ޔޫކްރެއިންގެ ދެކުނުގައިވާ ޚަރްސަންގައި އޮންނަ ޑޭމްއަކަށް ޙަމަލާދީ ގޮއްވައިލުމާ ގުޅިގެން އެ ސަރަޙައްދުގެ ބޮޑު ބައެއްގައި ފެންބޮޑުވެ، ބޮޑެތި ގެއްލުންތަކެއް ލިބިއްޖެއެވެ. ޔޫކްރެއިނާއި ރަޝިޔާއިން ވެސް ދަނީ މި ކަމުގެ ފަހަތުގައި ވަނީ އަނެއް ޤައުމު ކަމުގައި ތުހުމަތު ކުރަމުންނެވެ. މި ހާދިސާ އެއްވެސް މީހެއްގެ ފުރާނައަށް ނުރައްކާވި ކަމުގެ ރިޕޯޓެއް ކޮށްފައެއް ނެތެވެ.
މި ހާދިސާ ހިނގާފައި މި ވަނީ، ޔޫކްރެއިންގެ އިރުމަތީ ޑޮނެޓްސްކަށް އަތްގަދަކޮށްފައިވާ ރަޝިޔާގެ އިސްތިޢުމާރީ ސިފައިންނާ ދެކޮޅަށް ޔޫކްރެއިންގެ ފައުޖުތަކުން ދިން ވަރުގަދަ ޙަމަލާތަކެއް ދިފާޢުކޮށްފައިވާ ކަމުގައި ރަޝިޔާއިން ބުނެފައިވާ ދަނޑިވަޅެއްގައެވެ. ރަޝިޔާއިން ވެސް ވަނީ ޔޫކްރެއިންގެ ވެރިރަށް ކީވަށް ވަރުގަދަ ޙަމަލާތަކެއް ދީފައެވެ. ކީވަށް ޙަމަލާދިނުމަށް ރަޝިޔާއިން ބޭނުންކުރި 20 ކްރޫޒް މިސައިލް ދިފާޢުކޮށްފައިވާ ކަމުގައި ޔޫކްރެއިނުން ބުނެއެވެ.
ޑޮނެޓްސްކަކީ ޔޫކްރެއިންގެ އިރުމަތީގައިވާ ދޮންބާސް ސަރަޙައްދުގެ މައި ދެ ސަރަޙައްދުގެ ތެރެއިން އެއް ސަރަޙައްދެވެ. ޑޮނެޓްސްކުގެ ބޮޑު ބަޔަކަށް ރަޝިޔާގެ އިސްތިޢުމާރީ ސިފައިން އަތްގަދަ ކޮށްފައިވާއިރު، ދޮންބާސްގައި އޮންނަ ލުހާންސްކުގެ ބޮޑު ސަރަޙައްދެއް ވެސް އޮތީ ރަޝިޔާގެ އަތްދަށުގައެވެ. އަދި، ޔޫކްރެއިންގެ ދެކުނުގައިވާ ޒަޕޮރީޜިޔާ ވެސް މިހާރު އޮތީ ރަޝިޔާގެ ފައުޖުތަކުގެ ބާރުގެ ދަށުގައެވެ.
ޚަރްސަންގެ ބައެއް ސަރަޙައްދުތަކުގައި ވެސް ރަޝިޔާގެ ފައުޖުތަކުން ދަނީ ހަރަކާތްތެރިވަމުންނެވެ. ޙަމަލާދީ ބޮޑެތި ގެއްލުންތަކެއް ދީފައި ވަނީ ޚަރްސަންގައި އޮންނަ ނޯވާ ކަޚޮވްކާ ޑޭމަށެވެ. 30 މީޓަރު އުސް އަދި 3.2 ކިލޯމީޓަރުގެ ދިގު މި ޑޭމަކީ ޑްނިޕްރޯ ކޯރުގައި ބިނާކޮށްފައިވާ ޑޭމްއެކެވެ. އެއީ، 1956 ވަނަ އަހަރު ކުރީގެ ރޫސީ ވިލާތުގެ ވެރިކަމުގައި ބިނާކޮށްފައިވާ ތަނެކެވެ. 2014 ވަނަ އަހަރު ރަޝިޔާއިން އަތްގަދަކޮށްފައިވާ ކްރައިމިޔާއަށާއި، ޒަޕޮރީޜިޔާގައި ހުންނަ ނިއުކްލިޔަރ ހަކަތަ އުފައްދާ ޕްލާންޓަށް ބޭނުންވާ ފެން ފޯރުކޮށްދެނީ އެ ޑޭމް މެދުވެރިކޮށެވެ.
ޑޭމްއަށް ގެއްލުންވެފައި ވަނީ ޔޫކްރެއިންގެ ފައުޖުތަކުން ދިން އާޓިލަރީ ބަޑީގެ ޙަމަލާތަކެއްގައި ކަމަށް ރަޝިޔާގެ މީޑިޔާތަކުން ރިޕޯޓުކޮށްފައިވެއެވެ. ނަމަވެސް، އެ ސަރަޙައްދުގައި އޮންނަ ނޯވާ ކަޚޮވްކާގެ ރައްޔިތުން ބުނަނީ، އެ ތަނަށް ދީފައި ވަނީ ޓެރެރިސްޓު ޙަމަލާއެއް ކަމުގައެވެ. ޑޭމް ހަލާކުވެ، އެ ސަރަޙައްދުގައި ފެންބޮޑުވި ނަމަވެސް، އެ ތަނާ މާ ދުރުނޫން ހިސާބެއްގައި އޮންނަ ޒަޕޮރީޜިޔާ ނިއުކްލިޔަރ ޕްލާންޓަށް ނުރައްކަލެއް ފޯރާފައި ނުވާ ކަމުގައި ރިޕޯޓުތައް ބުނެއެވެ.
ފެންބޮޑުވެފައިވާ ސަރަޙައްދުތަކުގައި ދިރިއުޅޭ ޢާންމު ރައްޔިތުން ރައްކާތެރި ހިސާބުތަކަށް ބަދަލު ކުރުމުގެ މަސައްކަތް ކުރަމުންދާ ކަމުގައި ޚަރްސަންގައި ތިބޭ ރަޝިޔާގެ އޮފިޝަލުން ވިދާޅުވެއެވެ. މި ހާދިސާއާ ގުޅިގެން ޔޫކްރެއިންގެ ޤައުމީ ސަލާމަތާ ބެހޭ ކައުންސިލްގެ ކުއްލި ބައްދަލުވުމެއް ބާއްވާނެ ކަމުގައި އެ ކައުންސިލްގެ އިސްވެރިޔާ އޮލެކްސީ ޑެނިލޮފް ވިދާޅުވިއެވެ. މި ބައްދަލުވުމުގައި ރައީސް ވޮލޮޑޮމީރް ޒެލެންސްކީ ވެސް ބައިވެރިވެ ވަޑައިގަންނަވާނެއެވެ.
ރަޝިޔާ ސިފައިން ޔޫކްރެއިނަށް އަރާފައި ވަނީ 2022 ވަނަ އަހަރުގެ ފެބުރުވަރީ މަހުގެ 24 ވަނަ ދުވަހުއެވެ. ޚާއްޞަ އަސްކަރީ އޮޕަރޭޝަނެއްގެ ނަމުގައި ރަޝިޔާ ސިފައިން ޔޫކްރެއިނަށް އަރާފައި ވަނީ ނާޒީންގެ އަތްދަށުން އެ ޤައުމު މިނިވަންކޮށް، އެ ޤައުމުގެ ސަރުކާރު ވައްޓައިލުމުގެ ބޭނުމުގައެވެ. އެންމެ ދެތިން ހަފުތާއިން ނިންމައިލެވޭނެ ކަމަށް ރަޝިޔާއިން ބުނަމުންދިޔަ މި އޮޕަރޭޝަން މިހާރު ވަނީ 15 މަސް ދުވަހަށް ދެމިގެން ގޮސްފައެވެ.