އިޓާލިއަން ލީގުގެ އޭސީ މިލާނަށް ކުޅެމުން އަންނަނ ޕޯޗުގަލުގެ ފޯވާޑް ރަފައެލް ލިއާއޯ، އެ ޓީމާއެކު ހަދާފައިވާ އެއްބަސްވުން އައުކޮށްފިއެވެ.
މިގޮތުން އާ އެއްބަސްވުމުގެ ދަށުން ލިއާއޮވަނީ މިލާންގައި ފަސް އަހަރު މަޑު ކުރަން ނިންމާފައެވެ.
މިސީޒަންގައި ލިއާއޮ ދެއްކި މޮޅު ކުޅުމުގެ ސަބަބުން ޔޫރަޕްގެ ގިނަ ކްލަބް ތަކަކުން ދިޔައި އޭނާ އަށް ޅޮ އަޅަމުންނެވެ. އުމުރުން 23 އަހަރުގެ ލިއާއޮ މިލާނާއެކު ކުރިން ހަދާފައިވި އެއްބަސްވުން މިއަަންނަ ސީޒަނާއެކު އޮތީ ހަމަވާގޮތަށެވެ.
ލިއާއޮ މިލާނާއި ގުޅިފައިވަނީ 2019 ވަނައަހަރު ފްރެންޗް ލިގް އާންގެ ކްލަބް ލިލް އިންނެވެ. އަދި މިހާތަނަށް ވަނީ 162 މެޗް ކުޅެދީ 41 ލަނޑު މިލާނަށް ކާމިޔާބުކޮށްދީފައެވެ.
މިދިޔަ ސީޒަންގައި ލިއާއޮއަށް ވަނީ ސެރީއާގެ އަހަރުގެ މޮޅު ކުޅުންތެރިޔާގެ މަގާމްވެސް ލިބިގެން ގޮސްފައެވެ. އަދި މިދިޔަ ސީޒަންގައި މިލާނުން ސެރީއާގެ ތަށި އުފުލާލިއިރު ލިއާއޮވަނީ މުހިންމު ދައުރެއް އެޓީމްގައި އަދާކޮށްފައެވެ. މީގެއިތުރުން މިފަަހަރުގެ ޗެމްޕިއަންސް ލީގުގެ ސެމީފައިނަލުން މިލާން ޖާގަހޯދުމުގައިވެސް ލިއާއޮގެ ދައުުރު ވަރަށް ބޮޑެވެ. އަދި ސެމީފައިނަލްގެ ފުރަތަމަ ލެގްގައި އަނިޔާގެ ސަބަބުން ލިއާއޮއަށް ނުކުޅެވުނު ތަން މިލާންގެ ޓީމުން ވަރަށް ބޮޑަށް ފާހަގަވެގެން ދިޔައެވެ.
މިލާން ވަނީ ސެމީފައިނަލްގައި އިންޓަރ އަތުން ބަލިވެފައެވެ. މީގެއިތުރުން ލިއާއޮވަނީ މިދިޔަ އަހަރުގެ ފަހު ކޮޅު ބޭއްވި ވާރލްޑް ކަޕްގައި ވާދަކުރި ޕޯޗުގަލް ޓީމްގައިވެސް ހިމެނިފައެވެ.