ކެނެޑާގެ ޖަންގަލިތަކުގައި ރޯވެފައިވާ އަލިފާންގަނޑުތަކުން އަރަމުންދާ ބޯ ދުމުގެ ސަބަބުން އުތުރު އެމެރިކާގެ ވައި ތަޣައްޔަރުވެ، އެ ސަރަޙައްދުގައި ދިރިއުޅޭ މީހުންގެ ޢާންމު ޞިއްޙަތަށް ނުރައްކާވެއްޖެއެވެ. ނޭވާލާ ނިޒާމަށް ނުރައްކާވާ މިންވަރަށް ވައި ތަޣައްޔަރުވުމާ ގުޅިގެން ކެނެޑާގެ އިތުރުން އެމެރިކާގެ ބައެއް ސަރަޙައްދުތަކުގައި ޢާންމު ޞިއްޙަތު ރައްކާތެރިކުރުމަށް ފިޔަވަޅުތަކެއް ވަނީ އަޅާފައެވެ.
ކެނެޑާގެ އިތުރުން އެމެރިކާގެ ރައްޔިތުން ވެސް ގެއިން ބޭރުގައި އުޅޭ ވަގުތުތަކުގައި އެން95 މާސްކު އެޅުމަށް ޞިއްޙީ އިދާރާތަކުން ވަނީ އިރުޝާދުދީފައެވެ. ގޭތެރެއަށް ދުމުގެ އަސަރު ކުރަމުންދާ ނަމަ، ގޭތެރޭގައި އުޅޭ ވަގުތުތަކުގައި ވެސް މާސްކު އެޅުމަށް ކެނެޑާގެ ރައްޔިތުންނަށް ވަނީ އަންގާފައެވެ. އަދި، އެމެރިކާގެ ނިއު ޔޯކުން ވަނީ ހިލޭ މާސްކު ބެހުމުގެ މަސައްކަތް ފަށާފައެވެ.
ހަފުތާ ބަންދުގައި ވެސް އެ ސަރަޙައްދުތަކަށް ތަޣައްޔަރުވެފައިވާ ވަޔާއި ދުމުގެ އަސަރު ކުރާނެ ކަމަށް މޫސުމާ ބެހޭ އިދާރާތަކުން ވަނީ އިންޒާރުދީފައެވެ. އެންމެ ގަދައަށް ދުން އަރަމުން ދަނީ ކެނެޑާގެ ކުބޭކްގެ ޖަންގަލިތަކުގައި ރޯވެފައިވާ އަލިފާންގަނޑުތަކުންނެވެ. އެ ސަރަޙައްދުތަކުގައި 150 އަށްވުރެ ގިނަ އަލިފާންގަނޑު އަނދަމުންދާ ކަމުގައި ކުބޭކްގެ އޮފިޝަލުން ވިދާޅުވިއެވެ.
ކުބޭކްގައި ދިރިއުޅޭ 15,000 އަށްވުރެ ގިނަ މީހުން ރައްކާތެރި ހިސާބުތަކަށް ބަދަލުކުރުމުގެ މަސައްކަތް ދަނީ ކުރަމުންނެވެ. ނަމަވެސް، ޓޮރޮންޓޯގެ ހާލަތު އިތުރަށް ގޯސްވަމުންދާ ކަމުގައި ކެނެޑާގެ ތިމާވެއްޓާ ބެހޭ އިދާރާއިން ބުންޏެވެ. ވައި ތަޣައްޔަރު ވަނީ ވައިގެ ތެރޭގައި ނޭވާލާ ނިޒާމުގެ ތެރެއަށް ވާސިލްވާ ފަދަ ކުދިކުދި ކުނޑިތައް އިތުރުވުމުންނެވެ. ނަމަވެސް، އަލިފާންގަނޑުތަކުގެ ސަބަބުން އުފެދޭ ނުރައްކާތެރި ގޭސްތަކުގެ އަސަރު އެންމެ ބޮޑަށް ކުރަމުންދާ ސަރަޙައްދުތަކުގައި ދިރިއުޅޭ މީހުންނަށް އެން95 މާސްކު ބޭނުންކުރުމުން މާ ބޮޑު ރައްކާތެރި ކަމެއް ނުލިބޭނެ ކަމަށް ޞިއްޙީ މާހިރުން ބުނެއެވެ.
ނިއު ޔޯކްގެ ގަވަރުނަރު ކެތީ ހޯޗުލް ވިދާޅުވީ އެ ސްޓޭޓަށް ކުރިމަތިވެފައި ވަނީ ވަގުތީ ހާލަތެއް ކަމަށާއި، އެއް މިލިޔަނަށް ވުރެ ގިނަ މާސްކު ހިލޭ ބެހުމަށް މަސައްކަތް ކުރަމުންދާ ކަމުގައެވެ. އަދި، ޢާންމު ދަތުރުފަތުރުގެ ޚިދުމަތްތައް ފޯރުކޮށްދޭ ބަސްތަކާއި ރޭލުތަކުގައި ވައި ސާފުކުރާ ނިޒާމުތައް ބޭނުންކުރަމުންދާ ކަމަށާއި، އެ އުޅަނދުފަހަރު ބޭނުންކުރުމަކީ ރައްކާތެރި ކަމެއް ކަމުގައި ވެސް އޭނާ ވިދާޅުވިއެވެ.
މުޅި ނިއު ޔޯކްގައި އޮރެންޖު ކުލައި "ހޭޒް"އެއް ވަނީ ފެތުރިފައެވެ. އަދި ވޮޝިންގްޓަން ޑީ.ސީގައި ސްކޫލްތަކުގެ ބައެއް ހަރަކާތްތައް ވަނީ ހުއްޓައިލާފައެވެ. ފަސްވަނައަށް އެންމެ ބޮޑަށް ވައި ތަޣައްޔަރުވެފައިވާ ކަމަށް އައި.ކިޔު.އެއަރއިން ދައްކާ ޑިޓްރޮއިޓްގައި ހާމަ ތަންތަނުގައި ކަސްރަތު ކުރުން ފަދަ ހަރަކާތްތައް ވެސް ވަނީ މަނާކޮށްފައެވެ.
އެމެރިކާގެ ތިމާވެއްޓާ ބެހޭ އިދާރާ ޔޫ.އެސް އެންވަޔަރަމަންޓް ޕްރޮޓެކްޝަން އޭޖެންސީ (އީ.ޕީ.އޭ)އިން ބުނީ އެ ޤައުމުގެ އިރުމައްޗާއި އުތުރުގެ ސަރަޙައްދުތަކުގެ ހާލަތު ވަރަށް ގޯސް ކަމުގައެވެ. އަދި، އެ ސަރަޙައްދުތަކުގެ ރައްޔިތުންގެ ޞިއްޙަތަށް ނުރައްކާވަމުންދާ ކަމަށާއި، ނޭވާލާ ނިޒާމުގެ މައްސަލަތައް ހުންނަ މީހުންނާއި ނޭވާލާ ނިޒާމުގެ ބަލިތައް ތަހައްމަލު ކުރަމުންދާ މީހުންނަށް އޮތް ނުރައްކާތެރި ކަން ވަރަށް ބޮޑު ކަމުގައެވެ.
ކެނެޑާގެ ޖަންގަލިތަކުގައި ރޯވެފައިވާ އަލިފާންގަނޑުތަކުގެ ސަބަބުން މިހާތަނަށް 3.8 މިލިޔަން ހެކްޓަރުގެ ބިން ވަނީ އަނދާފައެވެ. މިއީ، އެހެން އަހަރުތަކާ އަޅައިބަލާއިރު 12 ގުނަ ބޮޑު ސަރަޙައްދެއް ކަމުގައި ކެނެޑާގެ އިދާރާތަކުން ބުނެއެވެ. އަލިފާންގަނޑުތައް ނިއްވައިލުމަށް ކުރަމުންދާ މަސައްކަތުގައި އެހީތެރިކަން ފޯރުކޮށްދިނުމަށް ބޭރު ޤައުމުތަކުން ވެސް ވަނީ އަލިފާން ނިއްވާ މީހުންގެ ޓީމުތައް ފޮނުވާފައެވެ. މި ގޮތުން އެމެރިކާގެ 600 އެއްހާ މީހުންގެ މައްޗަށް އެކުލެވިގެންވާ ޓީމަކުން ދަނީ ކެނެޑާގެ އެކި ސަރަޙައްދުތަކުގައި ހަރަކާތްތެރިވަމުންނެވެ.