ރާއްޖޭގައި މިހާރު ކުރިއަށްދާ ލިނިން މޯލްޑިވްސް އިންޓަރނޭޝަނަލް ބެޑްމިންޓަން ޗެލެންޖް 2023 ގެ މިކްސް ޑަބަލްސް އިވެންޓުގެ ގަދަ 16 ބުރުން ރާއްޖޭގެ ހުސެއިން ޒަޔާން ޝަހީދު ޒަކީ އާއި ފާތިމަތު ނަބާހާގެ ޕެއާ ޖާގަ ހޯދައިފިއެވެ.
މި ޕެއާ ގަދަ 16 ބުރުން ޖާގަ ހޯދާފައިވަނީ ގަދަ 32 ޕެއާގެ ބުރުގައި މެލޭޝިއާގެ ތަން ކިއެން ވެއި އާއި ތަން ޝެން ތިންގެ ޕެއާއާ ވާދަކޮށް ފަހަތުން އަރާ ހޯދި ސެޓުތަކާއެކު އެވެ.
ފުރަތަމަ ސެޓު މެލޭޝިއާގެ ޕެއާ ގެންދިޔައީ 23-21 އިންނެވެ. ނަބާހާ އާއި ޒަޔާންގެ ޕެއާ މޮޅުވީ ފަހަތުން އަރައި ދެން ކުޅުނު ދެ ސެޓު 12-21، 12-21 އިން ކުރިހޯދައިގެންނެވެ. ގަދަ 16 ބުރުގައި މި ޒަޔާން އާއި ނަބާހާގެ ޕެއާ ބައްދަލުކުރާނީ އިންޑިއާގެ ރަމްބިއާ އާއި އަނާގާ އަރަވިންދާ ޕައިއާ ދެކޮޅަށެވެ.
މީގެއިތުރުން ރާއްޖޭގެ ނީލާ ނަޖީބު އާއި ނިބާލް އަހުމަދުގެ ޕެއާ ވޯކް އޯވާވުމުން ޕާކިސްތާންގެ ޕެއާ، މިހާދު ޝެއިކް އާއި ހަދީޖާ ލަތީފްގެ ޕެއާ ވަނީ ގަދަ 16 ބުރުން ފުރުސަތު ލިބިފައެވެ. އަދި މުހައްމަދު އަދީމް އާދަމް އާއި ޝައިބާ މުހައްމަދު ޝަރީފްގެ ޕެއާ ވަނީ މެލޭޝިއާގެ ލިމް ޒީ ޖިއާން އާއި ހާއޮ ޝަން ސިއޯ އަތުން 21-07، 21-07 އިން ބަލިވެފައެވެ.
ޒަޔާން އާއި ނަބާހާގެ ޕެއާ އަކީ މި ވަގުތު ބީޑަބްލިއުއެފް މުބާރާތަކުން ރާއްޖެ އަށް ރަން މެޑަލް ގެނެސްދިން ހަމައެކަނި ޕެއާއެވެ. މިދިޔަ މަހު ނެރުނު ދުނިޔޭގެ ރޭންކިންގައި ޒަޔާން އާއި ނަބާހާ ހިމެނެނީ 94 ވަނައިގައެވެ.