"ފާމް ޓު ޕްލޭޓް": އަމާޒަކީ ދަނޑުވެރިންގެ އުފެއްދުންތައް އެކްސްޕޯޓްކުރެވޭނެ މަގު ފަހިކޮށްދިނުން
ދަނޑުވެރިކަމުގެ ވިޔަފާރިކުރާ ފަރާތްތަކަށް ބޭނުންވާ އެހީތެރިކަން ފޯރުކޮށްދީ ރާއްޖޭގެ ދަނޑުވެރިން ހައްދާ ބާވަތްތައް އެކްސްޕޯޓް ކުރެވޭނެ މަގެއް ފަހިކުރުމަށްޓަކައި ބިޒްނަސް ސެންޓަރ ކޯޕަރޭޝަން، ބީސީސީން އަންނަނީ އއ.ތޮއްޑޫގައި "ފާމް ޓު ޕްލޭޓް" އިންކިއުބޭޝަން ފެސިލިޓީއެއް އެޅުމުގެ މަސައްކަތް ކުރަމުންނެވެ.
މިއީ މިނިސްޓްރީ އޮފް އިކޮނޮމިކް ޑިވެލޮމެންޓާއި ޔޫންއެންޑީޕީއާއި ގުޅިގެން ޖަޕާނު ސަރުކާރުގެ މާލީ އެހީތެރިކަމާއެކު ހިނގަމުންދާ ޕްރޮޖެކްޓް ފޯ ޑިވެލޮޕިންގ ސަސްޓެއިނަބަލް އެގްރިކަލްޗަރަލް އިކޮނޮމީ (ޕީޑީއެސްއޭއީ)ގެ ދަށުން ކުރިއަށްގެންދާ މަސައްކަތެކެވެ.
އއ.ތޮއްޑޫގައި އަޅާ "ފާމް ޓު ޕްލޭޓް"ގެ މަސައްކަތުގެ ދަށުން ތަނުގެ ފަރުމާގެ މަސައްކަތް މިހާރު ނިމިފައިވާ ކަމަށް ބީސީސީން ބުނެއެވެ. އަދި މިހާރު ކުރިއަށްދަނީ ކޮންޓްރެކްޓަރެއް ހޯދުމުގެ މަސައްކަތެވެ.
ތޮއްޑޫގައި ތަރައްޤީކުރާ "ފާމް ޓު ޕްލޭޓް" އިންކިއުބޭޝަން ފެސިލިޓީ ގާއިމުކުރެވުމާއެކު ދަނޑުވެރިންގެ އުފެއްދުންތަކުން މަންފާ އިތުރުކޮށް ނުވަތަ ޕްރޮސެސްކޮށްގެން ވެލިއު އެޑް ކޮށް އުފެއްދުންތައް ބާޒާރަށް ނެރެވޭނެ މަގު ފަހިވެގެންދާނެއެވެ.
ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަކަދައްކަވަމުން ބީސީސީގެ ޗީފް ކޮމާޝަލް އޮފިސަރ ސާމިޙް އާދަމް ވިދާޅުވީ، މިތަން ފަރުމާކޮށްފައިވާ ގޮތުން 10 މާކެޓް ކިއޮސްކް ސްޕޭސް ހިމެނޭނެކަމަށެވެ. މީގެއިތުރުން މިތަނުގައި ޕްރޮސެސިންގ ފެސިލިޓީއެއްވެސް ހުންނާނެކަމަށް އޭނާ ވިދާޅުވިއެވެ. ޕްރޮސެސިންގ ފެސިލިޓީގެ ބޭނުމަކީ ދަނޑުވެރިން އުފައްދާ އުފެއްދުންތައް ޕްރޮސެސްކޮށް ރާއްޖެއާއި ރާއްޖެއިން ބޭރަށް ވިއްކޭނެ މަގު ތަނަވަސްކޮށްދިނުން ކަމަށް ސާމިހް ވިދާޅުވިއެވެ.
”ބީސީސީން ކުރަމުންދާ މަސައްކަތުގައި ވަރަށް ބޮޑަށް އިސްކަންދޭ ކަމެއް އެއީ ދިވެހި އުފެއްދުންތައް ރާއްޖެއިން ބޭރަށް އެކްސްޕޯޓް ކުރެވޭނެފަދަ އުފެއްދުންތައް އުފެއްދުން. ފާމް ޓު ޕްލޭޓް ޕްރޮޖެކްޓް ނިމިގެންދާއިރުގައި އެތަނުގެ ތެރޭގައި މާކެޓް ސްޕޭސްއެއްގެ އިތުރުން ޕްރޮސެސިން ފެސިލިޓީއެއް ޤާއިމްކުރެވިގެންދާނެ. ޕްރޮސެސިންގ ފެސިލިޓީގެ ބޭނުމަކަށް މިވަނީ މިދެންނެވި ގޮތަށް ދަނޑުވެރިން އުފައްދާ އުފެއްދުންތައް ޕްރޮސެސްކޮށްގެން ރާއްޖެއާއި ރާއްޖެއިން ބޭރަށް ވިއްކޭނެ މަގު ތަނަވަސްކޮށްދިނުން.” ސާމިހް ވިދާޅުވިއެވެ.
ތޮއްޑޫއަކީ ފަތުރުވެރިކަން މިހާރު ވަރަށް ބޮޑަށް ފުޅާވެފައިވާ ރަށަކަށްވާއިރު މިތަން ބައްޓަންވެގެން އަންނާނީ ފަތުރުވެރިން ޝައުގުވެރިވާނެ ފަދަ ގޮތަކަށް ކަމަށް ބީސީސީން ބުނެއެވެ. އަދި މިތަނުގައި ކޮމިއުނިޓީ ސްޕޭސްއެއްގެ ގޮތަށް ކިޑްސް ޕްލޭ އޭރިއާއަކާއި، ޑައިނިން އޭރިއާއެއް ހުންނާނެކަމަށް ބީސީސީން ވަނީ ބުނެފައެވެ.
މިތަނުގައި ތަރައްޤީކޮށްފައިވާ ކިއޮސްކް ތަކުގައި ދަނޑުވެރިން ހައްދާ ތަކެތި ވިއްކުމަށާއި އަދި ދަނޑުވެރިކަމުގެ އުފެއްދުންތަކުން ވަގުތުން ތައްޔާރުކޮށްގެން ވިއްކޭނެއެވެ. އަދި ޕްރޮސެސިންގ ފެސިލިޓީގައި ޕްރޮސެސްކޮށްގެން ތައްޔާރުކުރާ ތަކެތިވެސް ވިއްކުމުގެ ފުރުސަތު އޮންނާނެކަމަށް ބީސީސީން ބުނެއެވެ.
ބީސީސީން ވިދާޅުވީ، މި މަސައްކަތުގެ ދަށުން ދަނޑުވެރިންނަށް ފަންނީ އެހީތެރިކަންވެސް ފޯރުކޮށްދޭނެކަމަށެވެ. އެގޮތުން އޮގޭނިކް އަދި ދެމެހެއްޓެނިވި ގޮތަކަށް ދަނޑުވެރިކަން ކުރެވޭނެ ގޮތްތަކާއި، ދަނޑުވެރިކަމުގެ އުފެއްދުންތަކުން ވެލިއު އެޑްކޮށްގެން ބާޒާރަށް ނެރޭނެ ގޮތްތަކާއި އެކަން ކުރަންވީގޮތް ދަނޑުވެރިންނަށް ދަސްކޮށްދެވިގެންދާނެ ކަމަށް ބީސީސީން ބުނެއެވެ.
ބީސީސީއަކީ ރާއްޖޭގެ ކުދި ވިޔަފާރިތަކާއި މެދު ފަންތީގެ ވިޔަފާރިތައް ކުރިއެރުވުމަށް މި ސަރުކާރުން އުފައްދާފައިވާ ކުންފުންޏެކެވެ. އެ ކުންފުނިން މިހާރުވެސް ކުދި ވިޔަފާރިތައް ކުރިއެރުވުމަށް އަންނަނީ ގިނަ މަސައްކަތްތަކެއް ކުރަމުންނެވެ. އެގޮތުން އޮތެންޓިކް މޯލްޑިވްސްގެ ފިހާރަތަކާއި ސީޑް ބައި ބީސީސީ އަދި އެސްއެމްއީ ހަބް ފާހަގަކޮށްލެވެއެވެ.