ބަންގްލަދޭޝްގެ ގިނަ ސަރަޙައްދުތަކުގައި އާދަޔާ ޚިލާފަށް ފިނިހޫނުމިން މަތިވެ، ވެރިރަށް ދާކާގެ ބޮޑު ސަރަޙައްދަކުން ކަރަންޓުގެ ޚިދުމަތް މެދިކެނޑިއްޖެއެވެ. ދާކާގެ ބައެއް ސަރަޙައްދުތަކުގައި ދިރިއުޅޭ ރައްޔިތުން ބުނީ އެ މީހުންގެ ގެދޮރުން ކަރަންޓުގެ ޚިދުމަތް ކެނޑިފައިވާތާ ދެ ތިން ހަފުތާ ވެފައިވާ ކަމުގައެވެ. އަދި، ކަރަންޓުގެ ޚިދުމަތް އަލުން ގުޅައިދޭން އިދާރާތަކުން މަސައްކަތް ކުރަމުން ނުދާ ކަމުގައެވެ.
ވެރިރަށް ދާކާގައި ފިނުހޫނުމިން 40 ޑިގްރީ ސެލްސިއެސްއަށްވުރެ މައްޗަށް އުފުލިފައިވާއިރު، ރަންގްޕޫރު ފަދަ ރަށްރަށުގައި 41 ޑިގްރީ ސެލްސިއެސްއަށް ވަނީ ފިނިހޫނުމިން އުފުލިފައެވެ. މިއީ، 1958 ވަނަ އަހަރަށް ފަހު އެ ރަށުގައި ފިނިހޫނުމިން މި ފަދަ މިންވަރަކަށް އުފުލުނު ފުރަތަމަ ފަހަރެވެ. ހޫނު ގަދަވުމުގެ ސަބަބުން ގިނަ ސަރަޙައްދުތަކުގައި ޕްރައިމަރީ އަދި ސެކަންޑްރީ ސްކޫލްތައް ވެސް ވަނީ ބަންދުކޮށްފައެވެ.
ބަންގްލަދޭޝްގެ މޫސުމާ ބެހޭ އިދާރާއިން ބުނީ މިއީ 1971 ވަނަ އަހަރަށް ފަހު އެ ޤައުމަށް ކުރިމަތިވި އެންމެ ދިގުލައިގެން ގޮސްފައިވާ ހޫނުގެ ތޫފާން ކަމުގައެވެ. ބަންގްލަދޭޝްގައި ކަރަންޓުގެ ޚިދުމަތް ފޯރުކޮށްދޭ މައި ކުންފުނިން ހުސްވި ހަފުތާގެ ކުރީކޮޅު ވަނީ ޚިދުމަތްތައް މެދުކަނޑައިލާފައެވެ. އެއް ސަބަބަކީ، ބަންގްލަދޭޝް ފައިސާގެ އަގު ވެއްޓި، އިންޖީނުގެތައް ހިންގަން ބޭނުންވާ ތެޔޮ އެތެރެކުރުމަށް ހުރަސްތަކެއް ކުރިމަތިވުމެވެ.
"ކަރަންޓުގެ ޚިދުމަތް މިހާރު ލިބެނީ ދުވާލަކު އަށް ވަރަކަށް ގަޑިއިރަށް. އޭރު ވެސް ތެ ދިން ގަޑިއިރު ފަހުން ކަރަންޓު ކެނޑޭނެ. އަނެއްކާ ވެސް ދެ ތިން ގަޑިއިރަށް ފަހު އަންނާނެ. މިވަރުން އެއްވެސް އިލެކްޓްރޯނިކް ސާމާނެއް ބޭނުންކުރުމަކީ ރައްކާތެރި ކަމެއް ނޫން،" ރަންގްޕޫރުގައި ދިރިއުޅޭ ގްރެފިކް ޑިޒައިނަރެއްގެ ގޮތުގައި މަސައްކަތް ކުރާ މީހަކު ކިޔައިދިނެވެ.
ބަންގްލަދޭޝްގެ ސަރުކާރުން ބުނީ ކަރަންޓުގެ ޚިދުމަތްތަކުގެ ހާލަތު ކުރިއަށް އޮތް ތަނުގައި އިތުރަށް ގޯސްވާނެ ކަމަށް ބެލެވޭ ކަމުގައެވެ. އޭގެ ސަބަބަކީ އެ ޤައުމަށް ދިމާވެފައިވާ މާލީ ކާރިސާ ކަމުގައި މަސްރަޙު ދިރާސާކުރާ ފަރާތްތަކުން ބުނެއެވެ. މީގެ އިތުރުން، ބޯޓުދެލި އަންދައިގެން ކަރަންޓު އުފައްދާ ޕައިރާ ޕަވަރ ޕްލާންޓު ވެސް ހުރީ ބަންދުކޮށްފައެވެ. މި މަހުގެ ފަހުކޮޅު އެ ޕްލާންޓު އަލުން ހުޅުވައި ޚިދުމަތްދޭން ފަށާނެ ކަމަށް ބަންގްލަދޭޝް ސަރުކާރުން ބުނެއެވެ.
ބަންގްލަދޭޝްގެ އެކި ކަންކޮޅުތަކުގައި 153 އިންޖީނުގެ ހުންނައިރު، އޭގެ ތެރެއިން 53 ޕްލާންޓް ފާއިތުވި ދެ ތިން ހަފުތާގެ ތެރޭގައި އޮޕަރޭޓްކޮށްފައެއް ނުވެއެވެ. އަދި، އެންމެ މަތީ ކެޕޭސިޓީގައި މި ވަގުތު ހިންގަމުން ދަނީ އޭގެތެރެއިން 49 އިންޖީނުގެއެވެ. މި ކަމާ ގުޅިގެން 170 މިލިޔަން މީހުންގެ އާބާދީއެއް އޮންނަ ބަންގްލަދޭޝްގެ ރައްޔިތުންނަށް ވަނީ ބޮޑެތި ތަކުލީފުތަކާ ކުރިމަތިލާން ޖެހިފައެވެ.
މި ކަމާ ގުޅޭ ގޮތުން ބޮޑުވަޒީރު ޝައިޚް ހަސީނާ ވިދާޅުވީ ރައްޔިތުން ދިރިއުޅެމުންދާ ބިކަ ހާލު ސަރުކާރަށް އެނގޭ ކަމަށާއި، އާދަޔާ ޚިލާފަށް ފިނިހޫނުމިން އުފުލުމާ ގުޅިގެން ރައްޔިތުންނަށް އިތުރު ދަތިކަމަކާ ކުރިމަތިލާން ޖެހިފައިވާ ކަން ގަބޫލުފުޅު ކުރައްވާ ކަމުގައެވެ. އަދި، އެ ކަން ހައްލުކުރަން ސަރުކާރުން މަސައްކަތް ކުރަމުންދާ ކަމުގައި އޭނާ ވިދާޅުވިއެވެ. މި ކަން ހައްލު ކުރުމަށް ބަންގްލަދޭޝުން ވަނީ ޤަޠަރުންނާއި އޮމާނުން ތެޔޮ ހޯދުމަށް އެއްބަސްވުމެއްގައި ސޮއިކޮށްފައެވެ.