ރާއްޖޭގެ ރިސޯޓުތަކުގެ މެދުގައި ކުރިއަށްގެންދާ އެންމެ ބޮޑު ފުޓްސަލް މުބާރާތް ކަމަށްވާ ރިސޯޓް ލީގު 2023 ގެ އަރި ޒޯނުގެ ފެށުން ކޮންރެޑް މޯލްޑިވްސް އާއި ވިލަމަންދޫ މޯލްޑިވްސްއިން ރަނގަޅުކޮށްފިއެވެ.
މި މުބާރާތުގެ އަރި ޒޯނުގެ މެޗުތައް ކުޅެމުން އަންނަނީ ކޮންރެޑުގައެވެ. މި ޒޯނުގެ ކުޅުން އިއްޔެ ހަވީރު ފެށިއިރު، ފުރަތަމަ މެޗު ކޮންރެޑުން ކާމިޔާބުކުރީ ޑަބްލިއު މޯލްޑިވްސްއާ ވާދަކޮށް 5-0 ގެ ތަފާތު ބޮޑު ނަތީޖާއަކުންނެވެ.
މި މެޗު ފަށައިގެން ހަތްވަނަ މިނެޓުގައި ކޮންރެޑުން ވަނީ ލީޑު ނަގާފައެވެ. މި ލަނޑު އެ ޓީމަށް ކާމިޔާބުކޮށްދިނީ ކެޕްޓަން އަލީ އުމެއިރެވެ. މި ލަނޑަށްފަހުވެސް ކޮންރެޑަށް މި ހާފުގައި ލަނޑު ޖަހާނެ ގިނަ ފުރުސަތުތަކެއް ލިބި ވަނީ ބޭކާރުވެފައެވެ.
މި މެޗުގެ ދެވަނަ ހާފު ފަށައިގެންް ދެވަނަ މިނެޓުގައި ކޮންރެޑުން ވަނީ އެ ޓީމުގެ ލީޑު ފުޅާކޮށްފައެވެ. މި ލަނޑު ޖަހައިދިނީ އާދަމް އާޒިމެވެ. އަދި އޭގެ ހަތަރު މިނެޓު ފަހުން އުމެއިރު ވަނީ އިތުރު ލަނޑެއް ޖަހާފައެވެ.
މި މެޗުގެ 33 ވަނަ މިނެޓުގައި ކޮންރެޑުގެ ހަތަރުވަނަ ލަނޑު އެ ޓީމަށް ކާމިޔާބުކޮށްދިނީ ފާއިގް އަޙްމަދެވެ. އަދި އޭގެ ތިން މިނެޓު ފަހުން ކޮންރެޑުން ޖެހި ފަސްވަނަ ލަނޑު އެ ޓީމަށް ކާމިޔާބުކޮށްދިނީ ހުސެއިން ޝައްފާހެވެ.
މީގެ އިތުރުން އިއްޔެ ހަވީރު ކުޅުނު ދެވަނަ މެޗުގައި ލިލީ ބީޗުގެ މައްޗަށް ވިލަމެންދޫ އައިލެންޑް ރިސޯޓް ކުރިހޯދީ 3-1 ގެ ނަތީޖާއަކުންނެވެ.
މި މެޗުގެ ފުރަތަމަ ހާފު ފަށައިގެން ލިލީ ބީޗުން ވިލަމެންދޫގެ ހާފަށް ބާރުބޮޑުކޮށް ގިނަ ހަމަލާތަކެއް އުފެއްދި ނަމަވެސް، ވިލަމެންދޫގެ ގޯލު ފޫއަޅުވާލެވޭ ގޮތެއް ނުވިއެވެ. އެއާއެކު ފުރަތަމަ ހާފުގެ 18 ވަނަ މިނެޓުގައި ވިލަމެންދޫން ވަނީ ލީޑު ނަގާފައެވެ. މި ލަނޑު އެ ޓީމަށް ޖަހައިދިނީ އިޙްސާން މަންސޫރެވެ.
މި މެޗުގެ ދެވަނަ ހާފު ފަށައިގެން ދެވަނަ މިނެޓުގައި ވިލަމެންދޫން ވަނީ އިތުރު ލަނޑެއް ޖަހައި ލީޑު ފުޅާކޮށްފައެވެ. މި ލަނޑު އެ ޓީމަށް ކާމިޔާބުކޮށްދިނީ އަލީ ނިޝާހެވެ. އެކަމަކު މެޗުގެ 35 ވަނަ މިނެޓުގައި ލިލީ ބީޗުގެ ހަނީފް އަބްދުﷲ ވަނީ ލަނޑު ޖަހައި ފަރަގު ކުޑަކޮށްފައެވެ. ނަމަވެސް އޭގެ ހަތަރު މިނެޓު ފަހުން ނަސްރުﷲ ވަހީދު ވަނީ ވިލަމެންދުއަށް އަލުން ލީޑު ފުޅާކޮށްދީފައެވެ.
މި މުބާރާތުގެ އަރި ޒޯނުގައި މިއަދުވެސް ދެ މެޗެއް ކުޅޭނެއެވެ. އެގޮތުން ފުރަތަމަ މެޗުގައި ބައްދަލުކުރާނީ ކޮންރެޑާއި ލިލީ ބީޗެވެ. އަދި ދެވަނަ މެޗުގައި ބައްދަލުކުރާނީ ޑަބްލިއު މޯލްޑިވްސް އާއި ރެޑިސަން ބުލޫއެވެ.