ރާއްޖޭގެ ރިސޯޓުތަކުގެ މެދުގައި ކުރިއަށްގެންދާ އެންމެ ބޮޑު ފުޓްސަލް މުބާރާތް ކަމަށްވާ ރިސޯޓް ލީގު 2023 ގެ އަރި ޒޯނުގައި ކުޅުނު ތިންވަނަ މެޗުވެސް ކާމިޔާބުކޮށް ސެމީ ފައިނަލުގެ ޖާގައެއް ކޮންރެޑް މޯލްޑިވްސްއިން ކަށަވަރުކުރިއިރު، ލިލީ ބީޗުން ފުރަތަމަ މޮޅު ހޯދައިފިއެވެ.
ކޮންރެޑުގައި ކުރިއަށްދާ މި މުބާރާތުގައި މިއަދު ހަވީރު ކުޅުނު ދެވަނަ މެޗުން ކޮންރެޑް މޮޅުވީ ވިލަމެންދޫ އަތުން ފަހަތުން އަރައި 2-1 ގެ ނަތީޖާއަކުންނެވެ.
މި މެޗު ފަށައިގެން ކޮންރެޑުން ވިލަމެންދޫގެ ހާފަށް ބާރުބޮޑުކޮށް ގިނަ ހަމަލާ އުފެއްދިއިރު، ފުރަތަމަ ހާފުގައި ވިލަމެންދޫއަށްވެސް ވަނީ ލަނޑު ޖަހަން ރަނގަޅު ފުރުސަތުތަކެއް ލިބި ބޭކާރުވެފައެވެ.
މި މެޗުގެ ދެވަނަ ހާފު ފަށައިގެން ތިންވަނަ މިނެޓުގައި ވިލަމެންދޫން ވަނީ ލަނޑު ޖަހައި ލީޑު ނަގާފައެވެ. މި ލަނޑު އެ ޓީމަށް ކާމިޔާބުކޮށްދިނީ އިޙްސާން މަންސޫރެވެ. އެކަމަކު އޭގެ ހަތަރު މިނެޓު ފަހުން ކޮންރެޑުން ވަނީ ނަތީޖާ ހަމަހަމަކޮށްފައެވެ. މި ލަނޑު އެ ޓީމަށް ކާމިޔާބުކޮށްދިނީ އާދަމް އާޒިމެވެ. އަދި މި މެޗުން ކޮންރެޑް މޮޅުކޮށްދިން ލަނޑު އެ ޓީމަށް ޖަހައިދިނީ މެޗުގެ ފަހު މިނެޓުގައި ހުސެއިން ޝައްފާހެވެ.
މި މޮޅާއެކު ކޮންރެޑުން ސެމީގެ ޖާގައެއް ކަށަވަރުކުރީ ކުޅުނު ތިން މެޗުން ހޯދި ހަތް ޕޮއިންޓާއެކުގައެވެ. އެ ޓީމުން ކުޅުނު ފުރަތަމަ މެޗުން ޑަބްލިއު މޯލްޑިވްސް އަތުން މޮޅުވިއިރު، ދެވަނަ މެޗުން ވަނީ ލިލީ ބީޗާ އެއްވަރުވެފައެވެ.
އަރި ޒޯނުގެ ޗެމްޕިއަންކަން މިހާތަނަށް ފަސް ފަހަރު ހޯދައިފައިވާ ކޮންރެޑަށް މުބާރާތުގެ ސެމީގައި ނުކުޅެ ސީދާ ފައިނަލަށް ދިޔުމުގެ ފުރުސަތުވެސް އެބައޮތެވެ. އެއީ ކުރިއަށް އޮތް މެޗު ކާމިޔާބުކޮށްގެންނެވެ.
މީގެ އިތުރުން މި މުބާރާތުގައި މިއަދު ހަވީރު ކުޅުނު ފުރަތަމަ މެޗުން ލިލީ ބީޗް މޮޅުވީ ރެޑިސަން ބްލޫ އަތުން 2-1 ގެ ނަތީޖާއަކުންނެވެ.
މި މެޗު ފަށައިގެން ލިލީ ބީޗުން ބޯޅަ ކޮންޓްރޯލްކޮށް ރެޑިސަން ބްލޫގެ ގޯލަށް ގިނަ ހަމަލާތަކެއް އުފެއްދި ނަމަވެސް، އެ ޓީމަށް މި ހާފުގައި ލަނޑެއް ކާމިޔާބުކުރެވިފައެއް ނުވެއެވެ.
އެކަމަކު މެޗުގެ ދެވަނަ ހާފުގައި ލިލީ ބީޗުން ވަނީ ލަނޑު ޖަހައި ލީޑު ނަގައިފައެވެ. މެޗުގެ 32 ވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ މޫސާ ނައިސާނެވެ. އަދި އޭގެ ހަ މިނެޓު ފަހުން ލިލީ ބީޗުން ވަނީ އިތުރު ލަނޑެއް ޖަހައި ލީޑު ފުޅާކޮށްދީފައެވެ. މި ލަނޑު އެ ޓީމަށް ކާމިޔާބުކޮށްދިނީ މުޙައްމަދު ޝާހިލެވެ.
އެކަމަކު މެޗުގެ ފަހު ވަގުތު ރެޑިސަން ބްލޫއިން ވަނީ ލަނޑެއް ޖަހައި ފަރަގު ކުޑަކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ އަބްދުﷲ ޒިޔަޒަންއެވެ.
މި މޮޅާއެކު ލިލީ ބީޗަށް ތިން މެޗުން ހަތަރު ޕޮއިންޓް ވަނީ ލިބިފައެވެ. އެ ޓީމުން ކުޅުނު ފުރަތަމަ މެޗުން ވިލަމެންދޫ އަތުން ބަލިވިއިރު، ދެވަނަ މެޗުގައި ކޮންރެޑާ އެއްވަރުވެފައެވެ.
މި މުބާރާތުގައި މާދަމާވެސް ދެ މެޗެއް ކުޅޭނެއެވެ. އެގޮތުން ފުރަތަމަ މެޗުގައި ޑަބްލިއު މޯލްޑިވްސް އާއި ވިލަމެންދޫ ބައްދަލުކުރާއިރު، ދެވަނަ މެޗުގައި ބައްދަލުކުރާނީ ކޮންރެޑާއި ރެޑިސަން ބްލޫއެވެ.