ޑިވެލޮޕްމަންޓް އޮބްޖެކްޓިވް ގްރާންޓް އެގްރިމަންޓްގެ ދަށުން ރާއްޖެއަށް އިތުރު 111 މިލިއަން ރުފިޔާގެ އެހީއެއް ދިނުމަށް އެމެރިކާއިން ނިންމައިފިއެވެ.
ޑިވެލޮޕްމަންޓް އޮބްޖެކްޓިވް ގްރާންޓް އެގްރިމަންޓް، ޑީއޯއޭޖީއަކީ އެމެރިކާއިން ދިވެހިރާއްޖެއަށް އެހީ ފޯރުކޮށްދިނުމަށް 2019 ވަނަ އަހަރުގެ މާޗުމަހު ގާއިމްކުރި އެއްބަސްވުމެކެވެ.
މި އެއްބަސްވުމުގެ ދަށުން އެމެރިކާއިން ފޯރުކޮށްދޭ އެހީ އިތުރުކުރުމަށް ނިންމައި، އެކަމާއި ގުޅޭ ލިޔުންތަކުގައި ދެ ޤައުމުން އިއްޔެ ވަނީ ސޮއިކޮށްފައެވެ.
ފޮރިން މިނިސްޓްރީގައި ބޭއްވި ރަސްމިއްުުޔާތެއްގައި ޑީއޯއޭޖީއަށް 10 ވަނަ އިސްލާހު ގެނައުމާއި ގުޅޭ ލިޔުމުގައި ދިވެހި ސަރުކާރުގެ ފަރާތުން ސޮއިކުރެއްވީ ފޮރިން މިނިސްްޓްރީގެ ސްޓޭޓް މިނިސްޓަރ އަހުމަދު ޚަލީލްއެވެ. އެމެރިކާ ސަރުކާރުގެ ފަރާތުން ސޮއިކުރެއްވީ ޔޫއެސްއެއިޑްގެ މިޝަން ޑައިރެކްޓަރ ގެބްރިއަލް ގްރައުއެވެ.
ޑިވެލޮޕްމަންޓް އޮބްޖެކްޓިވް ގްރާންޓް އެގްރިމަންޓަށް ގެނެވުނު އިސްލާހާއެކު ރާއްޖެއަށް އިތުރު 7.2 މިލިއަން ޑޮލަރު ނުވަތަ 111 މިލިއަން ރުފިޔާ އެހީގެ ގޮތުގައި ފޯރުކޮށްދޭނެއެވެ. މިއާއެކު މި އެއްބަސްވުމުގެ ދަށުން އެމެރިކާއިން ފޯރުކޮށްދޭޭ އެހީގެ ޖުމްލަ 36.1 މިލިއަން ޑޮލަރަށް އަރާނެއެވެ.
އެމެރިކާއިން ރާއްޖެއަށް ދޭން ނިންމި 7.2 މިލިއަން ޑޮލަރަކީ ދައުލަތުގެ މާލިއްޔަތާއި ބެހޭ ކަންކަން ހިންގުން ހަރުދަނާކުރުމަށާއި އިޤްތިޞާދަށް އަންނަ ލޮޅުންތަކުން ކުރާ އަސަރު ކުޑަކުރުމަށް ކުރާ މަސައްކަތަށް އެހީތެރިވެދިނުމުގެ އިތުރުން ޑިމޮކްރެޓިކް ވެރިކަމުގެ ނިޒާމު ހަރުދަނާކުރުމަށް ފޯރުކޮށްދިން އެހީއެކެވެ.