރާތުގެ ފައިނަލްގައި ވާދަކުރާ ދެވަނަ ފަހަރެވެ. 2020-2021 ވަނަ ސީޒަންގެ ފައިނަލްގައި ޗެލްސީ އާއި ބައްދަލުކޮށް ސިޓީއަށް ކުރިމަތިލާން ޖެހުނީ ނާކާމިޔާބީއާއެވެ.
ސިޓީއަށް ކުޅޭ ބެލްޖިއަމްގެ މިޑްފީލްޑަރ ކެވިން ޑި ބްރުއިނަރ ހާމަކުރިގޮތުގައި ކޮންމެ ގޮތަކުންވެސް ޗެމްޕިއަންސް ލިގުގެ ފުރަތަމަ ތަށި ކާމިޔާބު ކުރެވޭނެ ގޮތެއް ހޯދަން ޖެހޭ ކަމަށެވެ. އަދި މިކަން މިފަހަރު ކުރެވިއްޖެނަމަ މިކަން ވެގެންދާނީ ކުޅުންތެރިންނާއި ކްލަބްގެ ސަޕޯޓަރުންނަށް ވަރަށް ބޮޑު އުފާވެރިކަމަކަށް ކަމަށްވެސް އޭނާ ހާމަކުރިއެވެ.
މިމެޗާއި ކުރިމަތިލާއިރު ސިޓީއިން އެންމެ ފަހުން ކުޅުނު 26 މެޗްގެ ތެރެއިން ބަލިވެފައިވަނީ އެންމެ މެޗަކުންނެވެ. އަދި ޗެމްޕިއަންސް ލީގުގައި މިސީޒަންގައި ކުޅުނު އެއްވެސް މެޗަކުން ބަލިވެފައެއް ނުވެއެވެ. މިގޮތުން ކުޅުނު 12 މެޗްގެ ތެރެއިން ހަތް މެޗް ކާމިޔާބުކޮށްފައިވެއެވެ. ސިޓީގެ ކޯޗް ޕެޕް ގާޑިއޯލާ ހާމަކުރިގޮތުގައި ޗެމްޕިއަންސް ލީގުގެ ފައިނަލްގައި ކުޅުމަކީ ހުވަފެނެއް ކަހަލަ ކަމެކެވެ. އަދި މިއީ އާދަޔާ ހިލާފު މުބާރާތެއްގެ ގޮތުގައި އޭނާ ސިފަކުރެއެވެ.
ސިޓީ އާއި ފައިނަލްގައި ވާދަކުރާ އިންޓަރއިން ވަނީ ޗެމްޕިއަންސް ލީގުގެ ތަށި ތިން ފަހަރު ކާމިޔާބުކޮށްފައެވެ. އަދި މިފަހަރު ނިކުންނަނީ ހަތަރު ވަނަ ފަހަރަށް މިތަށި ކާމިޔާބު ކުރުމުގެ އަޒުމާއެކުއެވެ. މިފަހަރުގެ މުބާރާތުގައި އެންމެ ގިނަ ކްލީން ޝީޓް ހޯދާފައިވަނީ އިންޓަރއެވެ. މިގޮތުން އަށް މެޗްގައި ބައިކޮޅަށް ލަނޑެއް ވަދެފައެއް ނުވެއެވެ. އަދި އެޓީމްގެ ކީޕަރ އަންޑްރޭ އޮނާނާ ހުރީ ވަރަށް ރަނގަޅު ފޯމެއްގައެވެ.
އަދި އިންޓަރގެ ފޯވަޑް ލައިނަކީވެސް އިދިކޮޅު ކޮންމެ ޓީމަކުންވެސް ޖެހިލުން ކޮށްލާވަރުގެ ފޯވަޑް ލައިނެކެވެ. މިގޮތުން މިސީޒަންގައި 28 ލަޏޑު ޖަހާ އެގާރަ އެސިސްޓް ލައުޓާރޯ މާޓިނޭޒް ދީފައިވާއިރު، ސިޓީގެ ކުރީގެ ތަރި އެޑިން ޖެކޯ އާއި ރޮމެލޫ ލުކާކޫއަކީ ސިޓީގެ ކުޅުން ވަރަށް ރަނގަޅަށް ދަންނަ ނުރައްކާތެރި ދެފޯވަޑުންނެވެ. އިންޓަރގެ ކޯޗް ސިމޯނީ އިންޒާގީ ހާމަކުރިގޮތުގައި މިއީ އޭނާގެ ކެރިއަރުގެ އެންމެ މުހިންމު މެޗެވެ. އަދި މާޓިނޭޒް ހާމަކުރިގޮތުގައި އޭނާގެ އުންމީދަކީ މޮޅު ކުޅުމެއް ދައްކާ ޗެމްޕިއަންސް ލީގުގެ ތަށި މިލާނަށް ގެންދިއުމެވެ.
އިންޓަރގެ މި އުންމީދުތައް ފުނޑުފުނޑު ކޮށްލުމަށް އެންމެ ކުރީގައި ހުންނާނީ ސިޓީ އާއި މިސީޒަންގައި ގުޅި އާދަޔާ ހިލާފު މޮޅު ކުޅުމެއް ދައްކަމުންދާ އާލިންގ ހާލަންޑްއެވެ. އަދި އޭނާ ހުރީ 1999 ވަނަ އަހަރުގެ ފައިނަލްގައި އޮލޭ ގުނަރ ސޯލްޝަޔަރ ލަނޑު ޖެހިފަހުން މިމުބާރާތުގެ ފައިނަލްގައި ލަނޑު ޖަހާ ނޯވޭގެ ފުރަތަމަ ކުޅުންތެރިޔާ ވުމުގެ އަޒުމުގައެވެ.
ސިޓީ އާއި އިންޓަރ އްދަލުކުރާ ޗެމްޕިއަންސް ލީގުގެ ފައިނަލް މެޗް ފެށުމަށް ހަމަޖެހިފައިވަނީ ރާއްޖޭ ގަޑިން މިރޭ ދަންވަރު 12 ޖަހާއިރުއެވެ.