ކުރިއަށް އޮތް ސާފް ޗެމްޕިއަންޝިޕް ފުޓްބޯޅަ މުބާރާތަށް ތައްޔާރުވުމަށް ޤައުމީ ފުޓްބޯޅަ ޓީމު ޖަޕާނަށް ފުރައިފިއެވެ.
މި ފަހަރުގެ މުބާރާތް ކުރިއަށްދާނީ އިންޑިއާގެ ބެންގަލޫރުގައި މި މަހުގެ 21 އިން ޖުލައި މަހުގެ ހަތަރުވަނަ ދުވަހުގެ ނިޔަލަށެވެ. މި ފަހަރުގެ މުބާރާތުގެ ސާފް ސަރަހައްދުގެ ހަ ޤައުމެއްގެ އިތުރުން، ސަރަހައްދުން ބޭރުން ދެ ގައުމަކަށް ދައުވަތު ދީގެން، އަށް ޓީމުގެ މެދުގައި މުބާރާތް ބާއްވަން ވަނީ ނިންމާފައެވެ. ސަރަހައްދުން ބޭރުން ވާދަކުރާ ދެ ޤައުމަކީ ލުބުނާނާއި ކުވެއިތެވެ.
މި މުބާރާތަށް ތައްޔާތުރުމުގެ ގޮތުން މިއަދު މެންދުރު ޤައުމީ ޓީމު ވަނީ ޖަޕާނަށް ފުރާފައެވެ. އިޓަލީގެ ފްރެންޗެސްކޯ މޮރިއޭރޯގެ ކޯޗުކަމުގެ ދަށުން 30 ކުޅުންތެރިންގެ ސްކޮޑަކާއެކު ޤައުމީ ޓީމުން މީގެ ކުރިން ފަރިތަކުރުންތައް ކުރިއަށް ގެންދަމުން އައިރު، ޖަޕާނަށް ފުރާފައިވަނީ 23 ކުޅުންތެރިންގެ ފައިނަލް ސްކޮޑެވެ.
އެހެންކަމުން 30 ކުޅުންތެރިންގެ ތެރެއިން ބާކީކުރީ ހަތް ކުޅުންތެރިންނަކީ ޔުނައިޓެޑް ވިކްޓަރީގެ އަޙްމަދު ބައްސާމް މުޙައްމަދު ނައީމާއި، ޝަނާން ރަޝީދާއި، އެ ޓީމުގެ ގޯލްކީޕަރު އަލީ ނާޖިހާއި، ޓީސީ ސްޕޯޓްސް ކުލަބުގެ އަޙްމަދު މާއިޝް ރަޝީދާއި، ބުރު ސްޕޯޓްސް ކުލަބުގެ މުޙައްމަދު ނާއިމް އާއި، އެ ޓީމުގެ ގޯލްކީޕަރު ޝައިހާން އަލީގެ އިތުރުން ސުޕަ ޔުނައިޓެޑް ސްޕޯޓްސް (ސަސް) ގެ މުޙައްމަދު ސަޚާއުއެވެ.
ޤައުމީ ޓީމުން ޖަޕާނަށް ގޮސް 10 ދުވަހުގެ ކޭމްޕެއް ފުރިހަމަކުރުމަށް ނިންމާފައިވާ އިރު، ޓީމު ބެންގަލޫރަށް ދާނީ ޖަޕާނު މަގުންނެވެ. ޖަޕާނުގެ ޤައުމީ ޓީމުވެސް ތަމްރީނުތައް ކުރުމަށް ބޭނުންކުރާ ޚާއްސަ ވިލެޖެއްގައި ޤައުމީ ޓީމު ތިބޭއިރު، ސާފަށް ދިޔުމުގެ ކުރިން އެކުވެރިކަމުގެ އެއް މެޗު ކުޅުމަށް އަންނަނީ މަސައްކަތް ކުރަމުންނެވެ.
ޤައުމީ ޓީމުން ފައިނަލް ކުރި ސްކޮޑުން އަލަށް ޖާގަ ހޯދި ކުޅުންތެރިންގެ ތެރޭގައި ސަސްގެ އަޙްމަދު އައިހަމާއި، އެޓީމުގެ މުޙައްމަދު ނިޒާމުގެ އިތުރުން ބުރު ސްޕޯޓްސްގެ އިބްރާހީމް އުސާމާ ހިމެނެއެވެ. މީގެ އިތުރުން އިތުރުން ސްކޮޑުގައި ކުލަބު އީގަލްސްގެ ހުމައިދު ހުސައިންވެސް ވަނީ ހިމަނާފައެވެ.
މި ފަހަރުގެ ސާފް ޗެމްޕިއަންޝިޕުގެ ފޯމެޓް ރޭވިފައިވާ ގޮތުން މުބާރާތް ކުރިއަށްދާނީ ދެ ގްރޫޕަކަށް ބަހާލައިގެންނެވެ. ކޮންމެ ގްރޫޕެއްގައި ހަތަރު ޓީމު ހިމެނޭއިރު، ގްރޫޕް އޭގައި ހިމެނެނީ އެންމެ ފަހުގެ ޗެމްޕިއަން އިންޑިއާ އާއި، ޕާކިސްތާނާއި، ކުވެއިތުގެ އިތުރުން ނޭޕާލެވެ. އަދި ރާއްޖެ އާއެކު ގްރޫޕް ބީގައި ހިމެނެނީ ލުބުނާނާއި، ބޫޓާން އަދި ބަންގްލަދޭޝްއެވެ.